David ngelaban Goliath

David anak Jesi, orang Epirat diau di nengeri Betlehem dalam menua Judah. Semua anak lelaki Jesi lapan iku. Lebuh Saul nyadi raja, Jesi endang udah tuai bendar. Tiga iku anak lelaki iya ti tuai ke sida udah nurun mantu Saul beperang. Nama iya ti tuai bendar nya Eliap, adi iya Abinadap, lalu iya ti nangkanka nya Samah. Sida tiga diau enggau Saul tang David ti bunsu sida menyadi selalu nemuai ke nengeri Betlehem laban ngibun bedus apai iya.

Genap pagi enggau lemai dalam kandang empat puluh hari, Goliath endang nadai ngetu nyakap bala orang Israel. 

Hari siti, Jesi bejaku enggau David, ku iya, ‘Anjung sepuluh kilogram letup enggau sepuluh tuku ruti paun ngagai menyadi nuan ti ba palan soldadu enggau jampat. Bai sepuluh beluku engkiju tu ngagai tuai soldadu. Tanyaka berita ari menyadi nuan lalu bai pulai tanda kena nentuka nuan bisi betemu enggau sida lalu sida mega gerai nyamai. Menyadi nuan, Raja Saul enggau bala orang Israel ti bukai bepalan ba emperan Elah.’

David dani tumu pagi siti lalu ngasuh orang bukai ngemataka bedus. Iya pan lalu angkat mai bekal nya. Lebuh iya datai ba palan soldadu, bala orang Israel benung beterais manjung mansang beperang. Soldadu orang Pilistia enggau soldadu orang Israel bela betatam ninung pangan diri sedia deka bamuk. David ninggalka pemakai ti dibai iya ba tuai soldadu ti ngemataka keresa perang. Iya belanda ngagai menyadi iya ti benung deka enggau orang bamuk lalu nanyaka berita sida.

Lebuh sida berandau, Goliath mansang lalu nyakap orang Israel baka ti udah. David mega ninga iya. Lebuh orang Israel meda Goliath, sida lalu lari, takutka iya. Ku sida bejaku enggau pangan diri, ‘Peda gamal iya! Dinga chakap iya! Raja Saul deka ngupah orang ti tebunuhka iya, ngasuh orang nya jadi enggau anak dara iya lalu enda agi minta pupu ari sida sebilik.

‘Nama upah orang ti tebunuhka orang Pilistia nya lalu ngelepaska orang Israel ari pemalu? Ukai enda nya orang Pilistia ti nadai pengarap, ti bejaika soldadu Tuhan ti idup?’ ku David nanya orang ti semak iya.

Sida lalu madahka upah ti deka diberi ngagai orang ti tebunuhka Goliath. Menyadi David ti tuai bendar, Eliap ninga iya bejaku enggau orang nya. Iya ringat bendar lalu ku iya, ‘Nama gaga nuan kitu? Sapa ngemataka bedus nuan? Nuan bejaku enda berunding! Nuan kitu semina deka meda orang bamuk!’

‘Nama penyalah aku? Kati aku enda tau nanyaka utai?’ ku David. Iya lalu nanya orang bukai. Tiap kali iya nanya, saut orang munyi nya magang.

Orang ti ninga jaku David lalu madah ngagai Saul. Saul lalu ngangauka iya. Ku David bejaku enggau Saul, ‘Kitai enda patut takutka orang Pilistia, Tuan Raja! Aku deka ngelaban iya.’

Saut Saul, ‘Anang! Nuan alah laban iya. Nuan agi nembiak lalu iya udah nyadi soldadu kenyau ari iya agi mit.’

‘Tuan Raja, aku ngemataka bedus apai aku. Enti singa tauka beruang bisi nangkap anak domba, aku enda takut ngagai jelu nya, munuh iya lalu ngidupka anak domba. Lalu enti singa tauka deka ngelaban aku, aku nyekak rekung jelu nya lalu mangkaka iya datai ke mati. Aku udah munuh singa enggau beruang, lalu baka nya mega aku deka munuh orang Pilistia ti enda arapka Tuhan ti idup lalu mechat soldadu iya. Tuhan udah nyaga aku ari soldadu singa enggau beruang; nya alai iya deka nulung aku ngelaban orang Pilistia nya,’ ku David.

‘Au alai mih, Tuhan nulung nuan,’ ku Saul nimbal David. Saul ngasuh David ngena gagung besi enggau selapuk engkeraju iya. Lapis gagung dirasukka iya ngagai David mega. Udah David nangkin pedang Saul, iya lalu bejalai, tang iya lalu deka terap laban iya enda teleba ngena perengka nya.

Ku iya bejaku enggau Saul, ‘Enda aku tau bamuk ngena perengka tu laban aku enda teleba.’ Udah nya David lalu muka ngepan iya. Iya minching tungkat ti dikena iya ngema bedus, udah nya milih lima igi batu ti segala ari sungai lalu diengkah iya dalam kambut. Udah David nyediaka pang wang iya lalu mansang nyatup Goliath.

Goliath mega mansang ngagai iya. Orang ti mai terabaika Goliath bejalai dulu ari iya. Lebuh Goliath nyau semak iya merening David, tang iya asai ti dikeleseka orang laban David enda jegak-jegak lalu gamal iya mega sigat. Ku iya bejaku enggau David, ‘Kapa nuan tungkat nya? Ukui aku tu ku runding nuan!’ iya mega lalu nyumpah David ngena nama petara bansa Pilistia. Ku iya nyakap David, ‘Mansang kitu ngambika aku munuh nuan lalu ngasuh bangkai nuan diempa burung enggau jelu.’

‘Nuan ngelaban aku ngena pedang, sangkuh enggau perambut tang aku deka ngelaban nuan ngena nama Tuhan ti pemadu tinggi, Allah Taala soldadu ti dipechat nuan. Nya alai Tuhan deka nulung aku ngalahka nuan. Udah nuan alah, aku deka mumpung pala nuan lalu meri bangkai soldadu bansa Pilistia ngagai burung enggau jelu. Mensia di dunya nemu orang Israel bisi Allah Taala lalu semua orang nemu Tuhan enda begunaka pedang tauka sangkuh kena ngidupka nembiak iya. Tuhan nadai kala alah lalu iya deka ngasuh kita dipegai kami.’

Lebuh Goliath mansang ngagai iya, David mega lalu belanda  nuju bala orang Pilistia nyatup Goliath. David ngeruk sigi batu ari kambut lalu selinting iya ngena pang wang nuju Goliath. Batu nya kena kening Goliath lalu mechahka kerubung pala iya. Goliath lalu rebah tetingkap ke tanah. David ngalah lalu munuh Goliath ukai ngena pedang tang ngena pang wang enggau batu. Iya belanda ngagai Goliath ti udah rebah lalu bediri atas iya. David nyintak pedang Goliath empu lalu mumpung pala iya ngena padang nya.

Lebuh orang Pilistia meda bujang berani sida mati, sida lalu lari. Orang Israel enggau orang Judah lalu manjung ngagai sida nyentuk ke nengeri Gat enggau Ekron. Orang israel munuh orang Pilistia sekayu-kayu jalai Saraim nyentuk ke Gat enggau Ekron. David bulih pala Goliath lalu mai iya ke Jerusalem tang perengka perang Goliath ditaruh iya dalam langkau kain iya empu.