Mati Kentut

Aloi enggau ini iya diau nguan rumah nyembuah kediri. Nyadi sekali nyepi seduai seruran makai nadai belauk, dia ini Aloi lalu bejaku;

‘Loi, pama enti dek ke pasar. Nyau puas nadai lauk, nadai garam.’

‘Au mih ni,’ ku saut Aloi.

Udah tembu beradu, Aloi pan nurun, nepan perau lalu belabuh bekayuh. Iya bekayuh sepagi-pagi nya. Peluh iya nyau ngenjing bekerenjui, baju iya nyau basah, nyau tau dipulas laban pemendar iya bekayuh. Nyau kelama iya udah dugau-dugau bekayuh, dia iya ninga manuk engkukuk.

‘Ah! Enda jauh agi pasar,’ pia ku iya bejaku kediri berandau nengali. Nyau kelama dinga gerung-gerung munyi labu orang mansang nyauk datai ari atas.

‘Endai, nama iya dek dih Aloi,’ pia ku Ini Aloi.

‘Nama nya dek dih Ini,’ ku Aloi nyaut.

Enda mukai-mukai dih Aloi enda ingat muka tali perau iya. Iya bekayuh nya sigi  endang enda mindah ari pengkalan.

‘Aih dek Aloi, kera dek tambab. Andal aku ngumbai dek udah ke pasar meli lauk.  Enti pia, aram mih tua sama-sama undur ke pasar,’ pia ku ini iya.

Ini iya lalu muka tali perau. Iya ngejangka perau. Seduai meuchu lalu bekayuh undur ngili ai. Bedau jauh udah ngejangka pengkalan, dia Aloi tepedaka bangkai ukui. Aloi enda senunuh bendar, endang sebarang utai rara.

‘Nama nya tak baka ukui tua dih Ini?’ ku iya.

‘Badu enda ya mih nya,’ ku saut ini iya.

‘Enti pia, enda tau nyadi undur tua Ini. Jai burung tua,’ ku Aloi.

Enda mih seduai nyadi undur ke pasar. Seduai ga jai burung.  Ukui nya udah mati kira dua tiga hari dulu ari nya. Diatu iya nyau bau but. Lebuh Aloi narit bangkai ukui dia iya nanya ini iya.

‘Ni kati alai ukui tu tak bebau dih? Mati ukui tu?’ ku iya.

‘Au,’ pia ku saut Ini Aloi.

Pagi siti Aloi enggau ini iya sama undur baru ke pasar laban lalu bedau bulih lauk. Seduai iya nepan perau lalu kira takah tiga tanjung ari ili pendai, dia seduai betemu enggau bangkai ukui ti udah bebau but tepanggai ba reba. Bau ukui nya ngenjing nempuh.

‘Kati alai ukui nya bebau? Mati ukui nya Ini?’ ku Aloi nanya ini iya.

‘Au,’ ku ini iya.

Seduai pan majak bekayuh regup-regup ngili ai. Nyau kelama udah bekayuh, dia Ini Aloi lalu kentut. Kentut iya balat bendar bau but. Iya ga luan nya alai bau kentut nepuk Aloi ke ngemudi.

‘Apu, mati Ini tu dih,’ pia ku Aloi bejaku dalam ati diri. Iya tusah amat ati. Luan perau lalu dituntung iya ke tebing. Ini iya lalu disangkaika iya dia.

‘Endai, nama main dek uchu, nyangkaika aku ditu,’ ku ini iya.

‘Dek ga udah parai dih Ini,’ ku Aloi nyaut iya. ‘Parai mih dek! Dek ga bebau but!’ ku Aloi.

Perau Aloi endang udah ngejangka tebing.

‘Keba dek tambab!’ ku ini iya ngangau ari tebing.

Aloi mimit endang ngiji runding iya. Iya pan mupuk bekayuh. Iya enda bedulika kangau ini iya. Dia iya bekayuh kediri-diri ngili ai, regup-regup. Iya tusah ati laban ini iya udah parai. Nyau kepuas iya bekayuh, tak enda berasai iya pan lalu kentut. Puuut!!!. Ensium bau kentut diri. Naka pemau, dia iya tekenyit ati.

‘Apu! Parai mih aku tu,’ pia ku iya bejaku kediri berandau nengali.

Kelalu tusah atika diri ke parai kentut, dia iya nyau enda engkebut. Sengayuh tebelengka ari jari iya. Perau iya lepung-lepung rarat ngili ai. Iya mansa mayuh buah rumah orang ngili ai nya. Orang alit ati meda ulah iya.

Lebuh iya meda buah mirah mansau, dia iya nengkelak.

‘Ah! Sayau endar aku tu parai. Enti aku enda parai, tentu aku ulih makai buah nyin,’ ku iya.

Mayuh macham buah bukai dipeda iya. Ke ili agi, iya meda orang nyual ikan, undang enggau mayuh macham lauk bukai. Lebuh iya mansa pasar, dia iya tusah agi ati. Orang ke dipansa iya alit bendar ati meda iya beranyut enggau perau, sereta dugau-dugau enda engkebut. Diatu perau iya nyau pansut ari nanga sungai ngaga tasik besai. Nyau kelama mua hari pan mansang chelum-sechelum.

Dia ribut bepuput begulang galu,

Angin bepusin balat udu,

Burung terebai bekelepu,

Ngiga tebing alai ngetu.

Pupu gumbang nyau merenggung

Mangkaka gerugu batu anggung.

        Umbak gumbang nyau kechimbung

        Nyelepak pun apung.

        Perau Aloi ama tengelam,

        Ama melepung,

Ama telentang, ama mengkanjung,

Iya empu tengelam ditabanka bangkung

Enda pegari panjung.

        Parai mih tudah Aloi nyenggai lemai,

        Danjan mih iya nyenggai bulan,

        Enggau orang ke sebayan

Mandai Mati.