Tang orang ke chukup pedis ati meda lori eksiden nya nadai ngatas orang ke
benama Budin. Endang ngalitka ati enti sema bisi orang muras lebuh meda lori eksiden.
Tau ditulis dalam leman berita surat kabar. Engka tudah Budin tu udah gila,
udah cracko ku orang kemaya hari tu kini, udah sut. Enti nunda, patut agi iya
berasai sinu ngagai deriba tauka orang ke empu lori nya. Eksiden baka nya enti
enda manah nasit tau mai nyawa. Tauke lori tau rugi ketegal lori iya nyau
rusak, amat mih bisi insuran. Ukai nya lalu nyadi kemaya nya enti udah dianjung
ngagai woksyop.
Tang enti sema lori nya enda eksiden nyangka tudah Budin enda ga nemu utai
ke nyadi. Enti enda ketegal lori nya nyampau mih iya nemu. Diatu semua utai udah
pansut, pechah baka nanah pisa. Tekebus baka abus ke enda ulih ditungkus agi,
nyau bebau baka riam ke udah disalam. Ketegal lori nya juluk ati tudah tuai
jelungan nyau puntan baka menasan jalai jelu, labah baka buah merunjau ulu. Ati
iya luluh asai ke disepuh ba bara api.
“Bah, kati baka tu tuan, enda enggau orang masuk tender kini kitai, tuan?”
tanya Umang sepengudah iya ke pulai ninga jaku penerang ba Jabatan Tenaga Belia
pagi nya.
“Ni tau enda aa. Tu mih peluang kita. Enti kitai enda mujur, ila enggau
nuan-nuan nya asuh aku badu gawa. Dini alai aku ngiga duit kena aku mayar gaji
nuan?” pia ku saut Budin.
Nyau peli-peli mata tudah Umang ninga jaku Budin nya. Enti baka nya iya
patut berengkah berunding ngiga kereja ba palan bukai. Nama mih penyadi enti Budin
ngamatka jaku iya nya. Pia ku ati iya din. Umang nya endang pekereja ke
dikarapka Budin ngelama tu. Sikar amat iya ngaga kereja. Semua pengawa enda
kala betangguh, enda kala beila-ila.
“Anang mih nuan lalu sinu ati. Kitai tu bedau temu mujur tauka enda. Uji nuan
ngiga Jabing enggau Timong. Berandau enggau seduai manah-manah. Nuan ga udah
ninga jaku taklimat lalu nemu spesifikasyen ke patut dititih sereta digaga.”
“Au mih tuan. Mupuk dulu aku!”
“Kati mayuh orang datai ninga taklimat nya tadi?” bedau sempat keluar Umang.
Agi deka ninga berita enggau silik mih Budin nya. Sigi baka iya enda kala puas
ti berandau pasal pengawa ti enggau Umang.
“Umbas iya ga. Nyampau ga. Tiga puluh buah kompeni bisi enggau enti nitihka lis ke disadung sida ngagai kami tadi,” ku saut Umang.
“Mayuh nya enti pia. Balat bekempit kitai tu ila. Nya alai kitai patut
bebendar ngaga enggau betul ngichakka mujur. Ukai baru sekali tu kitai enggau
sereta bulih tender. Nya mih kebuah kitai patut bisi pengarap ba diri empu,”
pia ku Budin. Nyau munyi orang ke meri licha. Sebedau enggau orang nyadi
kontraktor, Budin endang siku ari penglicha ba Unimas ba bidang ekonomi.
Ngemaduka diri laban deka nguji bedagang enggau orang. Deka ngeruhka ai kenu ku
iya. Nambahka penyampau bala Iban dalam pengawa dagang. Semadi ngemujurka sulu
jaku perintah Satu Malaysia, semua rayat enda milih bansa bisi peluang.
“ Orang berebut deka masuk laban enda mayuh tender dikeluarka taun tu enda
baka taun-taun ti udah. Maya taklimat tadi sida madah mina projek ke berat
sereta besai aja dikeluarka tender ari perintah. Taun tu ku sida taun alai
perintah bekelimatka belanja,” pia ku Umang nerangka enggau lenak agi ngagai Budin.
“Nya nemu aku. Gaga aja pengawa ke diasuh aku. Lagi nemu mih aku nama utai
ke patut digaga,” pia ku saut Mr. Budin seraya ke tuchum lelegup lebuh meratik
mua Umang.
Meda Budin nyau tuchum lelegup, nyau berasai geremai asai tungkul atau
tudah Umang. Kati enda pia, tuchum nya tuchum orang baru parai bini. Tentu nya
ngembuan reti ti dalam.
Hari siti Umang mantaika asil pengawa Jabing enggau Timong ngagai Budin. Budin
chukup puas ati meda pengawa seduai. Enda rugi iya ngaji sida gawa enggau iya
ku jaku dalam ati iya.
“Baka tu mih ke kedekaka aku. Kreatif sereta naritka ati. Enti ari sukut
rega engka kitai tau masuk ngena rega murah laban kitai empu ke nyelak barang
tu ila. Orang bukai enda ulih ngelaban kitai laban sida semina ngaga design aja
tang pengawa nyelak nya digaga ba endur bukai,” ku Budin bejaku ngagai sida
tiga enggau penuh pengarap. Budin tu endang orang ke ukai pandak runding,
pandak perening. Iya enda mudah putus pengarap baka tubu ke enda mudah pang
apin dipanduk, baka kepayang ke enda mudah pang dalam periuk.
Budin ngalih-ngalihka bag keretas ke mesai 20¨ X 20¨ enggau asai ati ke
chukup temegah. Enti baka tu gaya sida
tentu bisi jalai mih bulih tender nya. Iya benung berundingka penyampau untung
ke ulih ari projek nya. Enti rega bag seringgit siti abis mimit untung sida nya
kira-kira RM 100,000.00 enti sema orang mesan 100,000 iti bag keretas nya. Bag
nya ila deka disadung ngagai semua palan pematih nembiak bansa ke benung
ngaturka kus tiga bulan ba kem-kem serata menua Malaysia.
Lebuh ke ngenangka kem-kem tu tudah Budin tak tuchum kediri baka ke bisi
orang ngeluji. Ukai nama, menyadi iya nemu agi pasal kem-kem latih tu. Seninjik
bendar bisi menyadi iya gawa ba Jabatan Tenaga Belia lalu pengawa iya nya bekaul
enggau meresa siti kem ngagai siti kem.
Peneleba ari ke meresa kem nya menyadi iya bisi nemu mimit senentang gaya siti-siti kem ngatur kus. Nitihka perati iya bisi sekeda
kem nya dipilih belalauka kroni. Belalauka orang ke bisi kaban, bisi kuasa
milih. Kiraka ngembuan kabel besai mih sida tu. Sekeda nya bisi mega pemesai
nya empu ari opis TB ke ngaga kem ngambika bisi disua.
“Aku ukai enda nemu. Ukai semua orang ngembuan ati lurus lebuh ke ngereja
pengawa. Semua deka ke untung lebih, untung besai. Lauk ke dinah enda kala chukup.
Ikan ke dibeli ari pasar borong disimpan terus dalam peti ais nganti beberapa
hari baru dipanduk. Nembiak ke belatih dia dini sida nemu utai ke nyadi. Sida semina
makai barang utai ke diberi orang kem mih sida,” pia ku tusui adi Budin.
Utai ke disebut iya enda nyengkaum kem ti dijaga enggau manah. Iya ke
disebut iya nya sekeda kem ke enda nitihka atur ti betul. Endang bisi kem ke
enda nitihka prosedur ke udah dipadahka perintah. Sida tu nyangka deka
ngelimatka belanja tauka endang bansa ke enda berapa. Bisi parit nya nyau kena
empang reba, ai tepagang. Lebuh hari malam enti tinduk enti enda bekelambu sigi
bisi ngasaika diri diempa nyamuk. Tau besedia meri darah ngagai nyamuk.
“Udah mih nya. Nuan tu bejaku pasal utai ke jai aja. Mayuh kem bukai ti
dijaga enggau manah. Lapa enda nuan nyerita ngagai aku dih?” pia ku Budin nganu
menyadi iya. Enti ditejuka tentu menyadi iya majak mantaika mayuh macham cherita
pasal kem ke diperesa iya. Enggai badu-badu ga tudah menyadi iya mantaika
penyai kem ke diperesa iya. Nyau leju ninga. Nadai utai ke ngerinduka ati enti
seduai iya betemua mua. Suah amat cherita ke jai-jai ditusi menyadi iya nya.
Sigi baka mensia ga enti berita ke jai rindu ga orang ninga. Mayuh orang
deka ninga berita ke enda manah, berita ke negatif, berita ke selebebu ngapa.
Gosip ku orang kemaya ari tu. Tang berita ke ditusui adi Budin tu ukai gosip,
ukai berita selebebu ngapa tang berita amat.
“Ukai nama madi, aku ga begedi amat. Nyau bebulu ati aku lebuh ke nulis
check mayar sida nya. Sida tak ngaga utai ke enda manah. Deka untung aja tang
nadai ngira tanggung pengawa ngagai bansa enggau menua. Enti laun dibayar
jampat amat ga sida datai nyerang kitai ba opis. Merak orang peneka ati sida
aja,” pia ku tampung menyadi iya.
Udah sebulan nandan di langit, tender dianjung ke Budin tang lalu nadai
didinga auh. Enti nitihka taga jam endang udah seminggu limpas ari taga jam ke
asal. Belalauka notis bisi duapuluh buah kompeni bisi enggau masuk tender nya.
Ba notis semina mandangka rega tang
nadai mantaika nama kompeni ke enggau.
Budin ulih tuchum mimit laban kompeni iya endang ngeletakka rega ke
pengabis baruh. Kompeni ke bisi ngampir kompeni iya semina bebida limapuluh sen
aja ari enggi iya. Nya ney! Endang bisi peluang tu menang tender, ku Budin
bejaku dalam ati diri.
Pagi siti Budin mai pemerani diri nelefon opis TB. Orang ke nyaut telefon
nya madahka bedau bisi nama-nama pemutus berita senentang tender nya. Nitihka padah
pemesai ke nyaut telefon iya nya madahka mayuh orang enggau masuk tender nya.
Nya alai lama mimit mih awak dikena sida meresa sereta milih tender ke engkeman
nya.
“Sabal mih encik. Dah masuk tikas ke penudi dalam proses ngaduka tender tu.
Encik nganti mih dulu. Enti bisi jereki mujur mih dek encik!”
Hari beganti hari, minggu beganti minggu enda ga didinga berita senentang
tender nya. Budin nyau angat dalam nganti berita nya. Enti tak nuduh orang ke
gawa ba opis TB nya nadai kereja engka tak tau ngasuh sida gidan ngapa.
“Hello, aku minta ampun ngangau tuan tumu pagi tu. Nyadi aku deka nemu
kemaya pemutus berita pasal tender bag keretas nya pansut, tuan? Udah tiga
minggu laun ari semaya ke dipadah suba.”
“Sabal, encik, sabal mimit. Enda lama agi kami madah suh dek berita nya
enti udah diputuska. Encik enda ibuh agi dek nelefon kami udah tu. Buka
aja internet lalu lawa laman web kami
dia. Enti mujur, pansut mih nama kompeni encik dia.”
“Tang kemaya nya dih?” Nyau berasai ringat munyi jaku tudah Budin. Asai ke
nganti ai enda deras, nganti kijang dalam babas tudah Budin dikeduanka sida ba
opis nya.
“Apu, minta ampun encik. Baru aku ingat, boss aku madaeh iya bisi nanya
bisika encik nyebut penyampau pemeri kompeni kita ngagai tabung parti?”
“Duit ke tabung parti? Duit nama nya tuan? Nadai kala ninga,” ku saut Budin.
“Kemaya bisi atur baka nya. Nadai bisi macha syarat nya dalam atur tender
kita,” pia ku sambung Budin baru.
“Encik tu lurus amat. Kati dek enda faham. Tau reti mih mimit. Kami nulung
encik. Encik patut nulung kami ga.”
Budin lalu ngelengkaka gagang telefon nya. Nyau bepeluh kening iya. Nadai
nemu nama pengawa bukai deka digagaka iya maya nya. Lalu ngelapka peluh ke ba
kening iya nya. Ati iya berasai kesal di jungkal kandang kamai.
Dalam ati iya din bisi ga iya terundingka pekara ti enda manah. Berita ke
enda bulih. Enti baka ke dirunding ati iya nya abis mih peluang tudah tuai.
Maya nya mih nyau bemuaka bala sida Umang, Jabing, Timong enggau lima iku agi
pekereja iya ke bukai.
Lebuh maya pangan iya, Engkechong madahka tender nya udah kena orang bukai,
Budin mesai bulu mata enda arap ke berita nya. Ba runding iya engka Engkechong
tak salah dinga berita lalu nyangka iya nyebut tender pasal pengawa bukai.
“Akai dai, tak baru kemari aku berandau ba telefon nanyaka tender nya aa.
Ku sida enda lama da agi keluar mih berita pasal tender nya,” ku Budin nyakal
jaku pangan iya, Engkechong.
“Bag keretas nya udah ga dichelak. Kilah ensanus bisi ga aku ke kilang chelak
tauke Ah Bu ke nyelak majalah aku ngelama tu. Aku ke kia ukai nama laban
pengawa ke dipesanka aku nya lalu enda tetembu ga digaga sida. Lebuh aku ke kia
baru aku nemu iya nya kiruh nyelak bag keretas dulu. Dini majalah aku deka ulih tembu dichelak,” pia ku terang
Engkechong.
“Anang main-main nuan Engkechong aa. Amat nya kini? Anang-anang tender opis menteri
bukai ke ku nuan nya. Tak bedau lama udah kol sida pegawai ba opis TB aku tu.”
Agi ga Budin nguji nirika ubung basah, nudukka mangkuk belah.
“Nya enda mih aku nemu. Tang ku tauke Ah Bu, bag keretas nya endang
diagihka dikena ba palan pematih nembiak.”
“Enti pia, enda ngawa ga. Manah mega nuan udah madah ngagai aku. Lakka aku
mansik pekara tu dulu. Enti nya amat ya, endang enda patut endar nya. Enti deka
meri tender ngagai kaban belayan, enda ibuh mih muka tender ngagai mensia
mayuh. Ngasuh asa ngapa kitai nganti.” Nyau mutap ga tudah Budin.
“Patut mih sehari nya bisi pegawai ba opis nya nanya berapa aku ulih meri
ngagai tabung parti. Ni lah aku mereti utai ku iya.” Budin bejaku baru. Agi
enda puas ati iya ninga berita ke dibai Engkechong nya.
“Enti nuan udah meri ngagai tabung parti nya tentu bala suku-juru iya ke
bukai nya pan minta ga ari nuan. Ti enda diberi tusah ga nuan ila,” ku saut
Engkechong.
Randau seduai iya ngetu naka nya aja baka ke nadai pengujung. Nadai
disimpulka seduai baka orang ke besaraka penemu dalam program radio. Tudah Budin
nyau lembau deka bejaku panjai.
Peluh iya nyau majak neritik ngemasahka tubuh iya. Mayuh amat puku duit ringgit, tulang enggau
jam udah abis dikena iya masuk tender nya. Nyau bekikis bulu betis, bebuai bulu
gundai mih tudah tuai. Abis akal dejal kira, nyau abis ukum aum daya dikena iya
deka ngemujurka diri ngambika tender. Bebelika barang tender nya siti hal. Nyau
datai RM2000.
Tumu-tumu pagi nya, Umang tama ke dalam bilik iya. Iya baru duduk ba kerusi
sambil macha deraf surat ke ditaip iya sehari kemari. Maya iya ke macha surat
nya bisi ga ati iya deka nanyaka berita ngagai tuai iya.
“Tuan, bisi nuan macha surat berita pagi tu? Bisi lori eksiden, tetungkup
ba lebuh raya,” ku Umang nguji nanya berita pagi ngagai Budin.
“Nuan tu tak nadai berita bukai ke deka ditanya. Cherita lori ke tetungkup
nya ga dipadahka nuan ngagai aku. Ni ai milo aku dih? Udah digaga nuan?” pia ku
Budin.
“Minta ampun tuan, enda lama da agi. Nganti ai mansau. Benung nanggar ai
aku ba pantri dia. Tang tuan, berita dalam surat berita pagi tu tak berat amat
bagi nuan tuan. Anang enda nuan macha iya.” Lalu bedau puas ati ga Umang deka
ngasuh tuan iya macha berita ba surat kabar pagi nya.
Nyau puas ke ninga Umang nya ituk ngasuh iya macha surat berita, Budin lalu
ngambi surat berita ke diengkah Umang ba atas mija iya.
“Bangkai!” Sumpah Budin.
Mata Budin baka gam ke lekat, meda bag keretas ke bisi logo Opis TB. Nyau
betemarung bag atas jalai raya. Amat mih berita ke dikenataika Engkechong
sehari nya ku ati iya din.
“Kitai ke gagau ngapa nganti berita tender nya. Nemu
nya udah tembu bag dichelak. Berita ke madah pemutus undi tender nya ba tikas
penudi semina main silap jaku aja nya,” gut-gut Budin bejaku dalam ati diri.
No comments:
Post a Comment