Kayau Sultan Melayu Ke Rumah Sida Mujong

Nyadi pagi hari siti dia Sultan Melayu lalu muka peti sarang tinchin pengajih ke ditaruh iya nya, laban iya deka kena iya ngabang ngagai gawai besai iya nya  gawai selamat nikah anak Sultan ke lumor dua dalam nengeri nya. Tekenyit bendar mih ati iya meda tinchin nya tak nadai agi dia, tang iya meda peti nya udah kebus ditebuk chit.

“Oh naka mih penyayau tu dih,” ku ati iya,”tentu tinchin tu udah ditabanka chit.”. Udah nya Sultan Melayu lalu meli peti chit mayuh bendar deka dikena iya ngulihka chit di menua nya. Mayuh bendar chit udah ulih sida tang nadai ga tinchin nya ditemu ba semua chit ke ulih sida. Ati Sultan Melayu pan mansang tusah-setuas. Iya lalu ngempuruka semua orang ti bepenemu dalam menua nya ngasuh sida nujum ngiga  kini ke penunga pengelenyau tinchin nya. Nyau kelama baru orang tukang tujum nya bisi nemu nujum kini tunga tinchin nya. Tukang tujum nya lalu madahka iya udah pulai baru ngagai bini Mujong empu. Amat dichuri Chit seduai Mayau. Nya alai iya nadai temu ba chit ba menua kitai ditu, laban iya dibai udah ditabanka Mayau lalu dipulai ka ngagai bini Mujong.

Lebuh Sultan udah terang bendar ninga berita tinchin nya ke udah diambi orang pulai baru, ati iya pan lalu betambah tusah. Udah nya iya lalu beguai-guai ngempuruka bala soldadu ba menua nya, lalu bebai angkat nurun mansang ngayau ngagai menua sida Mujong di Tebing Ngerising Gigi, di Rantau Buau Berapi, nya nama menua alai rumah sida Mujong.  Sultan enggau bala soldadu iya lalu belayar ngena bandung ngagai menua sida Mujong. Leboh bala sida nuntung di pendai sida Mujong, hari pan baru deka tekerebak tawas. Sereta sida nuntung ba pendai sida lalu manjung.

Lebuh nya sida Mujong baru dani tinduk, tekenyit bendar semua sida Mujong serumah madahka munsuh deka ngalahka sida. Sida lalu nurun, bala munsuh pan lalu niki, lalu lebuh sida nyau datai ba tengan jalai pendai dia sida lalu besatup. Sida lalu bamuk belaban enggau pangan diri dia. Bepantap mih sida dia sepagi-pagi nya ngenjing nadai tentu tealahka pangan diri. Lebuh hari nyau deka tengah hari dia bala Mujong pan nyau mansang lembut tulang lalu nyau deka alah. Mayuh bala Mujong luput dipantap munsuh enggau pedang. Tang laban ti kebal ngeleda sida ari deka  luput lalu angkat ga baru bepantap. Dialunka munsuh lalu surut ga sida, nyau deka datai ba kaki tangga. Bala indu nembiak di rumah nyau bekerauh nyabak meda sida nyau deka alah.

Udah nya baru bini Mujong ingatka gung sida ke bisi ti digantung ba tulang perabung. Beguai-guai mih iya niki ke sadau lalu mangkung gung nya tadi. Tak sekejap mata, lalu ninga dih aki iya Antu Raya di tisi langit din. Sereta ninga gung nya bemunyi Antu Raya tujuh iku diri menyadi lalu masukka baju kilat. Tekala nya sida lalu terebai lalu terengkah ba kaki tangga rumah sida Mujong di Tebing Ngerising Gigi di Rantau Buau Berapi. Lebuh kaban Antu Raya nyau datai dia, lalu iya ke endang aki Mujong nya tadi, lalu niki ka rumah, datai iya di rumah lalu diambi iya anak Mujong lalu diberap sereta  dibai iya ngagai orang ke benung bamuk belaban ba tengah menalan di kaki tangga.  “Anang nuan mai iya nya dih aki,” ku bini Mujong.  “Eh, kapa iya enda meda orang bamuk dih, uchu. Lakka iya belajar bepantap,” pia ku jaku Antu Raya.  Lebuh sida Antu Raya tujuh iku nya tadi udah datai dia ati Mujong lalu lantang bendar.

Antu Raya pan lalu bejaku “Ni nuan uchu aku Mujong, ti nuan lelak ngetu nuan bamok,” pia ko iya. “Awakka kami diri menyadi nyilih kita ngelaban munsuh.” 

Ninga jaku aki iya munyi nya sida Mujong lalu nyurutka diri. Antu Raya tujuh iku nya tadi lalu bepantap ngelaban soldadu Sultan Melayu. Peda kenu dia, pedang Antu Raya ngenjing beapi-api lalu ni barang utai ke udah kena pantap lalu angus ga tubuh bala munsuh. Barang apin mati lalu nyau ga belanda rari lalu mengkang nabanka api ke agi menjadi ba tubuh sida.

Enda lama udah nya bala Sultan Melayu pan lalu surut ngundurka diri.  Lalu nyau kelama agi mimit agi ga tubuh sida agi nakal nan belaban dia. Nyau kelama bisi enda kini empat lima iku bala soldadu Sultan Melayu ke agi tinggal. Lalu sida ke agi nan nya semina semua sida ke endang ditunu enda nemu angus, dipantap enda nemu putus aja agi tinggal,. Lalu pia semua sida ke bukai, enti enda rari lalu abis ga mati. Sida ke agi idup rari lalu mulaika diri ngagai menua sida empu. Sida tasah ba sebelah-belah menua. Mayuh ga sida parai kebeluran nadai utai dempa di rantau jalai. Lalu pengabis penusah nusah mih sida nya udah alah laban bala Antu Raya.