Pasar Nanga Lutak udah siap

Ninting malam siku indu tengan umur deka tinduk betawingka bunyi inggar injin bur injin kena ngeburka simen. Udah nya iya deka dani sepengudah ke jenak tinduk laban tedingaka munyi injin bur ke majak bemunyi inggar. Nyau inggar-seinggar. Munyi tukul. Munyi palu. Semua bisi. Nadai munyi ke nadai.

Enti nitih, iya sepatut udah masai enggau pekara nya. Tang entah enda nemu nama kebuah iya tak enda mujur muai munyi penginggar nya ari lubang pending iya. Tak baka ke ba dalam kerita api ke ngelaju tekuyung jipun asai pending iya.

Enti disempamaka rawang ati iya maya nya lebuh ke ninga munyi bur nya asai ke nganti berubat ba lutur ngeli, ninga pekakas ke dikena lutur ngeli lebuh ke ngubat pesakit iya.

Ninting pagi, tudah indu tu bepansa enggau kren-kren lebuh ke mansang ke opis iya. Jalai raya nyau majak besai-sebesai. Rumah nyau majak tinggi-setinggi. Utai ke ba sebelah nya nyau majak digaga nyelai-senyelai. Akai dai...

Tang nadai mukai-mukai, bisi pagi siti lebuh ke tedani ari tinduk tak nadai utai memunyi. Sengian baka ba kampung dalam nadai didinga ensung nyumbuh bujang. Panik tudah indu tu. ‘Bah bengal mih aku tu,’ pia ku iya bejaku kediri berandau nengali. Enda ga. Iya agi ulih ninga munyi burung bekechiap. Bekechiap gaga nyambut pagi hari. Bah lah! Nama gaga raban burung nya tak ngaga diri gaga tumu pagi ba pasar nya??

Siti agi bunyi ke didinga iya; munyi luching pintu. Sapa ke datai tumu-tumu pagi tu? Baru pukul tujuh pagi. Indah munyi luching nya pan munyi gaga.

Iya lalu mutarka pejalai bejimat-jimat nuju pintu. Ba luar bisi siku lelaki, ngena gari baka tuan besai. Tuchum lelaki nya lalu meri iya seberekas anak kunchi ke mesai antu gerasi. Maya ke nyua nya mih nyau bepuluh-puluh lampu ke bekelip-kelip manchar seduai ke besuaka kunchi; bisi tukang gambar ngetik kamera sida nangkap gambar.

‘Selamat hari pengada!’ ku lelaki nya.

‘Tang ...’ runding iya nyau charut maya ke nerima kunchi nya.

‘Aku nemu kami tu dulu beberapa hari ari ke nyadi. Tang tu mih tanda pengingat kami ke nuan. Kunchi pasar tu. Ujung-ujung nyau tembu ga pasar tu!

‘Ya amat, Pasar Nanga Lutak udah siap digaga. Lantangka ati diau ba Pasar Nanga Lutak kedungka nuan agi idup.’

Iya nerima kunchi nya enggau temegah hati, gaga datai ke iya enda kiruhka orang ke nangkap gambar iya taja pan maya nya iya agi ngena gaun tinduk.  Akai rai...