Kena insap Lemetak

Nyadi sehari nya, benung Lemetak berandau enggau Mayau nya tudah Pelanduk benung ninduk kediri ba selepak bandir enda jauh ari nya laban ke nangi kediri ulih bala jelu besai ke bukai. Lebuh ke tinduk nya iya lalu tedani ninga Lemetak ke nyapa Mayau, tang Pelanduk laban ke baru dani tak lembau bendar deka enggau Lemetak nyapa Mayau laban ke agi deka tinduk. Pelanduk semina mendingka randau Lemetak seduai Mayau nya aja laban ke enggai dikachau kenu ku ati iya. Udah Mayau nya tadi mupuk, nya baru Pelanduk nya ngemansutka diri ari pun bandir nya lalu mansang ngagai Lemetak.

“Amat sigat ga gamal tudah Mayau nya tadi peda aku. Aruh ga sida ke bala dara mayau ngelingi menua tu abis udah disapu iya magang,” pia ku Lemetak enda berasai bejaku kediri.

“Mayau ni ke ku nuan nya Unggal?” pia ku Pelanduk nanya Lemetak.

Lemetak lalu tekenyit laban iya ke enda naga bisi Pelanduk semak alai iya dia.

“Bisi dih tadi, tak baru ngelebus Mayau ke chelum apus nya. Iya ke manah gamal ditupi anak mensia ke bempu langkau ba tengah umai ba serimbing bukit nya,” pia ku Lemetak nyaut Pelanduk.

“Eh! Enti Mayau ke chelum apus nya, kita anang sekali-kali arap ke jaku iya. Naka iya pengabis  pemula sereta pengabis iya pengelusu orang iya nya peda aku,” pia ku Pelanduk.

“Kati alai nuan tak tau ngumbai iya baka nya dih, tak nemu ngumbai iya ngenyai nya?” pia ku Lemetak ga nimbal Pelanduk.

“Dini aku tu tau enda nemu. Nyau puas aku tu udah begumpul ke buah buan ba sebelah tisi langkau anak mensia ke nupi iya nya . Tak nadai kala aku tu meda iya nya bulih Tikus kediri. Semina utai ke di empa iya nya ngelama tu endang semua utai ke diberi orang magang,” Pia ku Pelanduk .

“Kati kita bengat enda nemu Mayau ke enggau nuan berandau nya tadi udah dipeliri anak mensia ke bempu iya suba laban iya ke udu mawa sereta deka bendar berekak enggau mayau lelaki ke bukai berebut ke mayau ke indu. Nya kebuah iya ke lalu enda bebini ngelama tu,” pia ku Pelanduk ngemanjaika cherita iya baru ngagai Lemetak.

“Ninga iya tak nusi diri ngena bendar ku munyi tadi, tak madahka semua indu dara mayau ke bekelingi ditu udah abis dijagul iya magang,” pia ku Lemetak.

“Enda ke banggar iya nya tadi mantaika pemula ngagai nuan. Kena iya belalai kediri ke enda tau nganu orang indu agi lalu enggai nyadi bebini,” pia ku Pelanduk ga nimbal.

“Teperasa bendar ga aku tadi ninga jaku Mayau nya tak bengat ngena bendar munyi,” ku Lemetak.
“Kati anak mensia ke belangkau ba serimbing bukit nya bisi nupi manuk sida iya,” pia ku Lemetak ga bejaku baru..

“Bisi mayuh bendar manuk tupi sida dia,” pia ku Pelanduk madah ngagai Lemetak.

“Kati kala kini nuan nguji bejalai ba sebelah baruh langkau sida nya,” Ku Lemetak.

“Enda aku rajin bejalai ba endur nya.  Nakaka pemalat bau ba baruh langkau orang nya,” pia ku Pelanduk. Mua tudah Pelanduk lalu lese-lese malik ke bukai , malu belalai kediri empu ke endang bagas bepakaika tai manuk lintung ba baruh langkau anak mensia nya.

“Ka mupuk aku tu. Deka bejalai ngagai sungai sepiak nyin,” pia ku Pelanduk ngelari kediri laban nangi enggai kediri tau betambah malu enti sema Lemetak nanya ke utai mayuh agi ngagai iya.

“Pama enti nuan deka mai aku enggau nuan mindah kin,” pia ku Lemetak nya.

“Nama penyalah nya dih, ukai nya tak ngiruh aku. Di ma enda ga, ukai nya besai dih nuan ke empakap ba tubuh aku,” pia ku Pelanduk ga nyaut.

“Nya mih laban aku ke enda tegar bejalai baka orang mayuh. Tak ngira diri empakap minta ma nuan aja mih,” pia ku Lemetak ga minta kasih ngagai Pelanduk.

“Aram mih mupok kitai enggai ke laun tauka hari majak tinggi lagi,” pia ku Pelanduk.

Ninga munyi nya Lemetak lalu empakap engkating ba belakang Pelanduk. Pelanduk pan lalu beguai guai mupok mai Lemetak enggau iya. Nyadi Lemetak nya tadi ukai semina tak empakap engkating ngapa tang lalu ngunjam kediri nginsap darap Pelanduk. Lama agi sepi Pelanduk lain agi ga asai tubuh iya ke alai Lemetak nya empakap tadi. Iya mih nyau kelama, sepiak Pelanduk belakang iya nyau asai ke selar enggau api. Iya lalu nyerauh lalu beguai-guai ngelarika diri belanda ngambika Lemetak nya tingkil ari tubuh iya.

“Nama main nuan tak ngenegar tu dih naban ke aku aya , enggai ke nuan teterap ngapa lagi,” pia ku Lemetak ngayah ke tudah Pelanduk nya tadi.

Nama agi dih nya ngasih Pelanduk pedis agi ati sereta ringat ngagai Lemetak. Pelanduk pan lalu belanda enggau naka pengabis tulang iya dalam babas. Nyau baka ke bisi antu ngagai empa penegar iya belanda ngichaka Lemtak nya tau tingkil.Sambil ke belanda nya ni bagi batang kayu enggau babas endang dikindas iya magang ngambika Lemetak tingkil. Iya mih nyau kenyang Lemetak nya tadi baru iya ngelengkaka diri ari ke dibai Pelanduk.

Lebuh datai ba sungai ke deka digagai Pelanduk , iya pan lalu enda chamang-chamang terejun lalu nyelamka diri dalam sungai nya laban ke udah kelalu ikak. Sepi iya belakang iya nyau bepedi laban bekau gigit Lemetak ke nginsap darah iya nya tadi. Ai sungai nya pan nyau mirah laban darah iya bekau ke udah diinsap Lemetak nya tadi.

Dia mih tudah Pelanduk nyau chebur-chebur masu diri baka ringin ke mansai laban ke udah diinsap Lemetak. Nama nya nyelam, nama nya pansut ga pala iya ari ai. Leka mata iya nyau chirak-chirak baka mata bur-ng pilin. Iya endang enda bedulika orang bukai tak rindang diri lalu nadai ngira utai bukai ke tau nganu iya.