Asal Iban Nemu Berumah Panjai

Maya Iban ke betuaika Bejie Nangga Hari Patah Titi Jamban Penjuang kelia, endang sigi nadai pendiau enggau pengarap ke tetap dipegai. Sida Bejie agi diau dalam babas sereta enggau lubang gua ti bisi sebelah menua. Batang pengidup enggau pendiau sida iya bepanggai ba pengawa begigaka pemakai sebelah babas, dalam kampung puang enggau sebelah sungai ti bisi ba semak menua ke endur sida iya diau. Sida nadai ngereja pengawa betanam betupi sereta nadai pendiau ti tetap.

Nyadi bansa bukai ke diau di ili menua sida Bejie tu, endang mansang agi. Kebuah pia, laban sida iya bisi agi pelajar enggau penemu kena nusun pendiau diri. Penemu tu dibai bansa bukai ke bisi nampil pendiau sida, baka bansa Arab, Minangkabau, Sumatra enggau bansa Jawa. Pendiau sida tu tetap agi laban sida ngemeran ka pengawa betanam betupi enggau pengawa bedagang, belayar sebelah pulau Borneo, Jawa, Sumatra enggau tanah besai Malaya. Sida mega balat bendar ngerembaika pengarap sida sebelah rantau tu, lebih agi orang ke megai pengarap Islam.

Lebuh Bejie enggau tuai-tuai bukai baum deka ngaga tangga dikena niki ke langit dikena betemu enggau petara ke nguasa agama Islam, dia Bejie ngasuh menyadi iya benama Bada nyadi tuai nyaga sereta ngiring bansa Iban. Bada lalu nyadi tuai nguluka bala iya ngemeranka pengawa ngasu, berikan enggau begigaka utai bukai dikena ngidupka diri. Maya nya menya, Iban diau enggau likun lalu nadai bemunsuh enggau bansa bukai, laban tubuh endang enda mayuh. Menua pan agi puang sereta lantang endur ngidupka diri.

Nyadi sekali, lebuh Bada enggau nembiak iya pulai ngasu, hari bangat bendar ujan. Meda ujan ngemangat nya, sida lalu mampat daun kayu dikena ngelindung diri ari tinggang ujan ba rantau jalai. Datai sida dalam lubang batu endur sida diau, dia menyadi sida ke indu tak tekenyit meda sida ke pulai ngelaban ujan nya tadi enda basah. Bada lalu madahka sida iya belindung baruh daun kayu, nya kebuah sida iya enda basah laban ujan. 

Bechuanka nya tadi, Iban lalu nemu mampat daun dikena belindungka ujan tauka panas ke lalu dikumbai sida dunju. Udah ngasaika penyamai ngenduhka ujan enggau panas baruh dunju, nya baru sida nemu ngaga langkau ke tau alai diau, beatapka daun kering. Berengkah ari nya, Iban lalu nemu begiga enggau mindah jauh agi ari lubang batu ke alai diau lalu ngujongka Iban lalu badu agi diau dalam lubang batu. 

Udah sida ngasaika penyamai diau ba langkau nyembuah-nyembuah, runding sida pan mansang ari ke udah. Sida iya pan nyau nemu begagaka dampa ke endur sida tau diau begulai mayuh enggau pangan diri, lebih agi sida ke enggai jauh ari diri sebilik bekunsi makai, bekunsi jalai ngidupka diri. 

Laban dampa nya mit, lalu tubuh pan nyau mansang mayuh, sida ke diau dia pan berasai sekut. Ari nya tadi sida lalu nemu ngaga penaik enggau buka dampa nya besai agi, ke dikumbai sida iya rumah. 

Lebuh sida baru berumah, udah sida tembu ngentakka tiang rumah, pagi hari siti lebuh sida deka nampung pengawa sida, dia sida meda semua tiang ke udah didirikaka sida dulu ari nya rebah magang. Meda utai bakanya, sida alit bendar ati, nya alai sida lalu ngentakka tiang nya baru.

Pagi siti, lebuh sida napatka pengawa sida dia baru, peda sida tak udah rebah magang ga tiang rumah nya tadi. Tiga hari sida beturut ngentakka tiang nya, tang tiang sida rebah belama.   

Hari siti sida lalu ngentakka tiang nya dalam agi. Pagi siti lebuh sida ngabas tiang sida dia, peda sida tak tengelam magang tiang sida nya tadi. Semina mimit aja agi dipeda bekechuit pansut ari tanah. Lebuh sida Bada agi berundingka utai ti nyelai baka nya, alai anak temuai siku bisi datai ari kampung lalu bejalai nuju sida dia. Iya lalu nanyaka pengawa sida ke begempuru dia. Bada lala madahka diri deka berumah, tang lalu enda nyadi. 

“Enti enda rebah, tenggelam ga tiang dientakka kami,” ku saut Bada. 

“Kati alai baka nya, iya katika adat dikena kita berumah?” ku tanya anak temuai. 

“Nadai adat dikena berumah, laban endang enda kala ngereja pengawa nya ngelamatu,” pia ku saut Bada. 

“Patut pengawa kita enda nyadi, laban kita nadai atur, nadai adat dikena ngereja utai,” ku anak temuai. 

Ninga jaku temuai munyi nya, Bada lalu minta ajar anak temuai adat kena berumah, awakka tau ke chuan sida ke dudi hari ila. Anak temuai nya pan lalu bejaku madahka tanah nya bisi orang empu. Enti mensia bisi pengawa ba tanah nya, sida enda tau enda meri tasih ngagai petara ke empu tanah, iya nya Raja Semarugah, mentua Raja Sempulang Gana. 

Bada lalu nanyaka jalai meri tasih tanah nya, laban Raja Semarugah enda nyengala, enda nyerupa dipeda enggau mata.

Ninga tanya Bada munyi nya, anak temuai nya tadi lalu ngajar Bada munyi tu: 

1.   Kejang kita deka berumah, tiap-tiap iku tuai bilik enda tau enda dulu ngerembang.

2. Tuai ke diatur dulu ngentak enda tau enda ngiga tambak burung nendak kanan lima iti enggau tambak nendak kiba tiga iti. Iya ke lima iti nya untung orang ke lelaki lalu iya ke tiga iti nya untung sida ke indu. Paung burung tu enda tau enda ditanjung ngagai tanah ke deka endur ngerembang, lalu engkahka ba senentang bilik orang ke dulu ngentak. 

3.   Kejang deka ngentak, indu enda tau enda dulu ngaga perengka piring.

4. Kejang deka ngelubangka tiang pemun, babi tauka manuk enda tau enda dibunuh. Darah iya dikena ngenselan tiang enggau lubang nya.

5.   Batu kuai enggau repik besi enda tau enda dibai ka dalam lubang tiang pemun.

6.   Udah tiang dientak, pating mumban ujakka ba pun tiang nya.

Udah anak temuai ngaraka adat, nya baru iya madahka piring enggau darah babi tauka manuk nya jadika tasih tanah diberi ngagai Raja Semarugah ngena sampi. 

Nyadi repik besi, batu kuai enggau pating mumban nya laban sida nya enda rarat taban ka ai bah, ngayuka penegut enggau pengukuh rumah nya. 

Enti ngentakka tiang, enda tau enda dulu berengkah ba endur ke alai ngengkah tambak burung nya tadi. Nyadi tambak burung nya tadi disimpan dalam buluh lalu diengkahka dalam dunju mit, udah nya dibagi tiap-tiap pintu orang ke ngentak dia. 

Pia mega orang ke dulu ngentak nya nitihka pun ramu. Udah abis orang ke pun ramu ngentak, nya baru orang ke ari ujung ramu sepiak tau ngentakka tiang sida. 

Udah abis jaku anak temuai nya ngajar sida Bada adat dikena berumah, iya madahka diri deka pulai. Iya lalu madahka nama diri Puntang Raga, ke datai ngajar sida ari asuh Raja Semarugah. Udah nya iya lalu lesap.