Timun Mas

Ba sebuah genturung menua jauh di dalam puak Pulau Sumatra, diau siku indu tuai ke benama Ibu Sarni. Ninting hari iya ngabiska jam diau kediri diau nenggali laban iya punas. Iya ti bendar iya endang bisi pengingin deka ngembuan anak baka orang bukai ngambika bisi mantu iya bekereja.

Bisi lemai siti Ibu Sarni ke kampung ngiga kayu, tang enda mukai-mukai maya ba tengah jalai Ibu Sarni tak betemu enggau siku antu gerasi ke besai bendar. 

“Hei, ka kini nuan?”, pia ku tanya Gerasi. 

“Aku semina deka ngumpulka kayu kena manduk lauk. Minta pemendar aku mansa dulu,” pia ku saut Ibu Sarni. 

“Hahahaha... nuan ulih mansa enti nuan  meri aku siku anak mensia ke empa aku,” ku Gerasi. 

Ibu Sarni lalu nyaut, “Tang aku nadai anak”.

Sepengudah Ibu Sarni madahka diri nadai anak lalu bisi ati deka ngembuan anak, ngujungka Gerasi nya meri iya sigi entimun. Gerasi nya lalu bejaku, “Oh indu tuai, tu aku merika nuan igi entimun. Tanam igi tu ba tengah laman rumah nuan. Udah dua minggu nuan deka bulih siku anak. Tang ingat, serahka anak nya suh aku udah iya beumur enam taun.”

Dua minggu udah nya, entimun ti ditanamka Ibu Sarni nya pan bebuah  lebat udu lalu sigi ari buah entimun nya besai amat. Ibu Sarni lalu ngambi iya ke besai nya. Udah nya lalu dibelahka iya. Peda bisi siku anak mit ke bajik memelan dalam buah nya. Anak mit nya lalu diberi iya nama Timun Mas.

Makin sehari Timun Mas makin mansang besai-sebesai. Ibu Sarni gaga amat laban dalam rumah iya nadai agi sunyi agi. Iya udah bisi anak. Semua pengawa iya ulih tembu enggau jampat laban dibantu Timun Mas.

Nyau kelama ke udah idup begulai enggau anak iya Timun Mas lalu datai mih Gerasi laban deka ngamatka semaya iya. Ibu Sarni berasai takut amat sereta enggai jauh Timun Mas. Udah nya Ibu Sarni lalu bejaku, “Wai Gerasi, datai mih kitu dua taun da agi ila. Makin tuai umur anak aku tu, makin  besai makin nyamai dipajuh.” Gerasi pan setuju lalu ninggal ngejangka rumah Ibu Sarni.

Timpuh dua taun ukai awak ti lama. Ketegal nya ninting hari Ibu Sarni ngiga akal baka ni chara iya ngambika anak iya enda dibai sereta diempa Gerasi. Ati  Sarni nangi amat, lalu ngujungka Ibu Sarni bisi bemimpi. Dalam mimpi nya, iya dipadahka Timun Mas betemu enggau siku orang ke benung nampuk ba sebuah bukit.

Pagi hari siti Ibu Sarni lalu ngasuh Timun Mas ngusung orang ke nampuk nya. Udah betemu enggau orang ke nampuk nya, Timun Mas lalu becherita sentang kebuah penatai iya. Orang ke nampuk nya lalu meri iya empat buah tungkus mit ke diisi iya enggau igi entimun, jarum, garam, enggau belachan. “Tikau siti-siti tungkus tu, enti nuan digagai gerasi nya,” ku perintah penampuk. Udah nya Timun Mas pulai ke rumah lalu terus nyimpan tungkus nya.

Pagi siti, gerasi datai baru laban deka nagihka semaya. 

“Oh indu tuai, ni anak nya? Aku udah enda tan deka majuh iya”, perak Gerasi nya. 

Udah nya Ibu Sarni nyaut, “Anang nuan ngambi anak aku gerasi, laban aku sayau amai ke iya. Manah agi aku tu empa nuan.” 

Gerasi enggai nerima peminta ari Ibu Sarni nya, lalu ngujungka iya ringat amat. “Ni anak nya? Ni Timun Mas?”, ku Gerasi nya merak Ibu Sarni.

Ketegal ke enda kempang meda Ibu Sarni nyabak, lalu pansut mih Timun Mas ari endur iya ke belalai nya. “Aku ditu gerasi, tangkap mih aku enti nuan ulih!!!”, ku perak Timun Mas.

Antu Gerasi nya pan lalu ngagai iya. Timun Mas berengkah nikau kambut ke bisi entimun. Baka ke tau ajih, kampung dia lalu bebali nyadi madang kebun entimun ke bebuah lebat. Antu gerasi nya pan kena empang lalu enda ulih engkebut laban batang entimun lalu melit tubuh iya. Taja pia, puas ke kusil-kusil ujung-ujung gerasi nya mujur ngelepaska diri lalu mupuk ngagai Timun Mas nya baru. Sekali tu Timun Mas naburka kambut kedua ti bisi ngundan jarum. Dalam sekelip mata lalu tumbuh mih pun buluh ke tinggi amat sereta tajam. Enggau kaki ke telih sereta bedarah-darah laban tetebakka buluh dia gerasi nya lalu terus ngagai iya. 

Udah nya Timun Mas muka tungkus ti ketiga ke diisi enggau garam. Enda lama udah nya kampung dia pan lalu bebali nyadi tasik besai beledung lelinang. Tang tasik nya mudah amat ditujah antu gerasi nya.

Kali ke pengujung nya Timun M lalu ngunsaika belachan. Sekelip mata, menua dia lalu bebali nyadi tanah tanah rebuh ke engkurak. Nama dih tudah antu gerasi nya nyai tepuruk sereta terunjam ba tanah rebuh nya ngujungka mai nyawa iya. Parai mih tudah antu gerasi nya nyenggai lemai danjan nyenggai bulan.

 

Timun Emas lalu beterima kasih ngagai Petara laban udah nulung seduai meindai ari diempa antu gerasi ke jai nya. Kenyau ari sehari nya Timun Mas enggau Ibu Sarni idup lantang sereta likun.