Enda ulih didirika tali basah, enda ulih didudukka mangkuk belah

Cherita tu nyadi ba menua ke dikumbai Nanga Tapang lalu ngenangka sida apai Bajau sebilik. Rumah sida Bajau tu betuaika Tuai Rumah Achang anak Uging. Bajau nya siku nembiak ke benung ngangkatka diri bujang. Baru lanjau kenu ku orang tuai. Sida Bajau sebilik tu baka pendiau orang bukai mega ba rumah panjai. Nadai kurang nadai mega lebih. Nadai utai nyelai, baka orang mayuh nya mega. Maya taun manah, bulih ga sida sebilik padi. Maya taun enda manah, sama-sama baka orang nya mega suah tak begantung senduk.

Taja pia, Bajau tu bisi siti penyelai mimit ari nembiak bukai. Iya bisi ngembuan ulah ke enda manah, panjai jari. Bajau selalu ditemu ngereja pengawa ke enda manah nya. Tang taja pia, lebuh bisi orang nuduh Bajau nya enchuri, apai iya sereta sida sebilik seruran besalahka orang laban betenahka berita ti enda menuku senentang Bajau nya. Berindik sri pengawa sida sebilik ti seruran nanahka Bajau belama, dia ulah Bajau nya nyau majak nyadi-senyadi, jai-sejai, balat-sebalat.

Bisi sekali orang meda Bajau besadungka pil enggau dadah ngagai bala nembiak sida serumah. Tang nadai siku orang berani besebutka pekara nya sepengudah apai iya ke suah nanah sereta ngenadaika pengawa ti digaga Bajau. Kebuah pia mega laban sida ke bukai nya nangika diri dikumbai nempa sengapa cherita. Kelimpah ari nya, Bajau mega bisi ditemu enggau orang nyelak duit tiru. Pengawa tu dikereja Bajau enggau tawing iya ke sama dikumbai bayat baka iya. Pengawa sida tu udah lama diengkilaka raban polis. Nya alai, enti sida enda ngetu ngereja pengawa nya, enda jerih sida kena tangkap. Besunutuk enggau pengawa Bajau ti bulih duit nengah chara ke enda manah nya tadi, dia sida seblik nyau bisi bendar pengelantang dipeda bulih duit taja pan enggau chara ti enda manah nya tadi. Iya melanja sereta bekenaka duit baka ke enda nemu abis.

Nyadi lebuh malam siti, benung bala raban sida Bajau deka ngerumpak bank ba Pasar Maling, dia sida iya tak enda mukai-mukai lalu kena tangkap polis. Bala sida Bajau kelebih agi apai enggau indai iya sereta kaban belayan ke bukai bendar amai ngarika Bajau madahka iya endang nadai ngereja pengawa ke salah nya. Bala sida sebilik bendar amai begigaka luyar ngambika bisi dikena ngarika iya maya bechara. Sida arap bendar ke iya enda salah lalu semampai nyukung sereta meri bantu naka ke ulih awakka Bajau nya enda kena tinggang ukum. Lebuh pemutus pechara dibacha akim, terang bendar Bajau amai bisi nguji deka ngerumpak bank. Iya mega dituduh nyelak duit tiru sereta bejualka pil kuda.  Bajau diukum jil belabuh ari iya ke ditangkap polis.

Lebuh ke ninga pemutus pechara nya, bala sida sebilik bela nadai bemunyi, bela nadai engkeretik tak sengian baka kampung dalam ke nadai didinga ensung nyumbuh bujang. Sida endang nemu dini nya ulih didirika tali basah, enda ulih didudukka mangkuk belah. Baka ni kati pan chara nyukung sereta nulung orang ke endang amai-amai salah endang nadai guna baka ke manjah ai ngagai daun keladi. Sida mulaika diri ke rumah panjai mai mua malu ketegal ulah Bajau enggau pengawa sida ke deka amai nanahka Bajau belama.