Patah Dan Alai Bepanggai, Patah Geladak Alai Bejalai

Pengajar Jimbun ngelubahka langkah pejalai iya. Iya meratika pun kayu malam ti besai ba tebing andau.  Nadai meda anak mensia dia. Pengajar Jimbun alit ati laban ti ngelama tu maya lemai baka tu endang bisi Beji dia duduk enggau seraban sapi iya. Datai ba baruh kayu malam nya, Pengajar Jimbun engkadah ke atas kayu nya. Panchar mata panas tembus daun kayu malam ngasuh mata iya silau. Silau panchar mata panas nya ti ngasuh ati iya balat nangi.

Pengajar Jimbun udah tebalan bendar enti maya tu, Wat Beji endang mai tiga iku sapi iya kia ngirup ai ba baruh andau nya. Tang sekali tu nadai dipeda batang tubuh Wat Beji enggau sapi iya. Engka udah pulai ke rumah tudah Wat Beji nya pia ku pikir Pengajar Jimbun.

Bisi berasai salah ba kandang ati Pengajar Jimbun laban laun datai kia ari selama. Palan nya endang nyadika tempat alai seduai iya betemu enggau pangan diri. Ukai enggai ke rumah Wat Beji tang laban nangika jaku orang laban indai iya nya janda, agi mega tudah diri pan agi bujang.

Agi bedau puas ati ngasaika diri salah laban ke datai laun. Tang nya ukai ari kedeka iya, ukai sengaja. Tadi ba sekula mayuh amat pengawa ti patut ditembuka iya. Kelimpah ari ke ngisi pemutus tisih belalauka sekula nengah chara online, Pengajar Jimbun mega bisi ngaturka aum enggau raban pengajar taun enam laban pemutus peresa UPSR pan pansut sehari tu.

Kenyau ke pindah ke sekula nya berengkah ari taun nyin kemari, mayuh amat pengawa diberi kepala pengajar ngagai tudah tuai.  Engka iya mih ke seiku-iku pengajar lelaki ke empai bebini ba sekula nya. 

Pengajar Jimbun nemu Beji nadai nurun sekula sehari tu. Beji bisi mega madah ngagai iya beberapa hari ke udah madahka diri ngibun sereta ngemataka bala menyadi iya laban indai iya enda nyamai pendiau. Ditambah mega enggau pengawa meri sapi iya makai rumput. Wat Beji mih besaup mantu indai iya ngiga jereki. Semina tiga iku ga sapi ke ditinggalka niang apai iya ke iya. 

Ba sekula, Beji nya siku nembiak ke pendiau, ukai orang ke pejaku lalu suah agi kediri. Pengajar Jimbun enda tentu ibuh ke iya. Laban ke kiruh ngajar ngujungka Pengajar Jimbun enda sempat begulai rapat enggau semua nembiak ke diajar iya. Tang bisi sekali, utai nyadi ba pengidup Pengajar Jimbun ke ngujung iya berubah. Maya nya iya benung nepan motosikal bejalai ngelingi genturung pendiau dia. Tang enda mukai-mukai tayar motosikal iya tak panchit enda jauh ari pun kayu malam tebing andau nya. Maya nya mega Bejie benung mai raban sapi iya ngirup ai. Lebuh iya tepedaka Pengajar Jimbun bisi penanggul iya pan lalu begeguai datai nulung iya.

Anak mit nya mih ke ngiruh diri mantu iya mai tayar nya ke kedai. Malam nya, Bejie lalu mai Pengajar Jimbun ngetu ba rumah iya. Kenyau ari sehari nya, Pengajar Jimbun lalu mupuk ngambi berat enggau pengidup Bejie. Pengajar Jimbun seruran meli barang ke dikena sereta mega enggau duit belanja sekula Bejie enggau dua iku menyadi iya ke indu. 

Lebuh lemai nyau sabung petang enda berasai Pengajar Jimbun tedani ari ke tegenung baka ke bisi mimpi. Pengajar Jimbun lalu mutus ati deka ngiga Bejie ba rumah iya. Lalu begeguai iya nyetat injin motosikal iya lalu terus nuju ke rumah Bejie ba ujung genturung pendiau menua dia.

Datai iya dia, ati Pengajar Jimbun nyau kesit-kesit kesal meda mayuh amat orang begelumu ba rumah Bejie.

“Nama hal nya ibu?” pia ku tanya Pengajar Jimbun ngagai siku indu ke nyau deka setengan umur lebuh iya baru nungkatka motosikal iya. Indu nya nadai tak begaut nyaut iya tang semina baka anak mit ke deka nyabak.

“Nama utai ke nyadi, aya?” pia ku tanya Pengajar Jimbun ngagai siku lelaki ke mansa ba mua iya. Berasai kesal amai di jungkal kandang kamai. Iya pan berengkah berunding tentu nya bisi pekara ke enda manah nyadi ba sida Bejie sebilik. Dalam ati, Pengajar Jimbun besampi ngarapka nadai apa nama.

Langkah singkang kaki Pengajar Jimbun  dipejampatka iya. Enda berasai iya ngampir rumah ke udah deka repuk empa pengelama udah bediri. Iya lalu ngelangkah niki gigi tangga ti semina nganti maya deka rubuh.

Datai ba mua pintu, belanda-landa siku tubuh mit nuju Pengajar Jimbun. Pengajar Jimbun pan beguai mega merap tubuh kurus sereta mit ke dikelala iya nya.

“Pengajar! Indai aku udah nadai pengajar ...! pia ku munyi nyawa anak mit nya.

“Lapa? Sakit nama? Kemaya?” pia ku munyi tanya pansut ari mulut Pengajar Jimbun. Nyau bejarit tanya. Iya nyau tegepang lebuh ninga berita nya. Penusah ti enda disangka-sangka tau nyadi.

“Tengah hari tadi, lebuh indai deka ngumpul duit kuih iya ba kedai di pasar din. Indai dilantak kerita ...”ku Bejie nusi ngagai Pengajar Jimbun sambil deduie nyabak. Lebuh iya ke nusi berita nya dua iku menyadi iya bela datai ngampir Pengajar Jimbun. Kedua-dua seduai bela mega jari Pengajar Jimbun enggau aka seduai. Sida sama bela ngendas ai mata ke naya nerutu dagu. Sada nyawa jaku sida nyau udah balat tendur nadai didinga ketegal ditinggal indai ke chukup dikesayauka sida.

“Liatka ati kita... besampi nuju Petara ngambika rih indai kitai likun besereta enggau orang kudus,” pia ku peransang jaku Pengajar Jimbun ngagai sida tiga diri menyadi.

“Kami udah nadai agi orang enggau di dunya tu, pengajar. Kami udah nyadi anak patu balu. Kami udah nadai agi alai bepanggai. Kami menyadi tentu enda ulih ke sekula agi udah tu ila,” pia ku Bejie sambil nyabak sikuk-sikuk.

“Liatka ati nuan, Bejie. Tanka ati nuan. Kitai atur sereta ngintuka dulu indai nuan ya...,” ku Pengajar Jimbun nguji ngenyelapka ati Bejie.

Lemai nya semua sida ke ba genturung pendiau sida Bejie bela datai magang. Laban rumah ke mit, sida sama-sama besaup nirika langkau alai bala mensia duduk nyenggai indai Bejie. Laban ke nadai kaban belayan hari siti sida lalu nganjung antu.

Pulai ari pendam ngalih hari nya, Pengajar Jimbun lalu mai Bejie enggau menyadi iya duduk ba mua rumah sida. 

“Baka tu aja mih Bejie, Berenai enggau Beremas ... kita tiga anang irau ati. Kita tiga tetap neruska sekula kita. Aku deka ngibun kita tiga,” ku jaku Pengajar Jimbun meri semengat ngagai sida tiga menyadi.

“Nuan diau enggau kami ditu?” pia ku tanya tudah Bejie.

“Au. Ditu mih aku enggau kita. Udah tu ila baru pengajar meli rumah di pasar din lalu kitai semua pindah kin,” ku Pengajar Jimbun meri jaku pengarap ngagai sida.

Tudah Wat Bejie nyau tebelengga lilih, nadai nemu nama utai ke deka disebutka agi. 

“Wat, uji nuan meda pemutus peresa UPSR nuan tu. Pagi tadi pemutus tu dikeluarka. Aku ngiga nuan tadi datai ke andau din deka ngenataika berita manah tu ...,” pia ku Pengajar Jimbun seraya ke nyua slip pemutus peresa UPSR nya ngagai Bejie.

“5A tu pengajar! ku Bejie seraya ke ngendas ai mata iya.

“Tabi puji ngagai nuan, Bejie! Pengajar sigi udah nyangka nuan ulih pas enggau lati,” ku Pengajar Jimbun lalu merap Bejie ke mega lalu nyadi anak ambu iya. Anak mesena ke patah dan alai bepanggai, patah geladak alai bejalai.

Tak nadai nyaut seleka mukut, nadai malas seleka beras mih tudah Bejie. Bala menyadi iya ke bukai bela datai meda slip pemutus peresa nya. Pemutus peresa ti lati diterima maya penusah.

“Terima kasih pengajar! Kami nadai agi orang bukai kelimpah ari nuan pengajar,” sambil ngerebahka mua iya ba dada Pengajar Jimbun. Menyadi Bejie pan sama merap Pengajar Jimbun. Sida diatu baka orang ke patah dan alai bepanggai, patah geladak alai bejalai. Semina Pengajar Jimbun mih alai sida bepautka pengerindu enggau penyayau sereta bepanggaika pengarap.