Cherita Dua Buah Kerita

1

Siku indu balat muras laban lebuh iya datai ba kerita iya ke diengkah iya ba tebing jalai. Iya bisi kebuah muras ukai tak sengapa deka. Kerita iya diempang sebuah van diempu siku banga ke engkah van iya betul-betul sepiak kerita iya. Iya tama ke dalam kerita (hari ga angat!) lalu munyika terumpit kerita iya bekali-kali. Anti-seanti, orang ke empu van nya enda ga datai-datai. Bisi dua iku lelaki ngampir iya dia lalu nanya nama ke enda kena. Iya lalu nunjuk ngagai van, baka ke nerang ngagai seduai utai ke nyadi ba iya. Dua iku lelaki nya lalu ngeligan geram meda ulah indu nya ke nunjuk ngagai van nya. Seduai baru pulai bebelika barang dapur (kedua-dua seduai sama serumah), lalu sekeda ari barang ke dibeli seduai nya selunsin telu manuk. Siku ari lelaki nya lalu enda mukai-mukai nikau telu nuju van nya! Tekenyit indu! Tekenyit meda ulah lelaki nya. Pangan iya ke siku nya agi ukai semina nikau telu tang enggau mulut-mulut iya nyumpah nganu. Ujung-ujung deriba van nya pan datai (iya baru tembu beurut) lalu muras ga laban meda van iya nyau abis kamah laban telu. Enggau tubuh ke regas ketegal baru udah diurut, iya lalu nadai meri peluang, terus ngagai dua iku lelaki nya enggau nyawa-nyawa merak seduai nya. Sida tiga nya nadai agi teingatka indu nya tadi. Entah enda nemu mih ti indu nya agi bisi duduk dalam kerita iya dia.

2

Siku lelaki engkah kerita iya enggau naka penyimat. Bisi mih kebuah iya bejimat-jimat baka nya; kerita iya baru sereta mar, begenyeling bekilat. Nya alai iya enggai sekali-kali bisi nyadi apa-nama ngagai kerita iya. Pansut iya ari kerita, iya lalu diambat siku nembiak lelaki. Lelaki nya lebuh meda nembiak iya lalu berasai nangi, tang nembiak nya enda minta duit (agi mega lelaki nya baru udah mayar ba pintu penama tadi). ‘Manah amai kerita tu,’ pia ku nembiak nya. ‘Berapa rega siti baka tu?’ Lelaki nya nyaut, ‘mar.’ Adai kua ulih meli nya, wat, ku lelaki nya bejaku dalam ati diri. ‘Aka melika kerita tu?’ nembiak nanya baru. ‘Enda, pemeri ari orang,’ ku saut lelaki nya, ‘beri menyadi aku.’ Ninga saut lelaki nya, nembiak nyau tebelengga lilih. ‘Chemburu aku enggau kita menyadi!’ ku nembiak nya. ‘Ketegal ulih meri pemeri ke mar baka tu lalu ngasuh menyadi iya gaga.’ Nembiak nya lalu ninggal endur nya enggau tuchum. Lelaki nya tegenung sekejap baka empelekung mabuk ambuh, ngetu baka puyu mabuk keruh, nisi kerita iya.