Tukul Enda Bula Ke Tempan

Pegi nya endang budaya Iban, pengawa anak lelaki ari kelia menya. Pemerani nya endang budaya Iban menya, tau ngasuh pegari tampak rita, jelai nama. Enti kitai enda enggau orang pegi agi kelia, kitai  nya dikumbai orang nadai kala mindah ari teluk dapur. Lalu enti kitai takut, suah bendar jaku orang ngasuh kitai nya baka orang indu ketegal enda berani mutus ati, enda tajam muting geraji.

Jaku peransang nya suah bendar dikeingatka Nyanau. Iya anak tunggal apai iya. Apai Nyanau angkun bendar ke Nyanau laban nadai anak bukai. Kedua agi, bini iya udah nadai lebuh Nyanau agi mit. Seduai menyanak endang lama mega udah ngidupka diri. Maya orang bumai betaun seduai iya endang enda kala tinggal ari orang.

Tang enda mukai-mukai bisi sekali lebuh orang beduruk nebas umai sida iya, dia siku ari sida serumah ke selalu midang belelang sebelah menua bisi berandau enggau Nyanau, nusi utai ti udah dipeda iya lebuh di Berunai.

‘Nemu dek kaban, enti kitai enda kala mindaeh ari rumaeh diri nya nadai tunga, semina ensium burit bini diri sereta bepukung enggau aruk kali ke ba teluk dapur.’

Ninga utai munyi nya, ati Nyanau pan lalu teputar, runding lalu tekuing laban ninga pemanah utai ti ditusi Igat Pemidang nya. Pulai iya ke rumah iya lalu madah ngagai apai iya bekunsi penemu pasal berita ti ditusi Igat nya. Iya madahka diri deka pegi ninggalka apai iya.

‘Aku tu deka meda menua orang laban bala kitai serumah tu jarang bendar ke empai mindah ari menua diri. Sekeda kitai serumah sanggup ngemaduka diri besekula lalu pegi bekuli  ngereja batang,’ ku Nyanau madah ngagai apai iya. 

‘Aku suba ukai badu besekula deka pegi tang laban sinu meda nuan nadai orang enggau bekaling ngereja pengawa. Nya alai enti nadai utai nanggul nyangka udah badu nugal ila, mupuk aku,’ pia ku jaku Nyanau nganu apai iya.

Ninga penemu anak iya munyi nya, lama apai iya enda bejaku, tegenung baka empelekung mabuk ambuh. Kebuah baka nya, laban apai iya berundingka Nyanau nya agi biak lalu endang empai teulihk runding. Agi mega apai iya berundingka diri ke nadai orang enggau begulai kelimpah ari bisi pemedis sereta nyau tuai. Nyau lama baru apai iya nyaut jaku Nyanau.

‘Aku, anak, nadai orang enggau begulai enti nuan nyau pegi ila. Nambahka nya nuan agi biak lalu bedau bisi runding panjai. Ari ke baka nya suah kita ke biak bedau tentu ngelala utai ti tau nusahka kita empu,’ ku iya nganu Nyanau. Udah nya apai iya pan lalu nyambung jaku iya baru.

‘Pengawa di rumah tu mayuh. Tanah enggi kitai alah enda ngereja. Enti muka pengawa ba tanah diri amat nya laun mansutka belanja tang enti iya pansut lama ga kitai ngenatka penyamai panjungka iya dikerejaka kitai ba tanah menua diri empu. Jani, manuk, ikan, chapi enda salah ditupi; lada, getah, padi, nyiur, sawit enda salah dikebun laban tanah endang meruan. Enti pengawa ke digaga kitai ba tanah diri empu udah maju, kitai tau mindah kiba kanan meda menua ngena utai ke ulih ari pengawa kitai nya,’ ku apai iya ngelicha.

‘Tang enti kitai pegi ninggalka menua nadai utai udah ditumbuhka ba menua sereta ninggalka menua ngiga pengawa ke nadai temu tuju, kitai nya baka indu buyah nabakka diri ngagai api semina ngasuh diri bulih penusah. Pendiau dudi hari ila nadai menyana laban kitai lebuh agi biak tulang agi kering, enda nudukka pengawa nyendiaka penuduk kitai jemah ila. Lebuh ke pegi, duit amat nyamai bulih taja pia kitai enda berasai muai iya. Ari nya duit  tadi enda berekat, pengawa ke di menua pan timpang. Nya alai aku munyi ke ngenanka nuan. Baka nuan anang mega enda ingatka pengangkun aku enggau niang indai nuan ke nuan,’ pia ku jaku apai Nyanau.

Taja jaku apai iya panjai ngajar Nyanau tang laban ati iya udah  keras, nya alai penemu orang ke tuai enda dipending, enda dikemuningka iya. Nya alai badu nugal taun nya, Nyanau lalu mupuk pegi ninggalka apai iya di menua. Iya lalu pegi ke Sabah, menua di baruh puput ribut melundai.

Datai iya di Sabah, Nyanau lalu terus ngaga menija kayu ramu di Sandakan, tang enda mukai-mukai kompeni nya nadai alai ngambi orang bekereja laban kuli udah tekelalu mayuh. sebulan-bulan nya Nyanau endang kuang-kuit ngiga pengawa tang lalu enda tetemuka pengawa. Duit iya mansang kusut-sekusut.

Nyau kelama nya baru iya bulih pengawa ba kompeni batang. Gaji iya besai nya alai duit enda berasai bulih.

Nyanau lebuh iya agi begulai enggau apai iya endang enda kala muai belanja enda bepasal. Tang lebuh ke di menua orang, laban iya nyau alah peransang sida ke sama bela sereta nadai apai-indai nyanding enggau penemu, ari nya iya nyau nemu enggau orang bebuaika duit dikena nyabung, bejudi kelimpah ari pengawa bukai ke enda menuku. Duit iya jarang bendar betimbun datai ke setengah bulan laban ati agi kurang mereti ketegal agi biak alah ansak sida ke sama serebak.

‘Aram punggal enggau aku nyabung. Enda ibuh bekereja tua sehari tu,’ pia ku orang nya ngumbuk Nyanau.

‘Enggai aku punggal. Nadai agi belanja tu. Enda alah tak berutang belama,’ ku Nyanau nyaut.

‘Eh!’ ku orang nya, ‘Nadai nya dikirauka nuan. Ila aku nyali nuan duit. Mayuh duit aku ditu,’ pia ku iya.

Ninga munyi nya, Nyanau lalu mupuk mega enggau orang nyabung. Pengawa seduai iya sehari nya puntan baka menasan jalai jelu labah baka buah merunjau ulu. Sida balat bendar alah. Duit sesen pan nadai agi tinggal.

Nyadi lemai nya mega, polis bisi datai ngagai rumah orang nyali Nyanau duit. Orang nya ditemu polis, seruan China nyual dadah. Nyanau pan kena tangkap laban kena jual orang siku nya tadi ke madahka seduai sama ngereja pengawa nya. Nyanau lalu enda nemu bejawap laban ke nadai orang endur betanyaka runding.

Nya alai seminggu udah nya seduai iya kena pechara lalu diukum jil.

Sebulan nandan di langit setaun nampun di bukit, seduai iya pan dilepas ari jil. Tang lebuh seduai udah pansut ari jil, dia menija ke endur seduai bekereja enggai agi nerima seduai iya gawa ba kompeni nya.

Duit seduai pan nadai agi. Nasit bisi orang sinu lalu meri seduai iya makai. Enti nadai orang sinu, seduai iya endang enda makai besehari-sehari. Deka pulai nadai ga belanja ke tambang. Lebuh ke bisi duit peneka ati muai laban tapa bubus.

Nyau kepuas berunding, dia Nyanau mutus ati nulis surat ngagai apai iya minta dikirumka duit dikena pulai lalu madahka penusah ke udah nyadi ba iya. Apai Nyanau laban ke angkunka anak lalu beguai-guai ngirum duit. 

Beberapa minggu udah nya duit ke dikirumka apai iya pan datai. Nyanau lalu mulaika diri tang gari enggau utai ke ulih iya abis dijual kena meli pemakai nganti belanja dikirumka apai iya datai. Kengka utai ke agi nya semina tanchut enggau baju ke ba tubuh.

Lebuh datai di rumah baru Nyanau nemu apai iya sakit. Pengawa di menua nadai tentu dikereja laban apai iya enda tentu pengerai. Rumah abis tuduh nadai orang ngintu; kebun abis repa enda ditebas; jani manuk nadai mayuh agi tinggal laban nadai orang ngiga pemakai. Pengawa seduai ke baru deka maju nyau deka balang magang. Penyakit apai iya mansang balat-sebalat laban lebuh Nyanau ke nyau pegi nadai orang nganjung iya berubat.

‘Amat bendar jaku ajar nuan suba pai,’ pia ku Nyanau. ‘Enti aku nitihka jaku nuan suba tentu mayuh pengawa tua udah mujur. Baka ke tu ni ulih agi. Nuan nyau enda dapat agi besangking enggau aku kiba-kanan,’ ku Nyanau nandu baru.

Ninga jaku Nyanau munyi nya, apai iya pan lalu nyaut iya; ‘Jang, tukul enda bula ke tempan lelabu enda kala bula ke peputan. Jaku kami ke tuai panjung ke dulu ngetup garam jarang bendar deka ampa ba kita ke nembiak,’ pia ku apai iya.

Kenyau ari nya, Nyanau pan berasai nesal laban pengawa ke udah dikerejaka iya semua nadai penunga.