Jerita Numpi

Jerita tu ngenang siku tuai Iban Remun ke benama Numpi. Nitihka jerita, Numpi tu diau ba menua Tebelu, Sebuyau. Iya ngembuan 30 iku ulun ke bekereja ke iya lebuh apai indai iya parai maya iya agi mit. Ari 30 iku nya semina dua iku ulun aja ke manah enggau iya. Sida ke bukai nya enda manah laban sida bisi anggur deka munuh apai indai iya laban apai indai iya enda manah enggau sida.

Bisi sekali, dua iku ulun Numpi nya pansut begiga ikan ke iya. Nyadi bala ulun bukai belalai baum ngiga chara deka munuh nembiak nya. Sida berunding deka munuh iya maya musin nunu umai berengkah.

Lebuh datai maya nunu, sida lalu mai Numpi ke umai. Beserimbai enggau nya mega sida ngasuh dua iku ulun ke dikerinduka Numpi nya berikan ba sungai ti enda jauh ari nya. Datai sida di umai sida lalu ninggalka Numpi ba tengah umai, iya nya ba baruh pun ijuk. Udah nya, sida lalu nunu madang umai nya lalu sepenembu pengawa nya sida ngerarika diri ke tebing. Api balat bendar nunuka reban enggau daun kayu ti udah ditebang sida. Ketegal balat beribut ti ngujungka api balat muput daun ijuk lalu betayun-tayun mai ai ari danau ti enda jauh ari nya. Ai ti kena tayun daun ijuk nya mih ti nyelamatka tubuh Numpi ari terus betu empa api.

Ba tebing sungai dua iku ulun nya tadi benung nyala ikan ari perau. Seduai tepedaka asap melap datai ari dandang umai. Seduai bela ngasaika bisi utai enda manah nyadi. Seduai lalu beguai-guai pulai ke rumah. Datai din seduai nadai tetemuka Numpi. Seduai lalu begaut belanda-landa ke umai laban irauka pengelikun Numpi lebuh begulai enggau bala ulun bukai. Datai seduai ba umai api endang udah padam. Seduai pan nadai tepedaka Numpi ba langkau umai. Ati seduai balat bendar irau. Seduai lalu berengkah begiga lalu besemaya enggau pangan diri deka munuh bala ulun bukai enti Numpi ditemu mati. Bala ulun bukai laban ke takutka nyawa diri lalu rari ninggalka umai nya.

Benung seduai begigaka anak mit nya ba tengah-tengah umai, enda mukai-mukai seduai tedinga auh munyi nyawa tuan seduai nyabak. Nya meri seduai pengarap nandaka tuan seduai agi idup. Puas ke kuang-kuit sebelah dandang umai dia seduai lalu tetemuka iya agi idup ketegal daun pun ijuk ke muput ai ngagai iya.

‘Pun ijuk tu mih ke nyelamatka tuan tua. Enti baka tu, kenyau hari diatu nyentukka uchu ambu tua mali makai upa tu selama-lama iya.’  Nya alai ketegal pekara nya bansa Dayak Remun enda enggau orang makai upa ijuk nyentukka kemaya hari tu. Enti nyema bisi bala makai upa tu sida deka bulih pisa.

Ulun dua iku nya lalu mai tuan muda seduai pulai ke rumah. Datai di rumah seduai lalu ngubat iya ngena daun mambung enggau kulit lukai ngambika jampat gerai.  Seduai mega ngelalau iya enti iya besai ila, ngasuh iya munuh semua ulun ke enda taluk sereta sida ke deka munuh iya. Jaku seduai nya bisi datai ba pending bala ulun ke bukai. Laban ke irau dibalaska tuan,  sida lalu belalai ngerarika diri ngagai  Batang Ai, Skrang enggau Sungai Saribas.

Lebuh Numpi udah besai, ulun dua iku nya pan mati tuai. Iya diau kediri-diri, seiku-iku seorang-orang. Numpi  suah berasai tusah ati. Bisi mih orang bukai diau beserimbai enggau iya dia ari ulu enggau ba Batang Sadong. Tang ketegal ke bisi pangkat, iya berasai malu ninggalka rumah iya sereta diau segulai enggau sida nya.

Ketegal kelalu berasai sunyi, iya pan merambu deka pegi ninggalka rumah iya lalu ngentap diri ba menua ili. Datai iya dia iya lalu ngemeranka pengawa berikan.

Bisi sekali, lebuh iya benung nyala dia enda mukai-mukai jala iya tesangkutka sebatang buluh. Ditaritka iya jala iya nya lalu dibuai iya buluh  baru ke dalam tasik. Udah nya iya lalu merau ke endur bukai. Baka nya ga iya lalu nyala baru. Tang sekali tu iya bulih buluh nya baru ga. Buai iya baru ga buluh nyadi ke dalam ai. Udah nya iya lalu merau baru ngiga endur bukai alai nyala. Tang pekara ke sama nyadi. Iya teulihka buluh nya ga baru. Buluh nya dibuai iya baru ke tasik udah nya iya lalu bekayuh ke endur bukai nguji nasit iya baru. Datai ba endur baru iya pan nibarka jala iya baru. Lebuh iya narit peda iya jala iya teulihka buluh baru. Meda pekara tu bangat suah amat nya, dia iya lalu teulihka runding deka ngelaika buluh nya sebedau iya nikauka buluh nya ke dalam tebing sungai.

Udah nya iya bekayuh baru lalu nibarka jala iya kali keempat. Sekali tu tibar iya pan bisi mangka. Tang utai ke ngalitka ati iya nya diperatika iya buluh nya baru ga ke kena jala. Sekali tu iya engkah buluh nya ba dalam perau. Numpi lalu nampung pengawa iya ke begigaka ikan. Nyau ke puas betibarka jala dia iya bulih amat ikan chukup ke lauk iya sehari nya.  Udah nya iya lalu ngemulaika diri. Datai di pendai, iya lalu niki ke rumah mai ikan enggau buluh nya tadi. Benung ke mai buluh nya ke rumah, dia iya tedingaka munyi nyawa utai pansut ari dalam buluh nya. Datai di rumah iya pan lalu melah buluh nya lalu tetemuka telu sigi. Iya lalu engkah telu nya ke dalam  chupai lalu disimpan iya ba dalam bilik iya. Sepenembu nya iya lalu pansut sereta ngarika diri.

Udah ke begari, dia iya tedingaka munyi utai di bilik iya. Iya enda ibuhka bunyi nya. Enda lama udah nya lebuh iya malik ke bilik iya, dia iya tekenyit tepedaka siku indu dara benung mela ikan ti ditinggal iya dalam chupai tadi. Ba ati iya nyangka indu nya engka bebali ari telu ke ditemu iya dalam buluh.

Numpi lalu mulai kediri ke dalam bilik. Sebedau iya sempat nanya, indu nya dulu nanya iya. “Numpi, aku udah diasuh bala menyadi lelaki enggau indu aku nitih lalu jadi enggau nuan, enti nuan setuju nyadi laki aku.”

“Aku sigi besetuju deka jadi enggau nuan enti nuan nerima sereta bisi pemendar ari kita sebilik,” ku saut Numpi.

Indu nya madah ke Numpi iya suah amat nguji deka ngerapat iya lebuh iya nyala ikan ba tasik  . “Aku mih ke diulih jala nuan nya belama. Nama aku Rambia Bunsu Betong. Enti nuan majak muai aku baka ke suah digaga nuan nya nyangka bala menyadi aku enda besetuju enti nuan deka jadi enggau aku.”

Seduai lalu selamat jadi lemai nya mega. Udah setaun nampun di bukit, dia seduai lalu beranakka siku anak lelaki ke diberi seduai nama Maar.

Lebuh anak seduai udah ngangkatka diri bujang dia indai iya madah ke Numpi iya enda tau enda pulai ke sebayan laban udah chukup timpuh seduai iya enda tau jadi melaki bini agi.   Taja pia iya ngelalau Numpi enda ngasuh iya irau ati ketegal sarak nya laban iya besemaya deka ngiga  Numpi indu siku ke bini iya. Tembu iya bejaku, iya lalu lesap ari peda mata Numpi enggau anak seduai.

Endang baka pengawa, bisi sekali Numpi nurun berikan baru ke tasik. Sekali tu iya bulih siku ikan patin ke besai amat. Laban ke udah bulih ikan patin besai, iya pan mupuk mulaika diri. Lebuh ke bekayuh pulai dia iya mansa rumah panjai orang Sebuyau. Maya nya sida benung ngintu pengerami gawai. Lebuh sekeda ari sida tepedaka Numpi, dia sida lalu ngangau mai iya niki. Keterubah iya enggai dibai niki laban beguai deka mai ikan ti udah ditangkap iya pulai ke rumah ke anak iya. Sida Sebuyau nya majak mai iya niki, enda tau enda ku sida awakka iya ulih nyepi tuak enggau mayuh macham lauk ti nyenyamai udah disediaka sida. Nangika diri puni, Numpi pan lalu niki ke rumah panjai nya sepengudah iya nambatka perau iya.

Datai ba rumah panjai, iya lalu dinahka sida enggau pemakai sereta ai irup. Sida pan sama-sama belabuh rami. Puas rindang nya, iya lalu enda teingatka ikan patin ti ditinggalka ba perau. Nyau kebanggai ke udah dia baru iya teingatka ikan ke ditinggalka iya ba perau. Iya lalu ngasuh siku nembiak ngambi ke baru ngambika bisi disumai sida dia. Nembiak pan lalu nurun deka ngambi ikan ari perau. Datai iya ba pendai, tak tekenyit mih tudah nembiak lebuh iya tepedaka siku indu dara benung duduk ba perau. Lebuh nembiak nya nanyaka penunga ikan ngagai indu nya, iya nadai ibuhka tanya nembiak nya. Meda baka nya, nembiak nya lalu mulai ke rumah. Datai din iya lalu madah ke Numpi utai ke udah nyadi sereta utai ke dipeda iya ba dalam perau.

Lebuh ninga cherita nembiak nya, Numpi pan naga bisi utai nyelai nyadi. Iya lalu begeguai nurun ke pendai ngagai perau iya. datai iya dia, peda iya siku indu ke bajik amat benung duduk ba dalam perau. Iya lalu muka tali perau iya sereta berengkah bekayuh, malu deka nanya indu ke biak maya nya.

Benung Numpi bekayuh nya, indu nya pan lalu bejaku enggau iya. Ku iya, “Nuan tu nyelai amai, Numpi. Lapa nuan ninggalka anak nuan kediri di rumah nadai orang ngintu iya?”

Numpi berasaika diri salah lalu nanyaka penatai indu nya. Indu nya lalu madahka diri iya nya ikan patin ti diulih iya tadi lalu iya madahka nama diri Rambia Bunsu Patin. Baru iya teingatka indu ti bini iya kala semaya deka asuh iya jadi. Datai di rumah lemai nya, seduai lalu jadi.

Seduai lalu begulai nyadi laki enggau bini ti meruan. Enda lama udah nya bini iya lalu beranakka siku anak lelaki ke diberi seduai nama Lau Moa. Bisi sekali lebuh nembiak nya udah besai dia bini iya lalu madah ngagai Numpi iya enda ulih agi diau begulai sejalai enggau bala mensia laban iya empu endang datai ari sebayan. Iya lalu ngelalau Numpi enda ngasuh peturun sida makai ikan patin. Enda lama udah iya ke bejaku nya, iya pan lalu lesap. Numpi berasai mawa baru. Iya gaga amat laban bisi dua iku anak ari dua iku indu ke jadi enggau iya.

Kedua-dua anak iya mansang besai-sebesai ngujungka seduai nyadi tuai ba menua sida dia. Anak iya ke benama Maar jadi enggau indu ke benama Riu, anak indu Orang Kaya Saja ari menua Remun. Peturun sida Maar nya mih ke nyadi tuai sida bansa Dayaks Remun. Sida tu diau ba entara menua bansa Dayak Sebuyaus enggau Dayak Bidayuh ba pelilih menua Samarahan, Sarawak. Menyadi iya, Lau Moa, pindah ke Batang Skrang, pati ai Batang Lupar, diau enggau bini enggau sida sebilik dia. Iya tu mih ke dikeingatka orang ti keterubah muka genturung pendiau ba Nanga Skrang. Iya tu mih apai siku lemambang ke pegari benama Geringu, Sumbang, Sudok enggau Malang, sida ke dikumbai orang ke ngajar leka pengap ke betul dikena maya Gawai Burung ari ajar lemambang Sengalang Burong empu iya nya Sampang Gading. Nyentuk ke sehari tu agi kenu ku cherita, mayuh peturun sida tu diau ba Skrang, Saribas enggau Kalaka.