Pengawas aku suba

MAYA JIMBAU kala nyadi pengawas kami suba, iya kala ngasuh kami bediri ba atas kerusi sepanjai hari. Lebuh aku nyebut “kami”, reti nya aku nya seraban ari nembiak manchal dalam kelas, raban ke selalu nyetik utai ngagai burit Pengajar Renya. Begaut iya mutar ke belakang lalu deka nemu ari ni penatai batu nya. Nadai siku nyaut. Sengian baka ba kampung dalam nadai didinga ensung nyumbuh bujang. Meda baka nya iya lalu ngasuh pengawas ke seiku-iku ba kelas kami nya mutarka penyalah nya. Nama dih lalu diasuh iya kami semua bediri.

Aku ke bendar tesangkut ba kelas ke nadai menyana; ukai aku rindu ngaga utai ke enda menuku baka nya. Nadai ku enggau mih, asi udah nyadi bubur.

Maya jam ngetu pukul 10 nya, Jimbau lalu datai betemu enggau aku. ‘Aku nemu nuan enda enggau orang ngereja nya tadi,’ pia ku iya.

‘Bah. Kapa nuan ngasuh kami bediri sama baka orang bukai dih?’

‘Ukai pia, enti aku enda baka nya tentu nuan udah kena buli sida lagi.’

Iya merening terus mata aku, udah nya nunjukka mua baka dinding.

Nyau beberapa taun udah nya aku tak enda mukai-mukai betemu enggau iya ba kelab golf. Udah lama kami duai nadai kala betemu agi kenyau ari kami ke badu sekula. Iya nadai facebook. Nyau bejam-jam kami duai dia berandauka pekara maya kami duai di sekula menya sambil mandangka gambar diri sebilik kami duai. Puas ke berandau iya lalu mai aku ngaga bisnis.

Jimbau ti bekereja enggau anak kompeni perintah lalu diperatika aku endang baka orang ke mayuh duit; iya tu agi ba sekula suba endang bisi gaya tau nyadi tuai tauka kepala orang. Aku empu bisi studio nyeruri video korporat lalu tegal nya iya mai aku ngaga video korporat baru kompeni iya.

‘Aku begunaka kabel enti aku nyadi mai nuan, taja pia nama guna pangan sekula lama ney?’ ku iya.

Aku gagit gila. Aku besemaya enda muntanka pengawa nya. ‘Anang irau nuan Jimbau.’

Bedau lama sebedau kontrek nya dikemendarka, Jimbau lalu mai aku betemu baru ba sebuah restoran. Maya aku betemu enggau iya diperati aku mua iya bisi baka orang ke enda tentu lantang ati.

‘Enti aku enda bulih pan enda ngawa,’ ku aku nguji meragam ati iya.

‘Enda, sigi nuan deka bulih nya.’

‘Manah mih nya enti pia!’

‘Tang ... baka tu aja chara. Aku meri nuan duit agih RM 150,000.00. Tang nuan mesti meri aku invois RM300,000.00.’

Lebuh iya ke mansutka jaku nya, mimit pan nadai mih iya merening ngagai aku.