JABAH

JABAH NYA? ENDA PATUT! Tang ... kada enda iya nya dih? Ya ... sigi iya mih nya. Sapa agi?  Nadai orang bukai. Jabah. Amai ... Jabah mih nya. Enda patut ga mata aku silap. Enda patut ga pengingat aku salah. Enda patut ga asai ati aku nipu aku. Endang Jabah mih nya. Indu ke gagau bepilihka pating bungai ba kaki lima enda jauh ari aku nya endang Jabah dipeda aku.Enda salah mata aku.

‘Jabah...’

Iya malik ngagai aku seraya ninga aku ngangau. Kami duai beperening pangan diri. Mua iya dipeda lantang ngasuh ati aku bechampur-baur. Keketap tungkul atau. Nyau kesal kandang kamai. Begetar-getar...kekimut mulut baka ke deka nusun leka jaku tang nadai seleka pansut ari lubang nyawa tu. Baka antu lapar aku meratika mua iya. Mua ke kala ngelinsu kanvas pengingat aku nya mengkang enda berubah. Mua ke seruran dipeda aku dalam mimpi nya tetap meruan burak pepelu, beresi sereta memelan baka suba.

‘Jabah!’

Kangau aku spontan. Seraya nya iya malik sereta nusun singkang iya. Asai ke di ambi mimpi aku betemu enggau Jabah.

‘Jabah, nganti aku dulu.’

Tak nadai nyaut seleka mukut, nadai malas seleka beras. Majakka singkang iya. Singkang iya majak jampat-sejampat. Aku asai ke dikena palu. Tang ati aku bejaku kediri berandau nengali. Maya ti baka tu endang lama udah aku ingin sepengudah ke puas besampi sereta bepaut ba pengarap ninting hari. Ba mua iya aku baka batu, nadai memunyi.

‘Jabah ...’

Iya ngangkatka mua iya lalu malik ke bukai. Pemajik mua iya endang baka selama baka suba baka kelia menya. Tang aku lalu baka orang isu nadai tepansutka seleka jaku. Enti asai ati, asai ke deka ku kendas ai mata aku ke neritik naya mansa kuyu aku tu. Asai ati aku deka aku berap enggau naka iya. Ngambika iya nemu, ngelama tu aku nyau sarat enggau pengelengau ke iya.

‘Entara tua udah nadai nama-nama agi.’

Asai ke deka pechah lubang pending aku ninga saut iya. Nya mih nyawa ke kala didinga aku ke ngasuh ati aku lela pengerindu lela penyayau ke iya. Munyi sada nyawa nya mih ke kala nyerungkai mayuh bengkah penusah dalam kamus pengidup aku suba. Lalu munyi sada nyawa nya mih ke agi ngasuh ati aku rindu lelengau laban udah lama enda didinga.

‘Aku minta ampun. Aku nadai salah. Pechaya mih ke jaku aku!’

Bebendar aku nguji nerang ngagai iya. Aku nguji mantaika pengasai ati ba tikai pengarap ti disempulangka enggau segenteran sampi. Asai ati endang deka aku seraraka semua dosa ke disan aku ngelama tu. Aku tetap diau diri. Ari tadi, diperatika aku iya endang nadai ati deka beperening mata enggau aku.

‘Udah lama aku ngiga nuan, Jabah.’

Mata iya lekat ba mata aku baru. Geremai asai ati, nyau bebulu asai ati ke salah aku maya meda mata iya mansau mirah ngelaika penusah ti ditanggung dalam sejarah pengidup iya ngelama tu. Enda mukai-mukai iya lalu nyingkang nyambung pejalai iya tadi.

‘Jabah, aku minta ampun ngagai nuan.’

Iya endang mimit nadai engkeretik. Aku nemu, iya agi nyimpan dendam sereta pemingking iya ngagai aku. Asai ati ke tusah deka diperetika sepengudah pengerindu ke udah dipadu kenyau ari mit jelungan di rantau jalai. Asai ati ke tekubur sepengudah semua semaya danji anchur lela retai dibai ujan enggau panas.

‘Aku... ari suba endang meruan ingat ke nuan, Jabah.’

Ayat lurus tepambur ari mulut aku. Jabah tetap aku simpan dalam meligai ati aku taja pan realiti iya kami duai udah lama beserara. 

‘Udah mih nya ... anang ngerapitka sejarah lama enggau realiti kemaya hari tu. Dunya udah berubah ....’

‘Tang pengerindu aku ke nuan enda kala berubah!’

Iya tuchum ngelese seraya ngilingka pala. Singkang iya berenti. Panchar mata chelum iya tajam nuju ke mata aku.

‘Pengerindu? Enda ibuh agi disebut leka jaku pengerindu. Nuan mih orang ke enda nemu reti pengerindu. Nuan ninggalka aku dalam pemalu. Nuan mih ngerubuh juluk ati tua ke betaun-taun udah tua tempa ngelama tu. Nuan muai aku baka uras di tebing jalai baka reba ba dalam sungai. Tang ... nuan sehari tu enggau naka ego nuan madah nuan agi rindu ke aku. Nuan mih lelaki ke jai amai di dunya.’

Jabah lalu terus bejalai beguai-guai ke adap jalai alun, lalu ngetanka teksi ke bisi mansa dia. Iya tama ke dalam teksi. Enda lama udah nya iya nadai agi dipeda mata. Aku tegepang. Rambai jaku Jabah nya baka tali belati ti tajam melah dada aku. Asai ke nancham tangkai ati aku. Asal nesal baka ai bah ngelanggar tubuh enggau runding aku. Enda berasai kedua-dua mata aku betemu. Aku nguji muai asai ati aku ke nesal ke ninggang pengidup aku. Aku nguji berundingka Jabah maya tu ti benung nyabak sesedan dalam teksi.

Asai ke deka nyerauh aku madah ngagai dunya aku agi rindu ke Jabah. Pengerindu enggau penyayau aku ke Jabah enda kala padam baka mata panas. Jabah enda nemu. Iya enda mereti utai ku aku. Utai ke nyadi nya ukai ketegal pengerindu sereta penyayau aku ke iya udah berubah. Aku nguji muka mata aku belubah-lubah ... perati ku semua ke ngelingi aku. Jabah udah nadai agi.

Udah seminggu Beremas ba sepital. Kempang ati nuan lalu enda ngabas iya. Kasih iya. Ninting hari iya nanya nuan. Aku tu indai nuan nyau malu ninga iya serebana. Dini alai aku ka ngelalaika mua aku?’

Ari siti topik ngagai siti topik ba surat berita nya dijeling aku enggau ngelansa. Aku lipat baru surat berita nya lalu ku empas ba atas mija.  Kaki aku ke belunjur aku guyang belubah-lubah. Sigi dipeda enda bebasa amai ba mua indai aku maya nya. Puas ke baka nya aku lalu angkat ari sofa, bejalai ke mua pintu. Dia aku ngetu enda lama. Merati sereta nimpai jauh keluar.

‘Nuan indai semina nemu kasih ke iya. Katika aku tu anak nuan dih, mimit pan nadai mih nuan kasih ke aku. Nuan enda malu ngagai iya ... tang nuan enda nemu naka pemalu iya aku. Nuan enda nadai kala berundingka penusah pengidup aku kemaya hari tu. Pengidup aku udah runtuh udah rubuh. Tang nadai ngawa ... aku enda parai ngapa ketegal jai ngagai indai diri.’

Mua indai aku berubah baka gaya hari – mambam. Aku sintak seput panjai sereta ke lepas pansut enggau naka penyesal ati. Endang iya ... aku udah nadai agi ulih ngelalaika semua pekara tu agi. Malam tu ... indai patut nemu, indai patut sedar sereta indai patut ingat naka-naka iya aku udah ngemeratka jaku iya ketegal serega sereta ketegal basa ke indai. Ukai senaja ngasuh sengayuh mangka gandung.

‘Nuan indai ke nyerara aku ari Jabah. Nuan enda kala berundingka maruah orang. Ketegal Jabah nya indu rumah panjai sereta nadai degree nuan ngaga iya baka kupang temaga.’

‘Nuan enda nemu utai, Jimbun. Indai semina deka meda pengidup nuan lantang senang!’

‘Pengelantang enggau penyenang pengidup ari ai mata orang ke senaja dituntung nuan enggau penusah. Dini nya bisi berekat ari Petara, indai? Nya kelai iya diatu ... Petara malas pengawa ke digaga kitai. Tang aku tetap nerima nama-nama utai ke diberi Petara, semina aku berasai nesal laban nuan indai enda kala nesal ke penyalah diri.’

Aku pansut. Keluar. Ari jauh aku ninga indai kisi-kisi nyabak kediri. Remang mirah maya lemai baka ke ngelalu pengaga ke besilup dalam petang ti keleti. Aku idupka injin kerita seraya nya mih aku ninggalka rumah besai reta pesaka niang apai aku. Bejalai tang nadai temu tuju.

‘Kati baka indai, sida nerima?’

Indai tuchum lelegup. Datin Maria, Puan Inu enggau Datin Jabai semua tuchum lantang.

‘Besedia nuan Jang ... sida minta berian 5000.’

Ku indai bejaku seraya ke mandang mua iya ke tuchum. Chelapa temaga ke bisi ukir naga dibantaika ba mua aku. Tujuh lambar daun sirih baka ke empikil enggau naka temegah ba dalam chelapa nya.

‘Benasit amai nuan Jimbun, bajik memelan amai indu  ke dipilih nuan nya,’ pia ku puji Datin Maria seraya ke nyubit lengan aku. 

Aku gaga amai. Naka-naka iya. Ama kembai ama enda dada aku lebuh orang muji Jabah.

‘Enda lama agi rami melah pinang mih nuan Jimbun. Baka bulan dipagar bintang!’ ku jaku tambah Puan Inu.

Munyi ketawa Datuk Geran enggau Encik Bunsi nyau munyi buluh pechah. Pekara lama ke ngemunuhka pengidup aku datai seleka-seleka dalam pengingat aku. Aku tengelam dalam tasik pengelantang ke nadai alai manding. Indu ke dikerinduka aku rambau sekula deka diempu aku enggau rasmi. Nya mih mimpi ke chukup manah dalam pengidup aku. Enda berasai aku tekanyat tedani ari mimpi manis. Enda nemu nya aku udah karam dalam tasik pemedis enggau pemerinsa. Semua mimpi sereta pengingin ati aku anchur lela maya aku betemu enggau Beremas empat hari udah nya.

‘Kaban belayan udah lama nganti. Sekawah asi abis dinahka tang sampai padam mata panas lalu nadai dipeda kemayang raban sida nyerang. Sinu ati Jabah. Semina Petara aja nemu. Naka iya pemalu apai indai iya nadai alai engkah agi. Jaku jai ke didaja ke ulu ke ili endang enda ulih diseliahka baka leka ujan labuh maya siang hari. Enti deka ngakal orang anang mih ngena chara tu. Tu bisi kaul enggau maruah orang ....’

Nadai badu-badu jaku jai pansut baka mutah ari mulut Beremas, tawing ke sama enggau kami besulu. Mulut ke seruran muji pengangkun pengerindu aku ke Jabah udah berubah baka meriam ke medil selangkuh tubuh aku.

Aku bungkam. Asai ke ditinggang punggu, asai ke ditepan gunung berapi, angus abis tungkul ati aku. Berasai baruh langit ditimpai. Lela semua juluk ati aku diempa api pengerindu diatu ke nyau ngasuh aku telih bedarah, bakal rajai ketegal pengerindu ke salah tuju. 

Enda mukai-mukai dunya aku puang sereta sunyi. Sengian baka kampung dalam nadai ti didinga ensung nyumbuh bujang. Tubuh aku berasai lemi, pengidup asai ke terebai. Pengawa nanya Jabah ke disemayaka indai bekalih nyadi pengawa betanyaka Beremas. Nya ke nadai ditemu aku. Malu amai aku.

Kenyau ari nya semua pengelantang ke disepi aku ngelama tu udah tebelunggang ditelan hari.  Enggau naka pengenyit ati, Jabah terus lesap ari pengidup aku. Sumpah seranah  indai asai ke enda ulih ke enda aku telan segenda segala lebuh maya aku nguji ngeruga kebuah ulah iya ti baka nya. Nya mih enti enda ngenangka iya ke mai aku ada di dunya tu, ngujungka aku nyerahka diri ba dada timpuh sepengudah sepuluh taun aku masau awak begigaka Jabah.

Baka orang ke kena tan maya perang, aku teterap tetingkap ba meligai neraka juluk ati indai aku. Ketegal indu ke murah nya, indai sanggup ngadaika nasit aku. Indu sempit ke betupingka  peturun ti manah sereta belalai ba astana penagang udah narit ati indai aku enggau naka pengelama. Besai keruang mulut indai tuchum lebuh ke udah beambu insan enggau Tan Sri sereta Toh Puan.

Endang udah selatan lelaki alah jamah orang indu. Dalam aku benchi, muras sereta asa aku insap mega madu ba tubuh Beremas. Enda berasai, ngerayap rachun ngagai segenap selangkuh tubuh aku ari teda madu ti aku insap. Diatu, aku mega nerima reta pesaka virus jai ke galak tumbuh ba tubuh iya ketegal sekali tegup maya malam keterubah tua iya betemu. Chis!!!

Tegepang tekenyit ati aku ninga munyi hon kerita di belakang engku. Aku benung tegeram di simpang runding. Aku sintak seput pepanjai lebuh aku tepedaka lampu udah gadung di mua aku. Untak aku agi nyinuk berunding ke kuing ti deka dituju aku udah tu.

Ba mua sebuah kelab dangdut, aku lalu ngetuka kerita aku. Kelab tu mih ti suah dikenang sida Bundan enggau Gerinang, bala staf ke gawa enggau aku. Aku terus nyingkang ke dalam enggau runding ke benung begeregiti. 

Ba sukut kelab nya aku lalu ngelabuhka burit nudukka diri. Mata aku ngerayap matau tiap-tiap keduk kelab ke baru ditiki aku nya. Diperatika beberapa pasang nembiak redak benung karam dalam tasik pengerindu betanda seraya bepeluk enggau pangan diri baka ke nadai empedu. Kamah amai ulah sida nya diperatika aku, meda ulah sida ke udah jauh amai udah labuh ari tikas moral. Agi ga semua sida nya orang Iban memagang. Mimit nadai mih sida sedar, sida nya mih ke ngeruntunka tiang adat ke udah beratus-ratus taun ditempa digaga aki ini sida menya. Lampu neon begenyeling bekebelik nitih munyi tiun lagu, inggar sereta tak ngasuh ati aku begeremai. Aku ngereduas angkat deka pansut ke luar.

‘Wai... duduk mih dulu. Am sama-sama ngirup sambil beperindang.’

Sada munyi orang ke manja amai nyapa ari belakang. Nyawa ka asai ke kala didinga aku ngelama tu. Sinonim amai munyi orang nya. Aku tegeram sekejap, nguji berunding dalam ati enda lama. Baka kilat aku lalu malik ke belakang.

‘Jabah ... .’

Di baruh lampu ke kekelap, perati aku mua nya ke penuh enggau tanda tanya. Mua ke bedau tentu temu pengujung. Iya lalu nguji nguing ke bukai. Nguji deka rari ari aku. Begeguai aku maut lengan iya lalu aku genggam tegap jari iya. Nadai seleka jaku ulih pambus ari mulut aku. Taja baka nya, aku enda sanggup agi beserara enggau iya.

Ba atas dada aku iya nyabak ngenang nasit diri. Begetar tubuh iya bereta enggau sabak beleka mayuh macham pemerinsa. Pansut semua pemerinsa ke dikemeran iya ngelama tu dipelam dalam tirai pengidup iya. Rawan ati aku. Enda liat aku lalu merap iya ke tanda aku mega bekunsi pemerinsa enggau iya. Endang ngelama tu aku ngarapka ulih betemu mua enggau iya tang mimit nadai mih aku nyangka aku ulih betemu enggau Jabah ba endur ke baka tu. 

Ba baruh pun kayu ke ayung, kami duai nudukka diri. Aku terus ngerandau iya. Ba baruh lampu neon ke kekelap nya, kutak runding aku terus beputar ngagai sejarah menya. Jabah indu ke malu ke nemu mentin diri sereta seruran mantai ulah ke manah. Mesai bulu mata nadai mih aku nyangka iya tau baka tu.

‘Dunya udah berubah. Arang ke dichulik ba mua aku udah enda ulih direrak agi. Jaku petenah ke beteresit enda ulih diseliahka wai ...’

Sada nyawa iya tesekat. Aku berasai asa, balat agi asa laban iya milih pengidup ti baka tu. Tang sapa  aku ke patut ngukum iya? Ukum nya baka ke ngeludah ke langit.

‘Semaya indai aku deka nanya Jabah, tang lain ke nyadi ... indai semina bepura-pura. Indai senaja baka nya dikena iya nyeraraka tua. Lebuh aku nemu utai ke nyadi, aku begaut ngiga nuan di rumah panjai. Tang nuan udah pindah.’

Enggau naka penelap aku nguji ngerintaika rambai jaku ngambika iya meretika utai ti udah nyadi. Iya merening nemban ngagai mata aku. Engka deka nentuka pengamat jaku aku. Aku belubah-lubah nganggutka pala ngambika iya arapka pengangkun aku ke iya enda kala berubah. Aku genggam rat jari iya ngambika iya ngasaika benyut pengamat ke seranyut ari tubuh aku.

‘Kena aku nebus dosa aku ka ngambi nuan, Jabah pulai baru.’

‘Enda ngemudah nya. Jabah indu ke kamah. Pengidup belunyau enggau dosa.’

Aku nemu iya merinsa. Iya mih ke nanggung pemalu enggau pemerinsa telih sepengudah ke dipadahka deka jadi enggau aku tang nadai datai maya bepinta nya. Aku nemu iya mensena ketegal nya. Dilanyai enggau naka-naka.  Nadai siku indu di dunya sanggup bejualka nilai rega diri sepeneka ati. Enti ukai ketegal deka ngalitka pemerinsa diri tentu iya mega ngujika deka nambun lubang sejarah ke jai menya.

‘Nuan tentu udah bebini. Tentu bisi anak ke memelan sereta pandai ... .’

Aku sengian. Iya nyintak seput panjai.

‘ Tang aku tetap deka ngambi Jabah laban Jabah endang enggi aku.’

‘Jabah nadai ati ngiga pengelantang atas pemedis orang bukai. Manah agi Jabah baka tu. Jabah berasai lantang baka tu. Agi mega Jabah ke diatu ukai Jabah ke suba. Jabah ke diatu ditunyau lutak ke bebau but.’

‘Nadai ngawa nya. Awakka aku ga masu semua lutak nya ketegal aku mih udah maruk nuan enggau lutak nya.’

Deka aku degika baru astana pemanah ba iya ke udah rubuh nya. Deka aku pagar iya enggau iman ngambika enda diserang pengerindu ti jai. Deka aku gaga sebuah telaga penesal ati  ngambika ulih nuchi sereta masu semua dosa ke udah ngerekap ba tubuh iya. Deka aku pulaika pengidup ti baru ngambika iya nadai agi dipangka gelumbang umbak besai.

‘Tang ... ‘

‘Aku enda ngambi nuan ke bini. Aku enda negu tubuh nuan Jabah.’

Lapa? Kamah pia?’

‘Ukai pia. Sayau. Laban aku sayau ke nuan, nya mih aku enda negu nuan, Jabah. Aku nguji enggau naka ulih meri Jabah siti pengidup ke meruan. Awakka lebuh aku lesi dibai hari, Jabah ulih bediri kediri.’

Aku nemu runding Jabah nyau beba. Enda ngawa. Awakka... . Awakka aja! Pagila lusa dudi hari iya tentu Jabah mereti, nemu utai ke nyadi. Oh Petara... aku minta siku lelaki ke manah jadi enggau iya ila lebuh aku udah danjan dibai bulan.

‘Aku sayau ke nuan, Jabah. Pengerindu sereta penyayau aku ke Jabah enda kala berubah sereta enda deka berubah baka ke suba, diatu dataika selama-lama iya. Nama aku agi enseput, aku sigi deka nempa baru pengelantang ke udah kala runtuh suba taja pan enda ngemanah ke menya.’

Iya nyabak baru lebuh ke dipangku aku. Sabak ke sikuk-sikuk balat amai ngasuh ati aku sinu. Nyabak mih enggau naka pemuas ati nuan, Jabah. Pansutka semua penusah ke besangkar dalam pengidup nuan ngelama tu. Awakka malam tu nyadi saksi laban pagila penampak besereta enggau pengelantang deka datai ngelaluka nuan. Nyabak mih enggau naka pemuas ati taja pan ai mata nuan enda mudah masu nanah nuan suba tang sekurang-kurang iya ulih nyerara nuan ari telih lama bedarah baru.