Tanah

Jimbun nyau puas nimpai ari jauh. Jauh amai timpai Jimbun. Agi besai amai rampa tanah ti patut tembu ditebas iya. Sedandang, rapas mata dipeda. Endang baka selama sida dia nama udah berimba muka kampung puang sigi lalu ditebas. Peda terang amai ari jauh. Enti bukit manah alai bumai tauka nanam jagung. Enti tanah emperan mayuh macham mih ulih ditanam dia. Rian, lensat, sibau. Dabai pelaba ke deka mih tumbuh. Jimbun endang bisi juluk ati baka nya. Enda berasai tak bejaku kediri mih tudah Jimbun tang nadai tentu didinga serengut nyawa. Serap-serap munyi babas ditebas Jimbun. Sehari nya iya endang senaja enda mai indai tuai iya. Kapa enda iya gawa nganti kediri. Agi mega bini iya nya benung betubuh bisi. Jimbun enggau bala pangan iya nya sama-sama berimbaka kampung ti dikumbai sida iya Kampung  Bukit Entupang. Bajang, Chaong, Dungkong, Empaling, Lintong, Bedali enggau Malang.

Lintong mih nyadi tuai sida. Sida sedada sama seati deka enggau naka ulih muai agang berimba bebukaka kampung nya. Naka-naka iya pemerinsa sida berimbaka kampung puang dia. Enti dada enda seati, muka kampung enda segempung sigi tusah. Pemujur sida endang bepanggai ba tulang enggau ati sida aja.  Jimbun deka pulai. Hari nyau tengan niki. Terit mata panas. 

Matahari ke dipeda niki ke langit balat amai ngangatka batang tubuh. Jimbun baka pelanda ukui nurun bukit nuju ke motosikal iya. Deka beguai pulai kenu laban deka belelak. Badas enti ulih nindukka diri maya di rumah lagi. Bedau lama udah langkah pejalai iya tak ngetu ngenyit mih tudah tuai laban tedingaka munyi ke enda kala didinga iya ngelama tu. Ukai munyi burung tauka tupai. Tak munyi tegung. Puas ga Jimbun malik kiba malik kanan meda sebelah nya. Sekali tu baka ke udah diatur Petara betemu enggau Aya Belang Pinggang!

  

“Sapa ngasuh kita berimba ditu?” pia ku Tuai Penerit Adat ari Opis Survei enggau Tanah. Jimbun tak beserinuk diau enda memunyi baka ke ba kampung dalam nadai didinga ensung nyumbuh bujang. Jimbun semina ulih malik ke diri ngagai lori Opis Servei nya. Kada enda ditangkap iya nya lagi diasuh nepan lori. Bedau temu nasit iya. 

“Kati nuan enda nemu utai?” pia ku tuai nya nguji ngegapka Jimbun. Ngetu baka puyu mabuk keruh, tegenung baka empelekung mabuk ambuh mih tudah Jimbun. Enda berasai fantasi mimpi jai iya bebali nyadi realiti. Tanya ke ngasuh iya tegepang nya beguai disaut iya.

“Lintong!”

“Sapa Lintong? Dini iya diau?”

“Rumah iya ba seraka jalai nyin.”

Jimbun kena tan. Begeguai niki lori. Bisi beberap ikut pemesai Opis Survei enggau operasi sehari nya. Sida nyaga Bajang. Irauka Bajang nya tak ngelarika diri. 

“Enda aku rari.” Nya aja ke ulih disebut Jimbun. Sida pemesai nya bela malik ngagai pangan diri. Bisi ga asai penyinu ati sida meda Jimbun. Enti orang tu ditangkap nama penyadi ngagai sida sebilik?

“Lapa apai lalu bedau pulai ndai?” ku tanya Kelabu. Bintang semina diau enda engkeretik. Bisi berasai rawan ba dalam ati iya, tak kesal di jungkal kandang kamai. Nangika ke lalu bedau pulai. Enti ngelama tu udah pulai mih maya tu sama beserumpu makai sida sebilik. Tang sekali tu enda baka selama. Baka ke bisi utai nyadi. 

“Enda lama da agi datai mih iya. Anti dulu mih. Lagi kitai sama-sama makai,” pia ku Bintang madah ke anak iya, Kelabu. 

Kelabu lalu mansang ke mua pintu ninggalka indai iya. Duduk mih Kelabu ba mua pintu nganti pemulai apai iya ke lalu enda datai-datai. Sekali dua bisi ga iya bediri merati jauh. 

Merati mih tudah tuai ari jauh. Ngiga kenayak apai iya. Kelabu anak mit. Iya baru ga beumur enam taun. Ba apai iya mih iya bepanggai. Bintang majak nangi. Ati iya majak ketap-ketap. Ninting kali laki iya deka nurun ke Kampung Bukit Entupang, semua jaku lalau enda leju dibantai iya nyadika bekal laki ke dikesayauka iya.

Bintang endang bisi ati deka enggau laki iya. Nulung naka ke patut. Tang laki iya nemu naka pengulih sereta penguat orang indu. Nadai ngawa mih enti Bintang diau ba rumah. Bintang ga nyau sarat betubuh bisi.

Laki Bintang nya siku ari raban nembiak ke berimba muka tanah ambika bisi alai betanam. Bisi sekeda nya bisi ati deka nanam sawit, bisi nya deka nanam lada lalu mayuh utai tanam dibukai. Sida tu berimba muka tanah laban deka nupi bini anak sida. Penusah ngepunka pengawa nya enda tentu ulih ditiu ngena jaku. Kereban pengawa ti enda chukup suah amai nyadika penanggul dalam nembuka kereja.

Bintang nyenguk ke luar penjan. Sigi amai. Laki ke dikesayau iya lalu bedau pulai. Enda lama udah nya dinga derut motosikal mansa rumah iya. Kada enda Malang. Begeguai tudah Bintang belanda ke mua pintu. Sigi amai Malang mih nya enggau bini iya Jeba. Lalu ditan iya seduai melaki bini dia. Mua pengirau ati Bintang terang amai ayan ba mata Malang enggau bini iya. 

“Nama utai Bintang?” tanya Jeba.

“Jimbun aa lalu empai pulai. Lama amat ga udah.”

“Pia? Kinika iya dih?”

“Bukit Entupang. Ari pagi tadi. Selalu iya udah datai maya tu kira jam 12. Tu udah pukul dua lalu bedau ga meda batang tubuh iya.”

“Engka iya gawa overtime,” pia ku jaku bungah Malang. Enda berasai bau Malang ditepap bini iya ari belakang.

“Ukai betundi nya,” ku Jeba. Mua Bintang majak mandangka pengirau ati iya baka mua hari ke mambam. Mata mirah singin deka nyabak. 

“Tatka ati nuan, Bintang. Lagi aku ngabas iya kin,” pia ku jaku lalau Malang ngagai Bintang. Berumban baban mih tudah Malang nyetat motosikal iya lalu neruska pejalai iya ngabas Jimbun. Bini iya tinggal laban deka enggau ngibun Bintang ke nganti penatai laki iya Jimbun.

“Endu ukai dek enda nemu, Bukit Entupang nya asal iya endang kampung dalam. Sida berimba laban deka bekebun dia. Macham-macham utai dia.”

“Enda ibuh besebutka utai nya, Bintang. Besampi mih ngambika semua selamat,” pia ku lalau Jeba. Sesempa pinang, peda tak bisi Malang ngechul enggau laki Bintang. Tuchum lelegup tudah Bintang meda Jimbun bisi enggau.

     

“Sapa ngasuh kita berimba ba kampung tu?”

“Kami empu. Kami semua tu ke ngereja tanah tu,” pia ku saut Lintong enggau naka penelap ati. Ke sama enggau iya dia sapa agi enti ukai Bajang enggau Chaong. Dunkong baka ke udah kena tan. Jimbun, Malang enggau   nadai dia. 

“Ukai kitai enda nemu pengawa kita ke berimbaka tanah kampung tu siti pengawa ti salah. Nama kitai enda ulih berunding?”

“Enti kami enda berimba ditu, nama utai diberi kami ke empa bini anak kami dih?” nyau muras munyi jaku Empaling. 

“Enti tuan ulih meri kami kereja nadai mih kami kiruh muka tanah ditu. Enda ibuh tinggi pengawa, kereja nyadi jaga enggau opis boi nya pan udah manah!”

“Ukai pia, pengawa ke digaga kita tu udah salah, ngelanggar undang-undang.”

“Ba penemu kami ke diau di genturung menua tu, nadai gawa nya baru salah. Enggau tulang kami empu mih kami gawa. Kami tu raban Kelab Gerakan. Enti enda begerak dini kami ulih makai!” pia ku Empaling nalat Tuan Survei nya.

“Kami begelut berambunka nyawa laban semina deka ngidupka bini anak kami berimba muka tanah ‘haram’ ku nuan, tuan. Enti tuan tetap deka nangkap kami alau mih. Tangkap mega Jimbun, Malang enggau Bedali,” pia ku Lintong.

Sida sama-sama malik ngagai pangan diri ninga jaku Lintong nya. Nama Lintong nya ngaga pemutus penemu ke gila! Trak enggau lori penerit adat nya lalu mansang nuju ngagai Bukit Entupang. Tanah ti diperimbaka sida ulih dipeda ari tebing jalai. Engka nya mih ila semina nyadi buah kenang aja. Semua pengawa sida ke digaga ngelama tu semina baka ke muai garam ke tasik aja. 

“Tangkap dulu orang nya,” ku Lintong. Tekenyat tudah Dungkong ninga jaku ke tepambur ari mulut Lintong.

Duku ke dipegai dikena iya nebas tadi nyau tebelengka ari jari iya. Mayuh bala orang dia maya nya. Indah tudah Jabah pan agi nebas. Sida ke penerit adat semina diau enda engkeretik. Lintong enggau bala pangan iya malik ngagai pangan diri nganti langkah ari sida penguasa nya. 

“Enda ngawa. Lepaska aja sida tu. Lintong, diatu baru aku nemu nama utai ke nyadi. Aku minta ampun.” Tuan penerit adat semina nunduk mua tanda malu.

Bekeberai ai mata tuan nya lebuh merati sereta ngenangka pengawa nya. Katika enda meda bisi sepasang melaki bini ke puntul jari benung nebas babas. Nadai ketegal bukai tang laban deka ngidupka diri sebilik. Sida orang pesisir ke deka ngidupka diri. Kapa enda sida.