Masau Pelajar

Begah, Umbong, Lawa enggau Ambab nya empat orang ke bebakih bendar sereta seruran begulai sejalai enggau pangan diri. Begah, Umbong enggau Lawa nya bisi penemu sereta ngembuan pelajar naka tikas SPM tang Ambab nadai ngembuan pelajar, nadai besekula tang Ambab tajam berunding sereta ngembuan pemintar.

Nyadi sekali sida empat berandau enggau pangan diri. Sida bekenangka pengerindu enti sida bejalai ke menua bukai. Sida beperagamka semua utai ti dikemisi dunya ke ulih dipeda sida.

‘Nama reti bisi pelajar enti kitai enda mindah kia-kia ngansingka penemu ke udah ulih?’ pia ku Begah bejaku.

‘Ai,’ ku saut Umbong. ‘Nya endang amat munyi ku nuan nya. Pelajar kitai tu tekelalu tinggi bendar dikena bekereja ba menua ti mit baka tu. Kitai semina masau pelajar ngapa enti sema kitai bekereja ditu,’ ku iya.

Ambab nadai nyaut seleka mukut, nadai nibas seleka beras. Iya semina mendingka randau sida tiga nya. Udah nya Lawa lalu nyapa. Ku iya, ‘Enti baka nya, bekemas kitai empat. Enti laun nurun nyangka semua utai ti udah dipelajar kitai lenyau magang.’

Sida empat lalu nyediaka gari enggau pemakai ti deka dikena pegi. Udah semua utai disikapka magang, sida pan lalu belabuh bejalai. Apai indai, suku juru enggau kaban belayan lalu lebih agi ambai ati endang ditinggalka magang enggau rinsa enggau ai mata. Tang deka enda pia laban sida udah mutuska runding deka pegi awakka bisi utai ulih, bisi ditusi ngagai sida ti tinggal di menua.

Semua arapka sida empat ulih ngiga juluk ati diri. Tang sida irau mimit ati ke tudah Ambab laban iya nadai pelajar sekula, enda sebaka enggau sida bukai. Deka enda mai iya, laban iya endang bakih sida.

Lebuh bejalai niti jalai raya, dia sida tiga ke bisi pelajar sekula richah bendar bekenangka sida ti belajar suba. Tudah Ambab semina nyangkai seleka dua nanya berita ngagai sida tiga.

Puas ke berandau, enda mukai-mukai Umbong lalu bejaku. Ku iya, ‘Aku lama udah berunding pasal pelajar kitai. Lebuh agi besekula suba, kitai selalu tinduk laun; macha ngena api kelita, api dian datai ke mata nyau berasai lelak sereta pedis. Diatu kitai baru mansutka diri ngagai dunya luar, awakka pelajar kitai enda tebasau ngapa. Ngansingka semua utai ti udah dipelajarka kitai, lalu dudi hari ila tentu nyadi orang ke raja ke jelai rita. Tang,’ ku iya, nenduka patah jaku sereta malik ngagai Ambab. ‘Kitai bisi kaban siku ditu ke nadai pelajar mesai bulu mata. Kati ke bisi enda iya irau ke diri?’ ku iya nanya.

‘Jangka aku iya sigi nadai ulih dikenyadi dikena nulung kitai. Nya alai asai sepi aku, nadai reti iya sejalai enggau kitai lalu bebagika utai ulih kitai ila,’ ku Umbong.

‘Runding nuan nya ngena sereta manah,’ pia ku Begah. ‘Aku besetuju bendar enggau nuan,’ ku iya. Udah nya iya lalu mutar ngagai Ambab, lalu bejaku, ‘Punggal, nuan nadai pelajar mesai bulu mata. Nadai aku kala ninga sida apai nuan besekulaka nuan. Manah nuan enda begulai enggau kami tiga,’ ku iya.

Tudah Ambab enda nyaut seleka mukut, enda malas seleka beras. Mua iya bebali mirah baka kain kesumba.

‘Salah penemu kitai enti munyi nya,’ ku Lawa nyaut ngarika Ambab. ‘Kitai tiga endang nemu iya nadai pelajar, tang kitai empat lama udah bebakih enggau pangan, kitai udah besulu kenyau ari biak datai ke diatu. Nya alai nadai reti kitai muru iya pulai,’ ku iya. ‘Awakka iya meruan begulai sejalai enggau kitai, lalu sama bebagika utai ulih kitai tiga.’

Umbong enggau Beguai lalu besetuju enggau penemu Lawa ke ngasuh Ambab nitihka sida tiga, taja iya nadai pelajar.

Udah ngetu belelak enda lama ba pemuntul jalai raya, dia sida empat lalu majakka pejalai ngiga pengelantang enggau pengeraja. Sida bejalai nguluka sungai, ngilika ai, meraka lebak, melunggang tinting. Lebuh sida datai ba babas tawas, dia sida tepansaka rangkah tulang singa ngachir sebelah tanah. Sida lalu nudukka diri lalu beratika gaya rangkah singa nya.

‘Tu betul bendar awak ba mua kitai,’ ku Begah. ‘Kati pelajar kitai ulih ngasuh jelu tu idup baru?’ ku iya nanya. ‘Iya ke temu aku, aku angka ngerakitka tulang nya, lalu ngelekatka genap iti iya ba endur ti betul,’ ku iya.

‘Aku pan bisi mih udah mansa pelajar nya,’ ku Umbong. ‘Aku nemu ngelekatka isi, darah sereta ngerambitka kulit ngagai tulang,’ ku iya nampung jaku baru.

‘Aku nemu ngasuh jelu tu idup, lalu ngasuh iya tau enseput,’ pia ku Lawa ngujungka enggi Umbong.

Tudah Ambab enda engkeretik seleka marik, enda nyaut seleka mukut. Iya temati kutu ninga pemalat pemandai sida tiga nya.

Begah lalu belatur ngaduka tulang singa nya awakka meruan. Udah nya tembu, dia Umbong lalu nyimpan isi enggau darah ke dalam rangkah singa. Udah nya iya lalu ngelekatka kulit. Lawa pan lalu beguai numpilka mulut iya ngagai jelu nya, lalu besedia deka ngesuhka seput iya kia.

Meda pengawa sida baka nya, dia tudah Ambab lalu bejaku nagang sida. Ku iya, ‘Uji berunding duluka utai di dikerejaka kita tiga. Jelu ti deka diasuh kita idup nya ukai jelu ngapa, jelu saja. Enti kita ulih ngidupka iya, kita tentu abis diterekam seret dibunuh iya. Nya alai anang majakka pengawa kita nya. Bebadi ngapa semua kitai lagi,’ ku Ambab.

Ninga Ambab nagang enggau jaku munyi nya, dia Lawa lalu merak iya. ‘Gamal ke baka nuan nya nemu deka ngajar kami. Enti ke nadai pelajar baka nuan nya, enda ibuh bejaku!’ ku iya. ‘Kami tu nama utai enda temu.’

‘Aku endang amat nadai pelajar baka kita tiga,’ ku Ambab, ‘tang aku ke bejaku laban sayau ke kitai empat, sayau ke pelajar kita. Enti kitai enggai ninga penemu aku, nadai ku enggau iya mih. Tang aku enggai enda ngasuh kita berundingka pengawa diri.’

Sida tiga enda mendingka jaku tudah Ambab. Nya alai meda baka nya, dia Ambab bejaku baru. Ku iya, ‘Enti kita tiga deka ngasuh jelu nya idup baru nganti aku rari dulu.’

Iya pan lalu beguai-guai niki kayu siti ti tinggi lalu duduk ba selepak dan ti pemadu tinggi. Ari nya iya ngemataka sida tiga ti kiruh ngidupka jelu singa nya. Begah enggau Umbong bediri semak Lawa, ngemataka iya ke deka nampung seput jelu nya. Enda lama, dinga bejaku Lawa madahka pengawa iya tembu.

Jelu singa nya pan lalu enchelakka mata sereta nguit-nguitka iku. Iya bediri ngenjing! Enda berupai peda tak merejuk singa nya lalu nerekam sida tiga ke udah ngidupka iya. Dia singa nya lalu nyarikka tubuh, ngerintaska sida tiga nya lalu makai sida. Sida mati enda benyawa, mati engkatak, parai enda tepadahka nyawa diri.

Nya alai buang tubuh tiga nya bebadi nyenggai hari, parai nyenggai lemai. Juluk ati ngiga pengelantang, ngiga nasit, ngiga pengerindu, ngansingka pemandai ke udah ulih sida enggau insak enggau sabak, tang diatu puntan mih baka jelan jalai jelu, labah baka buah merunjau ulu.

Tudah Ambab ke nadai kala belajar surat, nganti enda bemunyi ba puchuk kayu. Kira nyau lama singa nya udah ninggalka endur nya dia, nya baru iya nurun ari puchuk kayu lalu mulaika diri ke menua.