Kumang Ngiga jayau

Kumang Jawai berasa tusah ati laban lelaki ke seruran datai ngayap ngagai iya nyau belega lama nadai datai. Lelaki nya benama Bujang Lang Ngindang. Enda temu kebuah belega enda datai. Nya alai beduduk ari nya ati Kumang Jawai pan nyau berasai tusah beraie.

Hari beganti hari, minggu beganti minggu, bulan beganti bulan, nadai ga Lang Ngindang datai. Laban ati iya enda tepantup, enda nemu penunga ambai iya, nya alai Kumang Jawai nyau enda nemu agi, nyau mayuh macham utai pikir, nyau beba runding.

Beduduk ari nya, iya pan nyau lembau selembau, enggai nurun, nyau merampau pendiau. Iya enggai nurun ke umai, anangka ngebat nanchang sukat tampuk lemba.

Meda iya tak berupai lembau, enggai makai, enggai mandi, nya alai indai iya lalu nanya.

“Aku ga ngenang Bujang Lang Ngindang nadai agi ngayap aku di simbang papan penaga, nadai agi merunsaika aku di bungai rampang beta. Ukai nuan enda meda dih indai, tiap malam aku tinduk, peninduk aku ditaburka aku rampang bungai awakka bau rengut. Nadai mih iya datai. Deka  ngumbai iya nyau belelang, nadai ga aku bisi ninga iya nambang ke Batang Seria; deka ngumbai iya nyau bebini nadai ga ninga iya bisi nguangka orang; deka ngumbai iya nyau mati, nadai ga aku bisi ninga iya ngagai Batang Mandai, menua orang ti lela. Kada enda iya enda diasuh indai iya datai. Ila asai iya, enti iya bebulaka aku, iya sumpah aku pantuk ular sawa enggau ular tendai.”

“Eh endu,” ku indai iya nyaut, “nuan tu merampau baka nya ngemaluka kenduai apai nuan enda peiga-iga. Enti aku nemu nuan kelalu bangat merampau baka nya, nyau enggai turun enggai ke umai endur kitai nanam pun padi putung ketegal ti ngenang bujang ti nadai ngundang nuan di simbang papan padung, manah agi aku muai nuan kelia lebuh nuan agi ba pebuyan dalam kandung. Manah agi enti aku kelia ngerasa nuan enggau lungga mata rantung, ngelam nuan di kempisan munjung bejumpung.”

Udah nya ninga jaku indai iya bangat renjan, bangat nadai bisi sinu ke iya, Kumang Jawai lalu nyaut, “Tu aku indai beradai karung kerubung. Diatu tau mih nuan munuh aku. Bunuh naka ulih mih aku tu ulih nuan indai, awakka aku sulai matai pumpung. Enda pia udah mih aku tu dipejera sida bujang rengayung. Nama, mensia ni nih indai penjuang tanah langgung endur aku luluh mabun pumpung, nadai bulih mensa kerung tuchung pemansai.”

Sinu mega indai Kumang Jawai ninga saut iya baka nya. Iya lalu bekenanas mansang nudukka diri ngimbai anak iya. Enda berasai, disepi iya ai mata diri nyau nelian labuh ngerunung.

“Bisi nuan nguji ngetanka ambai nuan anak?” ku indai Kumang Jawai nanya.

“Ukai ka enda mih indai,” ku anak iya nyaut. “Bendar amat aku tu ngiga utai dikena, ngiga jayau dikena ngemulaika iya ngagai aku. Dayak, indai, abis endur aku begiga; Tambi, abis mih endur aku betanya, nadai mih aku tetemuka jayau. Nama nuan indai, kena nuan kelia ngulihka apai ngasuh seduai begulai di kerigai beimbai beradung, ti ngasuh seduai begulai di lantai begantung kibung? Pama nuan indai, enti nuan agi bisi nyimpan jayau nuan nya,” pia ku Kumang Jawai.

“Endai anak, kami kelia nadai mayuh macham. Aku tu kelia nadai bejayau. Ada  ditanya orang memanah, diambi orang enggau chukup adat, dipangkungka orang engkerumung, dipegaika orang bebendai,” pia ku indai iya.

Nyau sinu dih semengat rampang bungai ti diengkah Kumang Jawai ba peninduk ninga randau Kumang Jawai seduai indai iya. Semengat rampang bungai lalu mali diri nyadi mensia. Iya lalu ngangauka Kumang Jawai enggau nyawa ti chukup pengerindu sereta penuh basa.

“Kituka dulu nuan Endu Tematu Telu Ketupung Banda, sinu amat mih aku ninga serabana nuan nya,” ku Rampang Bungai.

“Enti nuan bisi penyinu, tulung mih aku wai,” ku saut Kumang Jawai.

“Enti nuan nadai,begiga jayau mih tua. Uji tua merau Dara Kembut, nitihka penyurut pasang raya,” ku Rampang Bungai.

Nama agi dih, nya alai pagi siti udah makai, Kumang Jawai seduai Rampang Bungai lalu nurun ke tebing ai, muka tali perau lalu mupuk bekayuh nitihka penyurut pasang mih seduai. Enda lama seduai udah bekayuh, seduai lalu datai ba lubuk siti. Lubuk tu menua Bunsu Ikan Juara.

“Ditu mih endur tua ngetu sekejap, singgah belepa,ngetu belelak, ” ku Kumang Jawai.

Bunsu Ikan Juara pan lalu pansut. Ai nyau tekesai, nyau berabeni, bepulas empa pemalat kebu kena iya ngemansutka diri.

“Apuu! Nama pejalai seduai ti begaut bendar gaya?” pia ku Bunsu Ikan Juara nanya.

“Nadai pejalai bukai kenduai tu. Kami duai deka ngiga pugai batu gula. Bisi nuan ngembuan utai nya?” ku tanya Rampang Bungai.

“Aku tu nadai nemu utai bansa nya, enda ngelala nama utai nya,” ku saut Bunsu Ikan Juara. Iya pan nyau mega enselur baru nuju apak ti dalam agi. Semina remi iya aja ti agi meruan dipeda.

Udah belelak, seduai lalu mupuk baru nitihka bungai pasang bebunga, berarat nadai meruan penuju. Nyau kelama seduai pan datai di menua Laut Senganan. Laban hari nyau laun seduai lalu bebai bemalam dia.

“Ditu mih tua wai ngetu singgah bemalam,” ku Rampang Bungai. “China tau endur tua nyapa, tau ambuka pangan. Laut lagi wai, endur tua nuntut batu ikan. Sapa ti meri tua siti lagi, ambuka kaban, enti nyau tau ngasuh ambai nuan duduk dedepan mulai ngagai kitai.”

Udah berapi, udah nyumai, udah makai lemai, nya baru seduai begaut ngiga kampung Laut nanya sapa ti bisi ngembuan jayau. Semua orang ke ditanya madahka diri nadai ngembuan utai nya. Udah nengah kampung Laut, seduai mulaika diri ngagai bala China, tang bala China madahka diri nadai ngembuan, nadai nyual utai bansa nya.

Hari pan nyau teberingkas tawas pagi siti, lebuh matahari nyau pegari, seduai pan mupuk beranyut, berarat nitihka penyurut ai pasang nyebam. Nyau kelama udah ke beranyut, seduai pan lalu datai ba ai ti bereni nyalin ngentupan.

“Tu menua Renyaya Bujang Renyayan tu wai ngentipu lebu ngetan,” Rampang Bungai madahka Kumang Jawai. Iya nyau ngena rentayan jaku perembian – bisi orang ngena jaku emperian – laban ke deka ngasuh Kumang Jawai ti nyau lembau nya bagak agi.

“Ni nuan Aya Renyaya Raja Renyayan?” pia ku Rampang Bungai nyapa.

“Tu aku, nama pejalai seduai dih?” ku Renyaya nyaut.

“Nadai pejalai bukai, ngiga jayau. Engka nuan bisi ngemeranka batu silun bulan, meri kami duai menyadi tu sebuni saum dalam,” ku Rampang Bungai nyaut.

“Oh nadai mih aku tu ngembuan utai nya endu,” ku saut Renyaya Raja Renyayan.

“Apuu, enti bakanya, ka pan enda beranyut baru mih tua tu, nitihka penyurut pasang nyebam, berarat nitihka perepat pasang dalam,” ku Rampang Bungai.

Tudah Kumang Jawai enda bemunyi, senurut aja.

Bekayuh mih seduai menyadi. Enda bangat lama udah nya, seduai lalu datai ba ai ti bereni salin bebuai. Tu mih menua Raja Genali. Ninga regup perau seduai Raja Genali pan pansut, jari iya nyau chapai-chapai.

“Nama pejalai seduai Endun Kumang?” ku Raja Genali nanya.

“Nadai pejalai bukai kami duai tu, ngiga pugai. Ni nuan bisi nyimpan peminan batu kuie? Enti bisi, beri mih ke kami duai menyadi, sua enggau jari. Nya deka kena kami ngemulaika ambai Keling Berani awakka ninggalka indai iya karung mengadi. Nuan disangka kami bisi ngembuan nya laban nuan tu Raja Genali ti bejari mansai kerangan rangkai,” ku Kumang Jawai.

“Anang ke ngembuan utai nya, ninga iya pan aku tu enda kala, Kumang Mereti,” ku saut Raja Genali.

Ninga saut nya tak nyemetak bendar, seduai pan lalu beguai bekayuh ninggalka endur nya. Nyau kepuas ke bekayuh, seduai pan tepanggai ba menua siti ti manah bendar.

“Ngetu tua ditu wai,” ku Rampang Bungai. “Tu menua ti dikumbai orang Tanjung Bekelung Ular Naga Pantai Keranjai Ansa. Menua ti dipegai Sultan Tuan Raja.”

“Bisi orang ditu ngembuan jayau wai?” ku Kumang Jawai.

“Nguji nanya ngapa mih wai,” ku Rampang Bungai nyaut.

Tang siku pan nadai ga orang dia bisi ngembuan jayau. Seduai nyau temati kutu nadai nemu jalai bukai agi. Dia Rampang Bungai lalu niki kubu Sultan sereta mukul wireless. Datai di kubu, tak lalu ditekis iya tiang wireless sambung temaga. Udah nya lalu dientun iya talipaun ke lalu bemunyi ridun naning gila.

Orang ti dikangau iya nya tadi Serinanti betachak giling besanggul liling. Rampang Bungai mega belabuh bemunyi Menani Manang Chelung, bejaku munyi Sebaru dudi pun dulu ujung, bejeluka munyi China dalam bandung, muchau munyi Melanau nimbau bangkung.

Sampi Rampang Bungai pan datai di langit din. Ninga sampi ti ngemalat nya, Serinanti lalu begaut nilik benda ajih iya. Dia iya meda seduai menyadi ti minta tulung, minta sah iya.

“Apuu! Nama nya bisi temuai dua-dua sama minta peminan batu gula. Anang guai endu, nganti aku ngirumka seduai Endu Temuku Tabu Ubung Jera awakka iya mai seduai pulai,” ku Serinanti, ke lalu beguai ngambi temuku ubung ajih iya.

“Seduai bejalai baru menyadi ngiga jayau,” ku Tabu Ubong Jera, ” aku diau ditu nguan kusa nuan Rampang Bungai. Aku nguan kusa kebat kita ti nya beteriap baka impun bebala. Aku mega deka ngereja tenun kita, mantangka daun belia bandir temaga.”

Senang mega ati Kumang Jawai ninga jaku Tabu Ubung Jera.

Ninga nya seduai pan lalu mupuk baru mansang ke langit laban deka ngulihka jayau.