Randau

Datai di rumah, Milah lalu jejampat nyuaka sekeping surat ngagai lagi iya, Kusau. Kusau agi ngetu belengah, lelak puas ke niki bukit di baruh, tebelengga lilih meda bini iya nyua iya surat.

‘Surat minta tanah nuan nya,’ pia ku Milah madah ngagai iya belubah-lubah.

Beguai-guai Kusau ngambi surat nya ari iya. Lalu dibacha iya enggau silik tiap-tiap leka jaku dalam surat nya. Nyau kimut-kimut mulut iya macha surat nya dalam ati.

Enda lama udah nya dinga bunyi orang ke ngeliat tudah Kusau sepengudah ke macha surat nya. Kusau ngetup bibir mulut iya.

‘Sial Budin nya,’ pia ku putap Kusau sambil ngerenyukka surat nya dalam jari ke digenggam iya enggau naka pengerat.

Tu nyau idar Milah ga tebelengga lilih meda ulah laki iya Kusau. Diperening iya mua Kusau ke baka ke benung merati utai sambil mata iya nadai mimit kesap-kesap.

‘Lapa nuan?’ Milah nempalung sebaris tanya sepengudah laki iya diau sengian munyi ke dalam kampung puang nadai didinga ensung nyumbuh bujang. Kusau lalu begaut ngalihka mua iya nunga tudah bini iya.

‘Eh, tudah Budin nya. Enda badu-badu mantaika dengki iya ngagai orang. Tanah nya mina tanah paya ke endang nadai orang empu.’ YB Bujat madah sigi nadai penanggul. Agi mega tanah nya udah lama nadai orang ibuh,’ pia ku Kusau nyaut enggau patah sebut ke kasar baka Budin nya bisi ba mua iya.

Milah nyau pesap-pesap mata, nadai nemu utai ku laki iya nya. Taja pia, iya endang nemu laki iya sigi dekaka tanah paya nya taja pan enda datai seikar.

Tanah nya mih ke nyerara tanah iya enggau tanah Nyanau. Nyanau udah tumu-tumu madahka diri enggaika tanah paya nya.

‘Engkapa aku nya, enti dek ka dek meh ngambo tanah nya. Anaeng bejako aja. Tules dek surat,’ pia ku jaku Nyanau ngagai iya beberap bulan ke udah.

‘Pelaba aku nadai nya penanggul dih. Tanah nya sigi nadai orang empu. Gaga aja surat, lagi aku nguji meratika iya,’ pia ku YB Bujat meri jaku jamin ngagai Kusau.

Nyau beperenching mata Kusau maya nya ninga jaku YB Bujat. Pengarap iya nyau baka kayu tumbuh bunga. Ayas lipan tauke Ah Lim ayan mua mata Kusau ngerejaka tanah iya nya tadi.

Kusau agi ingat amat-amat. Terang amat ba runding untak iya maya Budin pulai baru ke menua sida dia udah ke puas betaun-taun ngampar diri ke nengeri. Kusau nya mih ke mai iya betemu enggau YB Tegelam.

Atas tuduh penemu Kusau mih Budin nya lalu dichirika nyadi pemesai mantu YB Manggoi. Datai ke YB Tegelam nya dibuai ari nyadi pengari  maya pengawa bepilih maya nya suba taja pan bisi mega sekeda ke agi ngasuh iya bediri. Budin tetap dia lalu majak dikearapka YB baru.

Utai ke enda disangka-sangka Kusau  nyadi maya nya, lebuh YB Tegelam nyau sama diempa jaku petenah Budin senentang Kusau nya.

Semua utai ke digaga Kusau nulung parti sida nyau enda dikeibuhka agi. Kusau baka ke enda idup ba mata YB Tegelam. Iya ke bendar Kusau nya mih orang ke bebendar gawa mantu YB nya menang dalam pengawa bepilih ti udah.

Pama amat Budin. Kiba kanan abis ditebas iya!

Budin enda indah baka guntin dalam kain belipat baka sempama randau ngerayap ba pun telasih. Enda mayuh orang nemu perangai Budin semina Kusau.