Lenyau

Tiga bulan udah aki seduai ini iya pulai ka tisi langit, alai Mujong lalu mai nembiak iya pegi. Kebuah alai pegi laban deka matau menua lalu ngiga pengeraja, ngiga tajau ngiga pulau. Pengelama sida pegi semaya tiga bulan. Enti  udah bisi utai ulih, enti apin bisi utai ulih lama mega agi ari nya. Nadai tentu letak semaya ga sida ke pegi nya tadi. Lebuh pegi nya semua lelaki sida serumah enggau nurun memagang, laban nadai kala meda menua bukai.

Nyadi sida ti pegi nya belayar ngena sebuah bandung sida Mujong ti digaga aki Antu Raya iya menya lalu bandung nya benama Burong Undan.

Sekumbang laki sida ke nurun pegi, semua bini sida iya ke tinggal di rumah magang lalu ngintu ruang bilik diri empu. Tujuh hari orang udah nurun pegi dia dih bini Mujong hari nya bisi nurun mandi, tang seninjik ga iya ke mandi lebuh nya nadai orang sereta. Lebuh iya berunsut ngena kerupak pau dia iya teingatka tinchin ba tunjuk. Iya lalu muka tinchin nya ari tunjuk jari iya, laban takutka iya labuh ke ai. Tinchin nya tadi lalu dipanggaika iya ba atas batu ari ulu ai iya ke mandi. Udah iya tembu berunsut alai iya lalu nyepuhka diri lalu nyemerai enda lama. Angkat dih tinggal iya nyemerai nya tadi lalu datai ikan juak siku lalu nyuap tinchin ke dipanggaika iya ba atas batu nya tadi.

Lalu lenyau mih tinchin pengajih nya ditelan ikan juak. Juak nya tadi lama bendar enggai tentu mindah selalu bemain segau-segau nyemerai semak nya dia, ngibun iya ke mandi. Kejang iya deka pulai nya baru iya ingatka tinchin ke dipanggaika iya ba atas batu. Mansang iya kia deka ngambi meda tinchin nya tak nadai agi atas batu. Lama iya ngiga, tang lalu nadai ga temu. Giga iya sebelah-belah nya dia, tilik iya dalam ai, sagam iya baruh batang, baruh batu, lalu nadai ga temu. Ati iya nyau bisi nyangkaka tinchin nya udah ditelan ikan juak ke seruran segau-segau nyemerai semak nya dia. Ati iya pan nyau mansang kesal ga, kesal betatika tinchin nya tak lenyau ngapa nadai kebuah-buah.

“Naka mih aku tak lenyau tinchin nya,” ku iya bejaku kediri, “Nadai mih penyadi aku tu agi ila. Tinchin aku nya ga udah lenyau.”  

Lalu pulai mih bini Mujong nya tadi ke rumah. Iya ke pulai nya endang mai ati tusah. Tusah  ngenang tinchin iya udah lenyau. Iya lalu nadai madah ngagai orang bukai, enda becheritaka diri udah lenyau tinchin nya. Nya alai nadai ga mih orang bukai nemu iya bisi lenyau utai. Enda nemu baka enti iya tak bisi madah, nyangka bisi ga kini chara orang bukai berunding nulung ngiga, tang iya ga tak enda madah, tak nat ka diri nadai bemunyi.

Nyau dua tiga hari udah nya gamal iya pan mansang tusah-setusah. Orang ngelala iya bisi utai ngasuh tusah, tang enda nemu nama kebuah. Iya nyau lembau makai. Tubuh iya pan nyau mansang berupai kurus. Semua utai ke ditupi iya nadai tentu ditengkani iya agi. Babi enggau manuk pama mimit laban sida tau ngair, tau nyungkur kediri empu, tang tudah mayau seduai ukui ke lebih agi merinsa. Suah bendar sida nadai buya leka asi datai ke empat lima hari. Ukui seduai mayau pan nyau sama kurus semina kulit ngelamun tulang ke agi tinggal.

Nyadi ukui seduai mayau nya endang bai Antu Raya ari tisi langit nyin menya. Seduai sama-sama meretika jaku mensia. Seduai pan sama landik bendar bejaku ngena jaku pangan diri. Seduai sama nemu tinchin bini Mujong udah lenyau.  Nyau kepuas seduai ke udah natka diri merinsa, seduai pan lalu mutuska runding diri.  “Diau ditu pan tua mati ga, nya alai manah tua ngiga tinchin nya ngagai rumah Sultan Melayu,” ku seduai berandau enggau pangan diri.

Nitihka berita dinga seduai bisi orang madahka ikan juak ti nelan tinchin nya udah rari ngagai menua bukai. Lebuh iya mansa menua Sultan Melayu dia iya ulih orang ke berikan lalu dibeli Sultan Melayu laban iya meda ikan nya nyelai bendar gamal. Nadai kala orang di menua nya bulih ikan bansa nya. Leboh kuli Sultan meruti perut ikan nya dia iya lalu tetemuka sebentuk tinchin  dalam perut ikan. Seninjik bendar ga lebuh nya bini Sultan bisi bediri dia ngemataka kuli iya mela ikan. 

Bini Sultan lalu mai tinchin nya ngagai laki iya. Udah nya lalu ditaruh Sultan  Melayu teguh-teguh sereta lalu dikunchi dalam peti kayu menyirih, endang gaga tukang ke pandai dalam menua nya. Peti nya endang diengkah ba bilik siti ke ngimbai alai Sultan Melayu nya tinduk. Enti malam hari tinchin nya dipeda liau-liau baka bara api. Enti siang hari nadai ga gamal iya tak baka batu bukai. Bilik nya tadi endang dijaga orang mata-mata tubuh tiga enda kala lina. Bilik nya diintu bala soldadu dua puluh satu iku enda kala lepa begilir ngemata.

Tiga hari udah nya, alai mayau seduai ukui lalu mupuk ga bejalai. Lama bendar seduai iya bejalai baru datai ba nengeri Sultan Melayu. Seduai ke mansang nya tadi, suah tama dalam bandung orang ti bedagang ngagai nengeri sebengkah-sebengkah, lalu nepan dia. Suah mega seduai iya bedarat, lalu nengah kampung enggau rumah orang ba menua ke diteresa seduai mansang. Suah bendar tudah ukui niki rumah orang lalu dipalu orang leboh iya ngeranau periuk asi orang ngiga utai diempa. Lebuh seduai datai di nengeri Sultan Melayu, malam nya mayau lalu bulih pulut panggang siti ari rumah laut. Nyadi tudah ukui tak nyau abis malui tubuh, abis mega belakang dipalu orang malam nya laban iya enda bejimat lebuh niki rumah orang ngeranau periuk asi.

Nyadi enggi mayau, pulut panggang ke ulih iya nya tadi enda diempa, tang diengkah iya ba semak mua lubang ba pun kayu sepun. Iya empu pan lalu ngipa dia. Lebuh nyau deka dini hari datai tikus labang siku lalu makai pulut panggang. Mayau lalu merejuk nerekam tikus labang nya tadi.

“Anang munuh aku ! Anang munuh aku,” pia ku Tikus enggau sabak-sabak. 

“Bunuh ! Nuan sigi endang pemakai aku !” ku Mayau.  

“Anang !” ku Tikus, “Tulung mih aku tu minta kasih.”  

“Enti nuan deka nulung aku, enda mih aku munuh nuan,” pia ku Mayau.  

“Barang iya mih,” ku Tikus, “lagi aku nulung nuan. Nama pengawa diasuh nuan kereja aku ?” tanya Tikus.  

“Aku ngasuh nuan ngambi tinchin ba dalam burit peti Sultan Melayu,” ku Mayau nganu tikus nya.  

“Au mih,” ku Tikus. “Tang nuan sama engggau aku tama ke bilik. Din nuan duduk di atas peti, lalu aku ngulihka tinchin,” pia ku Tikus nyaut Mayau.

Mansang mih Tikus seduai Mayau ngagai rumah Sultan Melayu. Seduai datai di kaki tangga hari pan nyau tekerebak tawas. Kuli Sultan Melayu pan lalu angkat ga menyadika api kena manduk ai angat. 

“Anang guai tua ngambi tinchin nya malam tu,” pia ku Mayau. “Tengah malam pagila baru tua niki rumah Sultan Melayu baru.” 

Nyadi sehari-hari nya tadi, Mayau lalu begulai enggau Tikus dalam lubang ba pun punggu sekayu. Lubang nya umbas bendar alai seduai begulai. Dia mih seduai iya begulai enda ngachau pangan diri, laban endang udah semaya enda tau ngayahka pangan. Suah ga liur Mayau beentali nitik tetenguk meda Tikus, tang enda ga berani ngachau pangan. Tikus pan nunduk bendar ga ke Mayau sehari-hari nya.

Lebuh malam nyau lama udah tegayam petang, utai pan nadai ga agi engkeretik, Mayau lalu mai Tikus mupuk ga bejalai baru ngagai rumah Sultan Melayu. Lalu pansut mih seduai iya ari lubang nya, lalu bejalai mih seduai begadai-gadai betunda-udi. Tikus dulu, Mayau lalu nunda udi iya. Lebuh jam kira maya tengah malam seduai pan lalu niki napatka peti alai Sultan Melayu nyimpan tinchin bini Mujong. Mayau lalu nuduk kediri atas peti, Tikus lalu kerit-kerit ngerit peti nya enggau ngeli iya. Nyau kelama udah nya lalu tedani dih Sultan Melayu ninga utai tak kerit-kerit.

“Aie, ado tikus bebunyi kerit-kerit sio ko,” ku Sultan Melayu.  

“Miau-miau !”  pia ku Mayau.  

“Eh, apo ado pusa juak bunyi sio,” ku Sultan Melayu bejaku baru. “Kelat raso mato tu, tidor baru lah kito tok.” ku iya.  Nama lalu tindok baru ga mih Sultan nya tadi.

Tikus pan lalu mupuk baru ga nebuk peti. Peti pan nyau deka kebus, alai Sultan Melayu pan lalu dani kenyap, lalu ninga tikus nya agi kerus-kerus. 

“Gilo juak tikus iyo. Apo endak barang dimakan nyo sio,” ku Sultan.

Ninga Sultan udah tedani, Mayau lalu bemunyi baru ga. Tikus lalu ngetu ga ngerit peti. Ninga Mayau bisi bemunyi, Sultan Melayu lalu tinduk baru. Enda lama udah nya peti pan kebus. Tikus lalu manggum tinchin lalu bai iya pansut. Mayau lalu merejuk munyi ke ngagai Tikus. Iya lalu pansut nitihka Tikus. Seduai tak enda kakang lalu terejun ke tanah. Datai di tanah nya baru Tikus meri tinchin nya ngagai Mayau.  

Nyadi Ukui semalam-malam nya nadai tinduk selalu betikika rumah orang ngiga utai diempa. Nya mih, ukui enda lama dinga meraung, enda lama dinga engkaing dipalu orang, laban iya nyengkuran dapur Laut. Tawas hari nya baru Ukui seduai Mayau betemu enggau pangan diri.

“Oh Unggal !” ku Mayau nanya Ukui. “Nama utai ulih nuan semalam tu ?”

“Ess, nama utai ulih, belakang aku tu abis malui dipalu Laut,” ku iya. 

“Kati ko alai orang bangat ngasar nya enggau nuan ?” Kada enda nuan ngeruga dapur orang dih, unggal ?" ku Mayau nanya iya. 

“Nya udah tentu,” ku iya. “Ni nya ulih tatka perut aku ga lapar asai ke dikerebuk,” ku Ukui. 

“Nya amat,” pia ku Mayau, “tang kitai idup tu ukai tau nadai akal ga dih, nya nuan nadai nemu belalai. Laut badu enda deka mih sida malu nuan, nuan ga ngeruga dapur sida,” pia ku Mayau. 

Tudah Ukui nyau nadai saut agi, peda ai mata iya ngerenjing bekerenjui beteritik, perut nyau genting kelalu lapar. 

“Tinchin udah ulih aku,” ku Mayau. “Pagila tua mupuk mulaika diri. Malam tu tua makai kenyang-kenyang ditu, enggaika enda dapat bejalai.” 

“Barang ku nuan mih,” ku Ukui. “Tambah ga aku enti sehari tu tua angkat, tentu enda dapat bejalai. Ni nyadi utai bangat ngelapar tu,” ku iya.

Nyadi malam nya sama begiga ga seduai. Mayau niki rumah Laut lalu nabanka tekang asi. Ukui seninjik bendar iya malam nya, tetemuka rumah dapur China kebun enda ingat tambit, bekau apai tuai China nya siku sakit chirit pedis perut malam nya. Tama mih Ukui lalu nemu ikan tenggiri siku udah dipanggang segala tak lalu ditabanka iya. Mayau udah iya makai asi, lalu natka diri gali ba selepak bandir kayu. Ukui pan ngalika diri ba baruh rumah Laut, nganti hari tawas.

Sereta tawas hari Ukui pan lalu datai ga ngagai Mayau ke nganti iya ba pun kayu. 

“Kati baka semalam tu dih unggal ?” pia ku Mayau. 

“Ng, pama ga agi, enda ga perut aku asai ke sehari kemari,” ku Ukui. 

“Enti munyi nya mupuk mih tua mulaika diri sehari tu,” ku Mayau.  

“Aram mupuk mih. Lalu  kati ku tinchin, sapa  bagi tua tu mai lagi ?” ku tanya Ukui. 

“Nya bai aku, ni nuan tau mai iya,” pia ku Mayau. 

“Lak ka aku mai,” ku Ukui. “Nuan enda tentu nemu nyemerai.” 

“Barang iya mih,” ku Mayau. “Tang nuan anang enda bejimat.”

“Anang irau,” ku Ukui. “Aku enda kala cherida enggau utai.”

Mayau lalu nyurungka tinchin nya ngagai Ukui. Seduai pan lalu mupuk. Tiga hari seduai udah bejalai alai endur seduai pan datai ba batang ai siti. Enda kakang alai seduai lalu terejun ke batang ai nya lalu nyemerai. Sekumbang seduai nyemberai di puak ai, ribut pan lalu bepuput deras agi, dia alai umbak ai pan mansang balat sebalat. Mayau seninjik bendar bisi tetemuka papung batang, iya lalu belatuh ba batang kayu nya.

Ukui nyau kapul-kapul sereta  kelah-kelah laban nyau deka lemas. Nyawa  iya nyau rangap-rangap, dilah nyau melulur. Enda lama sedekan, enda lama sedekan ga iya. Iya pan baru ngelui puak ai, alai tinchin lalu labuh ari nyawa iya. 

Lebuh seduai sama udah sangkai di tebing, Mayau lalu nanya Ukui. “Ni tinchin enda lenyau laban nuan ?” ku iya. 

“Akai-rai,” ku Ukui. “Nyau ka lemas aku laban umbak ai nya tadi, tak enda berasai, tinchin lalu labuh ari nyawa aku.” 

“Ah dih, nya ga baka nuan. Nya mih alai aku ke enda ngasuh nuan mai tinchin nya, tang nuan ga keras. Tu baru tua mati, pulai pan nadai ga guna. Manah agi tua nikal ngagai rumah orang ti enda jauh ari tu,” ku Mayau.

Ukui pan lalu enda berani bejaku laban iya takutka Mayau nganu, tang ai mata iya ngenjing bekerenjui labuh laban tusah ati.  Udah nya seduai lalu mupuk ngagai rumah orang semak nya dia. Malam nya seduai begigaka utai diempa. Ukui pan suah bendar dipalu orang lebuh iya nyengkuran dapur.

Nyadi Mayau bisi tetemuka rumah dapur orang enda ingat tambit ari mua senyawan. Iya  lalu tama rumah orang nya, lalu ngebakka pintu jemari lauk. Dalam jemari nya, iya nemu ikan duai siku ke udah mansau diguring. Ikan nya tadi lalu ditabanka iya, lalu diengkah iya ba tisau pasir. Iya empu lalu ningkapka diri ba tisau pasir ke udah dikeruang iya. Enda lama udah nya peda iya datai Anak Baya Labang siku, lalu makai ikan duai nya tadi.

Mayau lalu merejuk deka nerekam Anak Baya Labang ba pun pegu iya.

“Udah nuan ulih aku !” ku Mayau. 

“Anang munuh aku !” ku anak Baya Labang nya. 

“Kati ku aku enda munuh !” ku Mayau. “Laban nuan ngambi bekal aku.” 

“Anang munuh aku, minta kasih,” ku anak Baya. 

“Enti nuan deka diasuh aku, enda mih aku munuh nuan,” pia ku Mayau. 

“Au mih,” ku Baya. “Nama pengawa diasuh nuan dikereja aku dih ? Deka aku ngereja, amat ga nuan enda nyadi munuh aku.” 

“Aku ngasuh nuan nyelam tinchin aku ke udah labuh enda jauh iga ari puak ai ba kaki lubuk di ulu dia,” pia ku Mayau. 

“Nama kebuah aku enggai,” pia ku Anak Baya Labang nya. “Aram padah ke aku senentang iya nya labuh. Lagi  mih aku nyelam.”

Udah nya Anak Baya Labang lalu terjun nyelam.  Nyau puas ba dalam ai baru iya tetemuka tinchin nya ba senentang puak ai ari ili kaki lubuk. Lebuh iya udah pansut ari ai, iya lalu nyuaka tinchin nya ngagai Mayau. Gaga bendar mih ati tudah Mayau meda tinchin nya udah temu. 

“Terima kasih unggal Baya,” ku Mayau.

“Au mih terima kasih ga ngagai nuan udah enda nyadi munuh aku,” ku Anak Baya Labang.

Lebuh hari nyau tawas nya baru Mayau seduai Ukui betemu baru. Mayau lalu madah ngagai Ukui, madahka tinchinh nya udah temu. Naka pengaga mih ati tudah Ukui meda tinchin nya udah ditemu. 

“Aram mih mupuk tua,” ku Mayau, “tinchin awakka aku mai.” 

“Eh,” ku Ukui, “anang nuan mai tinchin. Aku baru tau mai. Aku kering agi ari nuan.” 

“Barang iya mih,” ku Mayau, “tang jimat-jimatka nuan enggaika tinchin nya lenyau baru laban nuan.” 

“Anang tusah,” pia ku Ukui. “Tua nadai nyemerai ai besai agi.”

“Nya amat,” pia ku Mayau, “tang enggaika nuan mai iya teberayan ba sebelah babas.”

Mayau pan lalu nyuaka tinchin nya ngagai Ukui. Seduai lalu mupuk ga bejalai baru. Nyau ketiga hari seduai udah bejalai lalu datai ba kampung siti. Babas  dalam kampung nya tawas bendar tang kayu mayuh bendar besai, lalu jelu endang sigi mayuh diau dia. Lebuh seduai datai ba tengah-tengah kampung, tak enda mukai-mukai lalu belanda mih jelu kijang siku mansa mua seduai. Ukui pan lalu merejuk sereta nyalak. Iya lalu belanda nitihka kijang nya tadi. Dia mih kijang seduai Ukui belanda bebelit ba sebelah-belah bukit. Nyau lama Ukui nya pan lelak ga lalu enda tetitihka kijang nya agi. Lebuh iya udah badu nyalak nya baru iya ingat, lalu nemu tinchin nadai agi dalam nyawa iya. Ati iya tusah bendar laban enda nemu dini alai tinchin nya teberayan.

Udah nya iya mulaika diri ngagai batang jalai raya lalu nemu Mayau duduk di tisi jalai nganti pemulai iya ke nyalak kijang. 

“Bah, kati alai nuan tak gendai-gendai pulai, ni kijang ulih nuan nyalak dih ?” pia ku Mayau. 

“Akai-rai, lelak bendar aku nyalak, nadai endar nasit tua, suah bendar semak, deka ditangkap tak seruran rapas berari. Nyau kelama, aku lalu tinggal laban iya, naka iya ga pemesai, nya ga pengemu kijang nya tadi,” ku Ukui. 

“Gemu magang mih semua jelu dalam babas ditu, dini orang bisi kurus baka tua. Aram mih mupuk tua, anang ngerindang diri agi,” pia ku Mayau. 

“Anang guai,” pia ku Ukui. “Tinchin udah lenyau, enda nemu dini alai iya teberayan, labuh ari nyawa aku lebuh aku nyalak tadi.” 

“Nya mih baka nuan, nadai pendiau-diau bendar barang utai salak. Tu baru tua amai mati sekali tu,” pia ku Mayau.

Seduai pan lalu berengkah ngiga tinchin, nyau kelama-lama nya baru Mayau tetemuka tincin, tang iya enda madah ngagai Ukui.

“Aram tua pulai, manah agi tua mati di rumah ari mati dalam babas tu,” pia ku Mayau. Ati iya udah lantang, tang mua iya digaga iya baka ke mua tusah. 

Tudah Ukui semadi bendar iya pulai, lalu mua iya ngenjing jempuk laban ai mata, laban iya ngadang diri tentu mati. Lalu bejalai mih Mayau seduai Ukui ari endur nya.

Tiga hari baru seduai iya datai di menua diri empu. Lebuh seduai datai di rumah hari pan nyau malam. Ukui lalu tinduk di ruai, tang Mayau tama ke bilik lalu nyimpan tinchin nya dalam sarang beras.

Lebuh bini Mujong angkat deka berapi pagi nya iya lalu ngebakka sarang beras, lalu tepedaka tinchin nya bisi dalam nyin. Iya pan lalu alit bendar ati, meda tinchin nya udah pulai baru, tang iya enda nemu baka ni ku jalai iya tau pulai ari orang ke udah naruh iya. Nya alai laban ati iya udah bisi lantang pagi nya dia iya berapi lalu nyangkung Mayau seduai Ukui. Baka nya ga babi enggau manuk lalu sama ditengkani iya magang. Ukui balat bendar majakka diri makai, laban iya bangat lapar, tang iya enda nemu kati alai bini Mujong deka meri sida makai pagi nya, laban iya enda nemu tinchin nya udah ditemu baru.

Nyau kelama udah nya, baru Mayau madah ngagai Ukui, madahka tinchin udah temu baru. Iya madahka tinchin ti udah lenyau dalam kampung udah temu, lalu dibai iya pulai lalu disimpan dalam sarang beras.

Udah nya baru Ukui nemu diri alah bendar pemintar laban Mayau. “Oh  punggal ! Amat pintar mih nuan berundingka utai, enti enda laban penemu nuan tentu tua mati,” ku Ukui. 

“Ukai nama agi,” pia ku Mayau. “Kitai ngereja utai enda tau enda ari runding magang-magang, indah kitai deka mati berunding dih pengawa kitai tau saru. Nya enggi nuan lebuh tua ke di kampung Laut seleka asi nuan enda bulih. Nya ga baka belakang nuan agi bedau malui bekau kena palu orang. Dini dih bisi akal ti baka nya,” pia ku Mayau nganu Ukui.

Kenyau ari nya semua babi, manuk enggau semua utai tupi bukai sama lantang magang, laban sida nadai kala lapar agi. Iya pan nyau chukup tiga bulan, sida Mujong pan pulai ga belayar, pulai pegi ari menua tasik. Lebuh pegi nya sida bulih bendar pengeraja, reta, menua pan mayuh ga ditengah sida. Tiga hari sida Mujong udah datai di rumah nya baru bini iya nusi penusah diri di rumah pasal tinchin iya ke lenyau. Iya lalu nusi tinchin nya apin lama udah pulai, ditemu iya dalam sarang beras.  (Dibali ari ensera Kumang Betelu)