Apai Sali Ngiga Kulat Menarat Tau Nyengat

Nyadi sekali Indai Sali bejaku enggau Apai Sali.

‘Apai Duat, uh Apai Duat! Kitai tu tak nadai utai ke lauk. Uji nuan ngagai rimba kitai,’ ku Indai Sali.

‘Nama kebuah dih Indai Duat?’

‘Eh, ngiga kulat menarat tau nyengat mih,’ ku jaku Indai Sali.

‘Au! Nadai kebuah enggai.’ Udah nya iya begari, tudah Apai Sali nya tadi nurun nangkin anak duku, nyandik raga. Bejalai iya nengah rimba sida meda kulat nyelutung ngejing burak-burak ngelamun batang. Pusil iya, enda ga tau nyengat iya, pusil enda ga tau nyengat.

‘Ah! Dini-dini alai kulat menarat tau nyengat ku Indai Sali tu,’ ku iya bejaku kediri.

Bejalai ga iya agi, tetemuka kulat burak, nadai utai ngemayuh-mayuh nya nyau terang ba batang. Pusil iya, enda ga tau nyengat.

‘Ah! Dini-dini alai kulat menarat tau nyengat ku Indai Sali tu,’ ku iya. Bejalai ga iya sebelah rimba nya bejelangkit-bejelangkit, nemu kulat tepik, nemu kulat bulu, kenu. Lalu dipusil iya tang enda ga tau nyengat.

‘Ah! Nadai temu mih kulat menarat tau nyengat ke ku Indai Sali tu,’ ku iya.

Bejalai-jalai ga iya ngejang ke endur nya. Nyau pemuas iya ke bejalai nya dia iya lalu tepedaka singut enggau labit-labit ba batang kayu rimba.

‘Kada enda nya kulat menarat tau nyengat ku Indai Sali,’ ku iya bejaku kediri. Mansang iya kia lalu dipusil iya kulat nya tadi. Tak lalu malut iya mih singut nya. Ngelaban iya mih singut nya kenu ku iya. Rari mih tudah Apai Sali, nyau enda beapai enda beindai; kaki dulu kaki diasur, pala dulu pala sungkur. Abis sup abis baluk mua iya pan datai di rumah.

‘Uh! Nama nganu nuan apai?’ ku tanya Sali.

‘Akai-indai! Nya alai aku ke enggai diasuh indai nuan ngiga kulat menarat tau nyengat. Enda ulih ambi kulat menarat tau nyengat,’ ku Apai Sali.

‘Iya! Baka ni ku gamal kulat menarat tau nyengat ku nuan nya Apai Duat?’ ku tanya Indai Sali.

‘Iya! Labit-labit ah! Besai endar labit iya. Nyau sebubu indu iya,’ ku terang tudah Apai Sali.

Keba nuan tu tambab, beli lap. Singut nama iya baka nya. Kulat menarat tau nyengat dini nya baka nya. Kulat nyelutung, kulat bulu, kulat tepik enggau kulat burak nya ke dikumbai kulat menarat tau nyengat.’

‘Nuan ga beli dih Engchelegit nangga langit. Dini aku nemu utai ku nuan. Ninga nya menarat tau nyengat ku nuan,’ ku iya bechakah enggau Indai Sali.

‘Nyadi, nama kitai nemu utai baka nya tadi puar kitai singut nya. Baika kitai tepayan kena kitai ngambi ai iya. Baka nya enggi orang. Baika kitai sempun kena kitai nepas iya,’ ku Indai Sali nganu iya.

‘Ah, anang tusah Indai Duat, pagi kela Indai Duat, pagi lusa Indai Duat,’ ku iya nyaut.

Pagi siti nurun baru Apai Sali ngiga kulat menarat enggau singut. Bejalai mih iya mai tepayan enggau sempun. Angkat dih nyau pemuas iya ke bejalai dia iya tepedaka rusa ngulam. Nadai utai ngemesai-mesai nya rusa, nyau ngelingkang tanduk iya.

‘Ah nya singut ku Indai Sali tadi,’ ku iya bejaku kediri.

Mansang iya kin begadai-gadai iya kia. Nya lah munyi ku nya laban nya ke buah ensera. Nama kebuah rusa tau enda engkebut dih. Datai iya ba rusa nya lalu sangkingka iya tepayan ba perut rusa. Nat ga tudah rusa nya ngeringak ngulam. Udah nyangkingka tepayan nya baru iya nyelup sempun. Tunu iya sempun uru iya rusa nya. Tak lalu belanda mih rusa nya rari nabaka tepayan.

‘Talap nabanka tepayan! Talap nabanka tepayan! Talap nabanka tepayan!’ ku iya. Nyau rusa nya nabanka tepayan iya. Pulai iya ke rumah.

‘Eh! Nama nuan Apai Sali ke  ka ngulihka singut?’

‘Ni nya bisi Indai Duat! Sangkingka aku tepayan tak lalu ditabanka iya belanda,’ ku iya.

‘Iya nyelai bendar ga singut nya tadi tau nabanka tepayan nuan,’ ku Indai Sali, ‘baka ni ku gamal singut nya?’

‘Eh, bekaki panjang-panjang! Bebulu juyang-juyang! Betanduk ringkang-ringkang,’ ku iya.

‘Eh! Nuan tu tak nemu utai. Nama iya baka nya, rusa nya. Ni nya deka dikumbai nuan singut. Nuan tu tak lap,’ ku Indai Sali nganu tudah tuai.

‘Pia, aku ga enda ngelala. Kumbai aku singut mih. Kati ku enggau iya dih Indai Duat?’

‘Nama iya baka nya tadi baika sangkuh lalu tumbuk rusa nya. Ni nya dikumbai singut,’ ku Indai Sali.

‘Akai dai ah! Pagi kela Indai Duat. Pagi lusa Indai Duat,’ ku iya.

Hari siti nurun baru Apai Sali. Bejalai iya nurun baru. Nyau pemuas iya ke bejalai nya dia iya lalu tetemuka Tuan Sikh besembah alam utan. Peda iya lugang-lugang Tuan Sikh nya besembah alam utan. Mansang iya kia. Diambi iya sangkuh lalu tumbuk iya. Mati tudah Tuan Sikh lalu dibai iya pulai.

‘Tu baru iya tu,’ ku Apai Sali bejaku kediri. San iya datai di rumah.

‘Nya tu rusa,’ ku iya nganu Sali enggau indai iya.

‘Ni rusa apai?’ ku Sali nanya iya.

‘Nya dih ba kaki tangga,’ ku iya. Peda sida iya.

‘Uh! Ukai nya rusa apai.’

‘Nama dih?’ ku iya nanya Sali.

‘Tuan Sikh nya besembah alam utan,’ ku Sali.

‘Naka ga nuan tu dih tambap lap! Mati kitai tu laban apai nuan nya. Numbuk Tuan Sikh besembah alam utan. Anjung, anjung pulai baru. Diukum orang kitai tu. Ditunggu orang kitai tu,’ ku Enchelegit. Lalu dianjung iya pulai mih Tuan Sikh nya tadi.

‘Orang, enti orang meda Tuan Sikh besembah alam utan, anang ke deka munuh iya, ngasuh orang minta tulung iya. ‘Tulung Tuan Sikh besembah alam utan, minta berekat minta niat minta untung minta tenung minta tuah minta limpah, ku orang besampi. Enggi nuan tak ditumbuk nuan Tuan Sikh. Nama penyadi dih,’ ku Indai Sali nganu iya.

‘Au! Enda nemu aku Indai Duat. Kumbai aku ukai Tuan Sikh. Enda ibuh Indai Duat, pagi kela, pagi lusa baka nya ga aku nurutka Tuan Sikh,’ ku iya.

Kira sehari lepas nya nurun baru Apai Sali. Nurun baru iya bejalai-jalai. Nyau pemuas iya ke bejalai dia iya meda beruang lugang-lugang ngerumbak sampuk.

‘Ah! Nya iya, nya baru Tuan Sikh,’ ku ati iya bejaku kediri. Nyau besebun chelum gamal bulu beruang. Nyadi pala beruang nya tama ke dalam lubang sampuk, burit iya lugang-lugang pansut. ‘Nya baru Tuan Sikh, baka Tuan Sikh kemari,’ ku iya. Mansang iya kin, mansang semak-sesemak. Iya lalu besugang minta tulung Tuan Sikh. ‘Tulung Tuan Sikh besembah alam utan. Minta untung, minta tenung, minta jereki murah, minta jereki mudah,’ ku iya. Majak ga beruang nya ngerumbak sampuk enda ninga iya. Nya alai nyau enda liat dih ati tudah Apai Sali lalu tempap iya burit beruang. Tak angkat mih tudah beruang nya tadi kenu lalu ngerekak iya. Belaban seduai iya dia. Ama beruang ari atas, ama nya Apai Sali.

‘Anang nganu aku Tuan Sikh. Anang nganu aku Tuan Sikh. Turut Tuan Sikh. Turut Tuan Sikh,’ ku iya. Ni beruang nemu jaku iya. Berekak seduai dia. Nama dih tudah Apai Sali abis rajai tubuh, rajai sebelah mua. Abis ngeliti kenu kulit tudah tuai dikeramak beruang. Udah puas ke berekak enggau iya, rari mega beruang. Dini beruang deka nat dia.

Udah beruang nya rari, tudah Apai Sali pan lalu pulai ga ke rumah. Datai iya di rumah lalu begau bala anak iya meda tubuh iya ngenjing nadai lapang mimit bekau kukut beruang.

‘Nama utai nganu nuan bansa nya apai, nama nganu nuan?’ ku bala sida Nyuki, sida Nyui, sida Nyukak sida Nyuak, sida Kedung-king, sida Kik, sida Tup.

‘Akai-indai! Dianu Tuan Sikh aku tu. Aku deka nurutka iya ku aku, ditempik aku ba burit. Angkat iya tak lalu ngerekak aku,’ ku Apai Sali.

‘Keba nuan tu beli tambap lap,’ ku Enchelegit, ‘baka ni ku Tuan Sikh nya gamal iya?’

‘Bebulu juyam-juyam, bekuku tajam-tajam, bengeli singam-singam, chelum genam,’ ku tudah Apai Sali.

‘Eh! Ukai Tuan Sikh nya, beruang nya. Keba nuan tu tambap beli lap.’

‘Indah nuan dih Enchelegit nangga langit, Enchelegit nangga hari, barang utai padah ngagai aku,’ ku iya nganu Indai Sali.