Teksi. Ujan. Andau

PENGELAP CHEREMIN MUA kerita nya enda tentu manah ditambah mega enggau ujan ke labuh munyi ke diruruk labuh enggau naka pemangat iya maya siang hari nya. Iya lalu ngelubahka kerita: ujan ngasuh utai ke ditimpai iya berapun, kabur, nyangka bisi kerita bukai ba mua ke enda ulih dipeda mata. Pengelap cheremin  udah kelalu tuai, mata iya empu pan nyangka baka nya mega.

Iya nadai ngarapka bisi bulih penumpang ba jalai raya ke beringkat ti baru udah tembu digaga nya. Tang, nyin ba mua din, iya tepedaka kenayak orang benung bejalai ba lorong pejalai kaki ti sempit nya. Iya lalu sekali agi ngelubahka kerita iya sereta ulih meda senayau nya taja pan umbas iya pemetang; siku indu, agi rumpas, bejalai beguai-guai baka ke enda ibuhka utai ke ngelingi iya ke nyau basah nya. Jari iya merap tubuh iya empu enggau naka pengerat.

“Leng loi!” panjung kangau deriba teksi nya, seraya ngaga tanda jari mai indu nya nepan teksi iya. iya sedar gaya iya nya enda tentu berapa, baka anak patung mayau nganggutka pala ba atas birai teksi iya.

Indu nya mimit pan nadai ngemuningka iya lalu majakka pejalai iya. Bah nama iya enda nemuka? Deriba teksi nya ngangau iya baru. Gaya pendiau indu nya bejalai mulaika pengingat deriba teksi ke anak indu iya ke udah betaun-taun nadai temu pendiau. Dini enda endur iya diatu. Puas ga iya udah ngiga nyentukka beratus-ratus tauka beribu-ribu batu, nyau betaun-taun udah ngiga tang nyentuk ke sehari tu lalu bedau temu.

Nemu enda kini ke penunga indu nya? Engka iya nadai duit nya iya enggai nepan teksi. Tang deriba teksi nya beniat enda deka minta bayar ari indu nya enti sema iya nepan teksi nya; iya semina deka nyaga iya aja. Nama indu nya enda takut ke kilat, tekena penyakit lempuang belai, tauka dilantak kerita? Nama indu nya sama baka anak iya suba ke liat ati rari ari dikandang sampaika enda pedulika nama-nama utai ke tau nyadi.

Sekali tu iya enggai agi manjung ngangau indu nya. Iya lalu masang lampu emergency kerita iya sereta masang kerita iya ngena gear satu aja nguji nyemakaka langkah pejalai indu nya. Nadai ngawa enti indu nya deka kediri. Tang iya netapka ati deka ngibun iya sekurang-kurang iya datai ke ujan nya badu. Ba penemu iya, nya aja chara iya mayar utang penyiru iya ke anak indu iya ke nadai ditemu endur diau diatu.