Gajah Lelang Ari Sarawak

Nyadi agi jeman dulu kelia, lebuh jelu dalam dunya tu agi meretika jaku pangan diri. Dia kenu ku leka ensera tu bisi siku Gajah Lelang datai ari menua bukai ngagai menua kitai kitu. Kitai sama nemu Gajah tu endang jauh besai ari semua jelu bukai. Ari pemesai gamal iya, dia iya nyamai bendar ngemba tauka ngenakut ka orang ti mit agi gamal ari iya. Nyau puas iya ke lelang dalam kampung din, dia lalu tetemuka danau ke besai bendar. Nyepi diri peluh sereta ikak udah bekau ke bejalai, iya lalu terejun mandi ba danau nya.

Meda Gajah bangat nadai basa baka nya, dia semua jelu enggau burung bukai ke endang bempu danau nya udu amat ringat. Sida enda lantang ati meda ulah temuai ke baru datai baka nya ngalahka danau sida. Tang laban semua tubuh sida ke endang bempu danau nya nadai ngemesai tubuh Gajah, sida lalu deka berunding ngiga jalai ngajar Gajah nya awakka iya enda mandi dia agi.

Nyadi semua bala jelu enggau burung ke dia lalu milih siku ari sida nuntungka pengeringat semua jelu enggau burung ngagai Gajah. Lebuh maya nya nadai jelu bukai ke besai agi ari Baya ti lalu dipilih nyadi pengari bala jelu enggau burung ke dia.

Lebuh iya udah kena paduka jadi pengari bala jelu enggau burung, dia Baya lalu nyelam ngenselur ngagai tunga Gajah ke benung bekechimbung ngelantangka diri mandi. Datai din, iya lalu enda chachamang tak lalu nangkap pah kanan Gajah. “Untung bulih beliung enda ngambuh, mudah bulih peredah enda ningkuh,” kenu ku jaku tudah Baya.

Ensepi diri ngemedis nya, Gajah lalu melit Baya enggau belalai iya, Baya lalu disaguka Gajah ke langit kin sereta dikesaika iya bulih peninggi tengan batang kayu. Lebuh ari atas Baya lalu ninggang batang engkeranji ke dendang lama udah chundung nyuntai ba tebing seberai. Baya nyau nadai agi chara, amat ga enda parai, tang tulang belakang iya patah, ke ngasuh iya pedis bendar bai meragau.

Udah nya Gajah lalu niki begadai-gadai ke pantai. Ari pantai, dia iya meda rusa benung kebut-kebut nyanggut daun lengkan. Tang rusa ngaga diri enda meda iya lalu majakka diri ngulam. Gajah lalu ngangau ke  iya, ngasuh iya nesau semua jelu enggau burung ti nguan danau nya. Iya mai sida bebunuh.

“Tang enti ngeli sida nadai mesai enggi aku tu, anang ngasuh sida iya mansang, enggaika nadai dikekah aku,” pia ku Gajah bejaku enggau rusa. Udah nya iya lalu nyuaka Gading iya ngagai Rusa, ngambika bisi dipeda sida.

Ninga jaku Gajah Lelang munyi nya dia rusa lalu kebas-kebas, pala nyau gilik-gilik mandangka pemanah tanduk nesau kengka semua jelu enggau burung ke bisi semak dia. Nyau kelama, nya baru semua jelu enggau burung pupus ditesau rusa. Tang siku pan nadai mih bala sida dipeda rusa sebaka pengering enggau pemesai tuboh baka Gajah Lelang. Udah nya rusa lalu nikal ngagai semua bala jelu enggau burung ti endang udah nganti ba tisau Danau.

Benung sida ke nyau bekekisuh sebelah nya dia, berundingka sapa patut nyatup Gajah Lelang, dia Gajah Lelang lalu ngangau ari danau. “Udah bulih manuk sabung kita?” ku Gajah Lelang nanya. 

“Bedau! Bedau!” ku Pelanduk nyaut. Tang iya ke bendar, sida sigi nadai tetemuka pengari ti patut nyatup Gajah Lelang. 

Semua sida jelu ke endang sigi tampak nama, jelai berita pan udah ditanya magang, tang siku pan nadai berani ngelaban Gajah Lelang. Datai ke beliau Ingkat seduai manang Menarat pan madahka diri enda nemu jalai ngelaban orang ngemesai nya gamal. Lemambang Simpiliau pan enda ga berani. Semua ke selalu belelang pan enda ga berani nguji ngemediska Gajah Lelang, sereta madah nadai kala meda jelu bisi besai ari Gajah Lelang.

Udah nya ngetu kenu kaban jelu baka puyu mabuk ambuh, sama ngenung baka empelekung mabuk keruh. Nadai tetemuka runding enggau akal kena medis ka Gajah Lelang.

Nyau kelama udah sida ke sama ngetu, nya baru tudah Landak bejaku ari belakang tugung bala bejaku apas-apas didinga laban kerah kera ke enda ngetu bejaku. 

“Cheh!” ku Kera. “Gamal ke baka nuan nya, chuyuk-chuyuk ngapa. Kemaya kala pansut ari lubang tanah enggai enda bejaku. Ngerichauka penemu orang mayuh nuan nya,” ku Kera, kerah-kerah duduk atas urat engkeranji chundong nyuntai.

“Nadai nya ngerichau dih,” ku Pelanduk. “Kada enda utai ke apin ditemu kitai deka dipansutka iya, sebut dia mih buat. Kituka agi nuan, ngansak semak-sesemak awakka bela sama ninga penemu nuan, enda tentu ninga pending laban gaum bala mayuh.” Pia ku Pelanduk nganu Landak.

“Amat nya” ku Semawa. “Enti baka ke akar tubai tak, nadai siku kitai bisi ngembuan tipang bias baka enggi Landak,” ku iya. 

Landak lalu nengkelak sereta nidit chayuk-chayuk mansang ke mua. Pelanduk pan pia mega nengkelak lalu duduk entap ngambika nyamai mendingka jaku Landak.

Udah nya baru tak berupai bebali mua tudah Landak, udah ninga jaku Pelanduk seduai Semawa tadi. Udah nya iya lalu bejaku. “Enda ibuh tak ba tengah-tengah bala pan aku duduk punggal. Ari tu pan aku,” ku iya.

“Nyadi kitai sama udah nemu Gajah Lelang udah nyuaka gading iya ngagai Rusa. Reti nya Gajah Lelang madahka pemesai gamal enggau pengering iya ngagai semua kitai jelu enggau burung ba menua tu,” Ku Landak. Tang kitai anang takut, anang alah kena emba Gajah Lelang. Nya alai diatu aku ngasuh nuan ga Sambi Pelanduk, nyuaka bulu aku dua iti tu ngagai Gajah Lelang. Enti bulu iya tajam sereta enda mesai bulu aku, anang ngasuh iya niki ke pantai,” pia ku tudah Landak. Iya mega lalu ngisaika bulu diri ba mua bala jelu enggau burung dia.

Jelu bukai ke bisi dia, nadai engkeretik siku. Tudah kera lalu begaruka jumbal burit, sereta lalu ngerisingka ngeli. Nyema jaku, daun labuh pan didinga mih. Beliau Ingkat malik ke belakang, malik ke mua, mulut kulap-kulap muchau anak leka puchau. Semawa nyau temati kutu.

Nyau kelama udah nya, baru Pelanduk lalu baka ke tedani ari tinduk, beselimban ngumpul bulu Landak dua iti. Iya lalu nurun ke tebing Danau. Iya lalu dientudika Rusa regap-regap ari belakang nyan gading Gajah Lelang. 

Datai ba danau, Pelanduk lalu ngangauka Gajah Lelang. “Oh Buat,” ku iya. “Udah kami bulih manuk kena ngelaban nuan. Satup mih manuk kami tu lagi.” ku iya ngangau ka Gajah Lelang ke benung mandi.

Ninga kangau Pelanduk, Gajah Lelang lalu mupuk ngeredayau begadai-gadai mansang ke tebing. Lebuh iya nyau semak, Pelanduk lalu bejaku baru enggau iya.

“Tu bulu manuk kami ke diagihka kami nyatup nuan.” Ku Pelanduk. “Tang enti bulu nuan enda mesai enggi iya tu, nuan anang ngemalu diri niki ke pantai.” Pia ku Pelanduk. Iya tu endang udah disabung kami ngelaban orang ke kering, ke besai gamal,” ku Pelanduk. “Ensumbar iya Landai Indu Landak bebulu burak puting juring ngujung geraji,” Ku Pelanduk baru.

“Eh! Sapa Landak tu?” ku Gajah Lelang. Mata Gajah Lelang semina tak kesap-kesap, laban ati iya udah takut serta rawan meda pemesai bulu Landak ti jauh besai ari bulu iya. “Orang tu tentu dua-tiga kali besai ari aku,” ku iya.

Udahnya tak enda beadang-adang Gajah Lelang lalu minta gading iya pulai ari Rusa, lalu deram-deram ngelarika diri ari menua nya. Sebedau iya ngelarika diri, iya madahka diri enggau semua peturun iya, sigi enggai nguan menua Sarawak tu agi. Meda pemesai bulu Landak nya ti udu ngenakutka iya lalu ngujungka iya lari ngagai menua bukai.Jeman kelia kitai ngulihka pemisi ngena akal bala mayuh. Mayuh agi bala, mayuh agi ga runding, lalu mayuh agi ga jalai temu kena ngereja pengawa, ngulihka pemisi enggau pengidup ti menyana. Tang diatu pemisi kitai mensia ulih ari kitai ke besekula. Pandai agi kitai dalam sekula, bulih agi ga kitai penemu kena kitai ngiga pengidup enggau pengeraja dalam dunya tu.