Apai Sali Enggau Apai Seumang Umang Berumah

Nyadi sekali Apai Sali enggau Apai Seumang Umang ngaga rumah. Rumah enggi Apai Sali tiang tekam, tebelian sereta enda nemu tunga pemadas iya.  Kelimpah ari manah rumah iya mega tegap laban ke beramuka kayu tekam enggau tebelian.

Nyadi enggi Apai Seumang Umang nya betiangka buluh betung. Diukir iya betung nya tadi nyau begenarau; baga betegam bisi, naga duduk pan bisi, naga berasuk mega bisi. Ukir betung nyau naka iya pemanah. Nyau kelama-lama tembu mih rumah Apai Seumang Umang lalu pia mega rumah Apai Sali. Nyau kelama seduai udah bela pindah ke rumah baru dia Apai Sali lalu nemuai ngagai Apai Seumang Umang.

‘Lalu, punggal,’ ku Apai Seumang Umang.

‘Au akan, enda diasuh nuan lalu mih tu. Nya meri tu datai ditu deka lalu,’ ku iya. Duduk tudah Apai Sali tak bingas-bingas gamal iya malik kia-kia.

‘Badas amat rumah akan. Tak nyau beukir-ukir. Nadai salah alai mata meda naga betegam, naga besimpah mih ditu,’ pia ku Apai Sali.

‘Sigi digaga badas enggi aku, punggal,’ ku Apai Seumang Umang, ‘lebu ga kitai landik ngukir. Ni alah diau ba rumah jai.’

‘Enggi aku nadai utai baka tu, akan. Kati enti tua besilih rumah?’ pia ku Apai Sali nganu Seumang Umang.

‘Uh! Enggai aku,’ pia ku saut Apai Seumang Umang, ‘ukai main pemedis aku ngaga tu. Dek ga meda ukir iya.’

Nyadi enti maya hari beribut rumah Apai Seumang Umang tu ngenjing bekedengut puputka ribut, munyi kesuling. Laban ruas betung nya tadi dilubang, ditebuk-tebuk iya tiang raga. Nyaris utai munyi nya munyi ke nyepu labu enti hari ribut.

‘Besilih mih tua,’ ku Apai Sali.

‘Enggai aku punggal,’ ku Apai Seumang Umang, ‘lelak endar aku ngaga rumah tu. Pala aku nyau bungau, mata aku nyau buntau ngukir rumah tu.’ Agi ga Apai Sali majak mai iya besilih.

‘Besilih mih akan. Nuan ga landik ngukir, tau diukir ga rumah aku nya ila enti udah pulai ke dek,’ pia ku Apai Sali.

Nyau pemuas tudah Apai Sali ke ngumbuk iya, nyau bisi ati sinu mega Apai Seumang Umang ke Apai Sali. Deka mega iya besilih rumah enggau Apai Sali. Berangkut Apai Sali tu tadi, dulu iya ngangkut keresa kia enggaika Apai Seumang Umang matakka jaku. Apai Seumang Umang pan ngangkut keresa iya ga ngagai rumah Apai Sali.

Kelama-lama udah seduai besilih rumah, nyau diau Apai Seumang Umang ba rumah Apai Sali. Tegap mih enggi iya laban ga betiangka tekam enggau tebelian. Nyadi rumah Apai Seumang Umang ke pulai ngagai Apai Sali nyau lama-kelama berubah betung. Pemuas ke baka nya ujung-ujung iya lalu tumbang.

‘Uh! Tumbang rumah tua Enchelegit. Nama rumah tu enda teguh amat,’ ku iya.

‘Ga dek Tambab,’ ku Enchelegit, ‘enggi orang tiang betung, enggi dek tiang tebelian, tiang tekam. Katiku dek deka mai orang besilih?’

‘Amat endar mih nya. Tak buntas enggau perut, tukup enggau pala iya,’ pia ku Apai Sali. Nyau lelak Apai Sali seduai Enchelegit berunding deka berumah baru. Ney! Nama penyadi, nyau bepungkalka rumah. Kelama-lama tembu mega rumah baru, puas iya ngaga nyau nyenggai taun nyenggai bulan.