Cherita Antu Buding

MAYA A-LEVEL suba aku belajar ba sebuah kolej ke bisi buding di Kuala Lumpur. Nama kolej nya enda aku sebut ditu dikena nyaga status kolej nya mih. Nyadi kolej enggau bilik buding nya asal iya suba sebuah tempat engkah kerita beringkat. Nyadi nembiak kolej maya nya suba tau milih enti sida deka ngena tangga tauka lif niki ngagai buding kami nya.

Tang ukai nya ke deka dicheritaka aku ditu.

Cherita tu nyadi ba ringkat pengabis atas tauka kiraka perabung rumah buding kami. tu mih tempat alai bala bujang enggau dara madu pengerindu lebuh maya malam hari. Dijamin nadai dikachau bala warden buding. Agi mega enti dibandingka enggau tempat bukai, palan ba perabung tu endang manah laban bisi ribut bepuput berayun lundai mai angin nyamai kelebih agi lebuh maya malam hari.

Nyadi bisi sekali malam maya petang nadai bebintang, aku duduk  ba perabung nya kediri-diri, seiku-iku, seorang-orang laban ke nganti ambai ati perembam dalam aku datai. Kiraka deka dating mih kami duai munyi ku jaku orang kemaya hari tu.

Maya ke nganti nya, tak enda mukai-mukai aku tak tepedaka siku ibu tuai ke jelan umur benung ngeredaika gari. Utai ke ngalitka ati nya semua gari ke diredaika iya nya semua bechura burak ngelebus. Nama gaga ibu tu ditu maya tu hari?

Aku enda tentu ulih meratika mua iya enggau terang. Tang iya ke dipeda aku bendar nya semua gari ke diredaika iya nya burak ngelebus memagang.

Aku pan lalu nguji ngampir ibu nya laban bisi ati deka nemu sapa iya nya ke bendar lalu deka nemu nama gaga iya tak ngeredai gari dia maya malam hari. ‘Bu...’ aku berengkah ngepunka randau.

‘Ya?’ ku iya nyaut tang mimit nadai mih iya malik ngagai aku. Maya ke berengkah berandau nya mih aku tesiumka bau rengut masuk ke dalam lubang idung aku. Aku enda nemu bau nya datai ari ibu nya tauka ari gari ke dibasuh sereta diredaika iya.

Enda nemu nama kebuah, aku pan nyau gegetar baka orang ke dadam. Bisi bediri mimit ga bulu pegu aku. Tang aku ngemeranika diri. ‘Baju ke dibasu ibu ...’

Iya pan lalu mutarka tubuh iya ngagai aku. Peda aku mata iya burak bebetau, beresi sereta pereching. Enti bisi anak mata chelum iya enda mih dipeda laban tenggelam ketegal mata burak iya nya.

Aku lalu nyambungka tanya aku nya tadi. ‘Kati ... katika baju tu tak burak datai ke baka tu?’

Iya lalu enda mukai-mukai lalu engkakah ketawa. Ba penemu aku nadai ga jaku aku nya tak tau ngasuh iya ketawa. Nyawa iya lalu bemunyi betangkan-tangkan baka ke ngujika pemerani aku.

Iya lalu majak ngansak semak-sesemak ngagai aku. Bau rengut nyau majak ga tama ke dalam lubang idung aku. Nyau asai ke deka mutah. Aku nyau berasai enda nyamai tang deka mindah tak berasai berat. Enda mukai-mukai ibu nya lalu nyaut aku. Sampai ke sehari tu aku endang semampai ingatka saut ibu nya. 

Ku iya, ‘Nya mih pengelebih FAB!’