Pak Pandir enggau Kambin Iya

Sehari nya baka selama, Pak Pandir benung turun ke umai iya. Enda mukai-mukai benung iya kiruh ngereja umai iya, hari lalu berengkah petang. Lalu ngelegua angin mangka besereta enggau kilat manchar ari langit.

‘Baka ke deka ujan tu. Manah agi agi aku pulai,’ pia ku Pak Pandir sambil besikap deka ngemulaika diri ke rumah.

Ba rantau jalai hari pan belabuh ujan. Benung ke bejalai, enda mukai-mukai ga, Pak Pandir tepedeka siku kambin ba tisi babas. Kambin nya dipeda iya baka ke chelap. Meda baka nya, Pak Pandir berasai sinu ke kambin nya. Iya lalu mai kambing nya pulai.

Datai di rumah iya lalu ngidupka unggun api ngambika kambin nya enda chelap. Pagi siti, Pak Pandir lalu ngaga sebuah kandang alai kambin nya diau. Pak Pandir lalu meri kambing nya makai kantuk daun kayu ti diambi iya ari tebing kampung enda jauh ari rumah iya.

Pak Pandir nyaga kambing nya enggau pemanah. Kambin nya makin lama makin besai. Bisi sekali, Pak Pandir lalu mai kambin nya  ke umai.

‘Aku deka mai nuan nulung aku ngereja umai tu,’ pia ku Pak Pandir.

Pak Pandir pan narit kambing nya ke umai. Kambing nyau ngerinsa laban enggai dibai ngagai umai iya. 

 Pak Pandir pan lalu ringat. Iya lalu ngambi ranting kayu lalu malu kambin nya enggau penapat inat.

Nyau kepuas ke dipalu, nya baru kambin nya nurun ke umai. Kambin nya engkechit-engekchit lebuh kaki iya tekenaka ai laban umai Pak Pandir nya umai paya.

‘Lapa nuan malu kambin nuan nya?’ ku dia sida sepiak rumah iya.

‘Kambin kelalah, nya mih aku malu iya,’ ku saut Pak Pandir.

‘Kambin enda ulih bekereja ba umai paya nya aya. Agi mega sigi baka kambin takut ke ai,’ pia ku kaban iya nya tadi nerang ngagai iya.

Pak Pandir nyau berasai malu udah ke dipadahka kaban iya nya tadi.  Enggau ati ti lembau iya lalu mai kambin iya nya pulai.