Apai Sali Ditabanka Burung Terebai

‘Kitai tu Duat lama endar udah enda makai burung. Manah tua nyumpit, Duat,’ ku Apai Sali nganu anak iya.

‘Kini tua nyumpit pai?’ pia ku tudah Sali.

‘Eh, kin ka mih Duat, ngagai ulu rau nyagu nyabungka ulu Sikup Bengkang. Ngabiska Sungai Kandis, nyabungka teritis Sungai Kepayang. Kinka kita nyumpit ngagai kara din. Iya ke galak alai sida akan Keling nyumpit. Din enda pungkang burung endang selalu bisi burung,’ ku iya nganu anak iya.

‘Barang iya mih apai,’ ku Sali.

Lalu begagaka laja seduai menyanak, berautka laja, berautka ibul. Udah mayuh laja digaga, seduai iya lalu nurun. Sehari-sehari nya kiraka nyau tengan niki mata panas, seduai pan datai ga ba pun kara ke ditapatka seduai. Peda burung nyau bebintih makai buah kara.

‘Ah, tu baru iya Sali. Nyadi aku tu niki, nuan ngibun iya di baruh ditu. Nama labuh ambi nuan,’ ku iya ngajar Sali.

‘Barang iya mih apai,’ ku Sali.

Tiki iya, niki iya ke puchuk kin. Sumpit iya burung – labuh.

‘Nya, patahka sayap iya dia,’ ku iya nganu Sali. Enda ga Sali matahka sayap burung. Udah nya sumpit iya ga burung – labuh ga. Asuh iya patahka Sali ga sayap, enda ga Sali matahka sayap. Nyau pemuas iya ke nyumpit burung ari puchuk kayu nya, dia iya lalu madah ngagai Sali;

‘Enda baka nya tua Duat. Enda ibuh ngumpul nuan awakka aku ngambi,’ ku iya.

Sumpit iya! Sumpit iya dia labuh ga burung. Ambi iya lalu tanchangka ba punggung. Sumpit baru – labuh ga burung. Ambi iya lalu tanchang ba punggung.

‘Iya lapa enda dipatahka nuan sayap iya dih apai?’ ku Sali nanya apai iya.

‘Eh! Enda ibuh dipatah, kapa matahka nya,’ ku iya nimbal jaku Sali. Mayuh bendar burung dia; sida kenyalang, kejakuh enggau macham-macham burung bukai mih dia. Sida rengak, sida beruie tanchangka iya ba punggung. Nyau nadai alai agi tubuh iya endur nanchangka burung ulih seduai menyanak. Sangkingka iya ba tubuh magang. Enda arapka Sali enggai enda iya ga ngumpul burung ke ulih seduai.

Nyau pemuas iya ke baka nya, dia tak engkebap mih burung nya; sida kenyalang, beruie, kejakuh tak lalu nabanka iya. Tak terebai burung nya kinda-kinda nabanka iya. Ujung-ujung nyau lebut-selembut burung ke terebai nyau enda berasai tak labuh Apai Sali. Labuh ninggang tanju orang Panggau. Nyadi maya nya Kumang enggau Lulong betul bendar ga benung nganchau padi ba tanju.

Nama dih orang ba rumah dia lalu begau meda utai bangat nyelai baka nya.

‘Uh! Nyelai bendar utai tu,’ pia ku Kumang. ‘Nama utai tu? Kada enda tu ke dikumbai orang anak Petara?’ pia ku jaku Kumang.

‘Anak Petara,’ ku Apai Sali nimbal.

‘Uh! Anak Petara tu. Iya empu madahka diri anak Petara,’ ku Kumang.

Nama dih lalu diambi orang mega iya udah nya. Ambi orang iya lalu dibai orang ke rumah.

‘Anak Petara tu pia ah.’ Lalu begau mih orang serumah-rumah nya. Sida Keling, Laja, Sempurai sama bela datai kia magang laban bela nadai kala meda anak Petara tak segenda-genda baka nya lbuh ari langit.

‘Nama runding kitai enggau anak Petara,’ pia ku sida bejaku enggau pangan diri.

‘Nadai runding bukai, ka pan kitai enda begawai.  Begawai mih kitai, begawai ke anak Petara. Kati ku enda ngintu utai tak nyengenda baka tu, indah utai ke mit agi dih dipegawaika kitai,’ pia ku sida.

Nyadi tudah anak Petara mya lalu diberap bala sida Kumang dibai pulai ke baruh. Datai ba baruh lalu diengkah ba pantar di ruai lalu diserayung ngena pua kumbu. Nyadi lebuh Kumang ke mai iya pulai ke dalam rumah, dia anak Petara tu bejaku munyi tu;

‘Sandik pakap! Sandik pakap! Disandik orang pakap mega iya nithka pinta iya. Reti sandik pakap nya sandik betangkup dada.

Orang Panggau sigi jampat ngereja utai. Nya alai empai nyamah nyau udah, empai nyapai nyau udai. Dua tiga hari udah bekau nya sida pan lalu nyadi gawai. Begawaika anak Petara. Mayuh orang datai dipadahka ngabang. Orang di Panggau Libau ke berauh munyi ke begendang bisi mega dipadahka sida. Orang  di Linsing Kuning datai ari tinting peling gasing gerah layang; sida Juntan datai ari Melaban mipau umbang, sida Apai Makam. Sida Abuh datai ari buluh bauh rejang selambang sama bela dipadahka magang ngagai gawai sida Keling ke begawai ke anak Petara ke tak nyengenda-genda labuh ari langit. Nama, rami bendar orang begawaika anak Petara digaga orang ke piring.

Angkat dih ninga rita tudah Indai Sali laban rumah Apai Sali tu endang iya enda jauh ari rumah sida Keling.

‘Nama utai ke dipegawaika sida unggal nuan Keling maya diatu taun?’ ku jaku Indai Sali nganu Sali.

‘Kenu ku orang indai, sida Kumang begawaika anak Petara labuh ari langit,’ pia ku Sali nyaut indai iya.

‘Ngabang kitai anak ngagai orang. Enda kala meda anak Petara,’ pia ku Indai Sali.

Iya mih nyau chukup hari, nurun seduai menyanak ngagai rumah sida Keling. Datai din meda orang begau besilakka pua kumbu ke dikena ngujuk anak Petara ba pantar di atas. Nya mih laban utai enggai enda ke ensera, katika sida ke ngabang nya bangat enda ngelala Apai Sali siku.

Nyadi Sali tu baka orang mayuh mega, lebuh seduai indai iya datai din lalu nilik. Udah nya lalu pulai ngagai indai iya di bilik.

‘Nyelai endar anak Petara nya indai tak baka gamal apai,’ ku iya madah ngagai indai iya. Ninga nya indai iya lalu pansut ke ruai nyeling-nyeling ari jauh.

‘Amat Apai Sali mih orang ke dikumbai sida tu anak Petara,’ pia ku iya berunding dalam ati diri. Nya alai nyau enda  liat ati Indai Sali, dia iya lalu pansut jaku.

‘Ukai nya anak Petara, Dum, taka aya nuan nya ditabanka burung terebai suba. Nyangka iya labuh ninggang  rumah kita,’ ku Indai Sali bejaku enggau Keling.

‘Iya,’ pia ku bala sida Keling, sida Laja, ‘amat aya nya?’

‘Ya, gamal iya dipeda aku,’ ku Indai Sali.

‘Uh! Beduan, ngayahka kami Palui tu,’ pia ku sida. Tak  angkat kenu Sempurai lalu ditanggung iya Apai Sali lalu dibuai iya ke ujung tanju.

‘Beduan kami, ngayahka kami nuan tu,’ pia ku iya. Ukai beduan tudah Apai Sali, sida iya ke beduan diri empu. Udah iya terengkah di tanah lalu panggung sida enggau lesung tang laban Apai Sali tu enda tau parai. Nya alai lalu diambi tudah Indai Sali dibai Indai Sali pulai. Deka dima enggai ga Apai Sali.

‘Sandik pakap Indai Duat!’ ku iya nganu bini iya. Pinta sandik ari dada ga iya! Lalu ditabanka Sali seduai indai iya pulai tudah Apai Sali. Nama dih, pedis bendar tudah Apai Sali, abis ditinggang orang ngena lesung. Dibai seduai iya pulai ngagai rumah sida empu.