Politik Tuai Jimbun

Pedis amat deka arapka utai ke diasaika iya nya. Asai ke benung dalam mimpi. Iya nguji meri pengarap ngagai diri empu senentang utai ke nyadi ba mua nya sigi utai ke amat-amat nyadi, ukai sebengkah ilusyen. Suah bendar Tuai Jimbun murus mua iya kena iya ngamatka iya nya ukai ngigau, ukai mega remban ukai bemimpi.

Kebuah iya mamburka tanya nya ke kutak runding iya laban enda mereti ke tuju iya nya dia. Nyau beba runding iya. Nama tu siti ari chara ke pengabis dudi ngemasaka iya? Enti ketegal deka meri basa, nama basa nya enggau kebuah, bisi agenda? Nama pematut pengawa nya ba iya. Pengawa nya kelalu besai ba iya. Asai ke enda setipak enggau iya. Nama pengawa sereta utai ke udah diberi iya ngelama tu? Tanya-tanya baka nya majak bemain dalam keruntuka pala ke alai untak iya.

Tang enti nya baka ke enda senaja, diperagamka Tuai Jimbun nyangka bisi pengamat sereta enda nemban amat. Enda mukai-mukai tak geremai darah temegah dalam tubuh iya. Pia, bisi ga orang ngenang sereta ingatka aku! Pengawa enggau pemeri aku ke mit-mit nya ke dikerejaka aku enggau ati ti lurus ngelama tu, ukai minta dibalas. Ukai baka jaku sempama bisi padi bisi beras, bisi budi bisi balas. Jauh pawie ngarapka midul enggau bintang, pia ku iya bejaku dalam ati diri.

Udah lama Tuai Jimbun nadai enggau orang ngenataika diri ba pengawa ti baka nya. Pengawa ke rami disempulang enggau munyi chapuh bala pengabang munyi burung ke makai buah kara. Pengawa ke nyangka tau mai iya betemu enggau bala tawing lama ke udah enda kala didinga berita. Kenyau ke udah dipejal badu ba aktiviti politik enggau sosial, iya tak ngasaika kaul diri berasai jauh ari raban tawing lama iya. Berasai lelengau tudah tuai sereta selalu ingat ke raban tawing lama iya.

Ukai ketegal enggai ngiga bala sida iya tang asai ke nadai daya, nadai kuasa. Selangkuh tubuh enggau umur iya udah enda ngasuh iya ngereja pengawa ti baka nya. Iya nyau udah enda dapat baka suba. Tu pan enti ukai ketegal diambi sereta dibai nyangka enda mih ulih datai, nyau udah enda dapat bejalai. Pengering udah majak kurang sepengudah 40 taun nyadi ulun dalam pengawa politik.

Nya alai pengerami makai lemai malam nya nyadika palan alai iya betemu enggau raban tawing lama iya ukai ketegal ke dipebasaka. Nya mih utai ke besarangan dalam pala Tuai Jimbun sepengudah iya tama ke balai raya nya. Kenyau ari di rumah, sepengudah ke nerima kad kangau ngabang Tuai Jimbun udah terundingka pekara nya.

Agi keterubah agi nangi ga iya deka ngenataika diri ke pengerami nya. Ukai nama, laban ke ngasaika diri nyau ngena kerita asur baka ni ku tudah tuai ulih datai. Sapa mih ke deka kiruh ngambat sereta ngenahka iya. Nyangka penatai iya semina tak ngasuh orang kiruh ngapa sereta ngenusahka pengabang bukai.

‘Tusah amat aku tu ka datai Tuai Penghulu ngenangka diri ke baka tu,’ pia ku Tuai Jimbun nerangka penusah diri. Iya sigi enggai ngenusahka orang. Nya mih perangai iya, pemaiada. Tuai Jimbun nya orang ke ngira mayuh aspek sebedau iya mutuska sesebengkah pekara. Baka nya mega lebuh iya deka nyurutka diri ari pengawa politik. Tuai Jimbun endang dikelala ketegal pemingking iya tang pemingking iya bisi ga pematut. Nya mih kebuah iya seruran dipebasaka orang. Lebuh ke agi aktif dalam pengawa politik iya enda nadai bemunsuh enggau orang. Semua orang nya nyadika tawing iya.

‘Nadai ngawa nya tuai, semua nya ditanggungka kami sebuat. Pengerami tu mega ke nuan mih Tuai Jimbun,’ pia ku Bedali, penghulu ke nyuaka kad ngambi ngabang nya. Jaku Bedali nya meri semengat sereta peransang ngagai Tuai Jimbun ngambika iya ulih datai.

Pengamat tuju enggau penyanggup iya datai nya laban deka betemu enggau bala tawing lama ke nyangka bisi mega kena ambi ngabang. Ukai ketegal deka makai. Orang baka tudah tuai dini nya deka makai agi? Asai pemakai nya ba iya asai ke udah disepi iya magang. Enti enda serata dunya nyangka tak sesuku ari nya udah disepi iya. Dalam umur iya ke udah tiga suku abad iya udah ngasaika diri puas.

Maya ke agi regas bepolitik menya nadai endur ke enda ditujuka iya. Nama-nama bansa pemakai ke enda diempa. Sebut aja. Ari Perlis sampai ke Johor datai ke Sabah enggau menua diri empu, Sarawak. Sekali dua bisi ga iya enggau bala raban iya matau menua ngagai Sungaipo. Dia iya ke nyepi mayuh bansa pemakai baka pemakai ari Barat, China, Jipun enggau Hong Kong. Nya ney, semua udah disepi iya. Makai kiraka enda ibuh agi.

Enti enda silap itung, kepenudi bendar iya datai ba pengerami ti baka nya kira-kira 20 taun ke udah. Maya nya iya mekuh pengawa nyadi siku ari raban komiti gerempung apai indai enggau pengajar (PIBG) ba sekula di genturung menua iya. Pengerami makai lemai nya diatur sepengudah tembu pengawa lumba darat sekula nya. Endang seruran dikemeranka pengerami makai lemai nya sepengudah lumba darat diatur dikena ngerapitka kaul entara pengajar, apai indai enggau nembiak. Pengerami nya balat bendar besai reti ba iya  sereta tetap bekacha dalam pala iya.

Pengerami makai lemai nya mega digulu Pemesai Pelilih Menua, Tuan D O ku orang sereta mega dua iku pengari rayat ari Dewan Undangan Negeri enggau Parlimen. Iya ulih meda kedua-dua pengari ke enda sama parti nya duduk berimbai. Duduk sama enggau iya, makai sambil bejuraika pekara menua.  Iya berasai betuah amat malam nya. Katika enda dih laban dua iku pengari rayat ke suah betalat siang enggau malam ba panggau politik, ba media surat berita enggau ba televisyen nya tak enda mukai-mukai ulih duduk semija berandau ke pemanah rayat seduai iya sereta adat bansa Iban.

Iya ke balat agi mai reti ti besai ngagai Tuai Jimbun nya lebuh seduai iya berandau deka ngemansangka genturung menua sida dia. Pasal deka nyaup nembiak redak, nyaup bala orang bumai sereta baka ni deka meransang mayuh agi bala nembiak ngambi pelajar jaku Iban di sekula. Tauka ngiga chara baka ni deka mutarka penanggul nembiak ke gian ngirup arak. Tuai Jimbun rindu amat enti bekenangka pekara ti baka nya. Ba penemu iya, gaya politik ti baka nya mih ke patut dikemeranka. Ukai belaya enda tentu pasal sepemanjai maya ketegal agenda diri empu sereta ketegal deka berebut kuasa.

Utai ke baka nya mih ke dikerinduka Tuai Jimbun. Iya endang orang politik, tang politik iya politik orang ke gerai untak ukai fanatik ke nadai temu pun enggau ujung. Ke patut agi politik ti dikemeranka Tuai Jimbun nya mih ke dititih sereta nyadika model. Politik ti dikemeranka Tuai Jimbun nya politik ti genuine, politik ke amat.

Entah mih enda nemu kebuah iya tak rindu ke politik ti baka nya. Nadai belaya ke pekara mit, pekara ke enda berat. Tuai Jimbun mega enda rindu ke politik ke ngelun laya lalu suah nyerang pangan diri nadai tentu pasal. Ba runding Tuai Jimbun ni ku orang mih deka bejaku tang politik chara iya nya mih ke deka iya. Iya ga harmoni agi. Nadai ngawa politik belaya maya pengawa bepilih aja tang udah nya pulai baka selama.

Ba runding Tuai Jimbun, politik iya bebida enggau enggi orang bukai. Enggi iya ngembuan ukur pemanah, mungkur semua lapis pengidup, pengarap, ngaturka pendiau rayat, bisi budaya, bisi chara begulai enggau pangan diri enggau ke bukai. Politik ti dikemeran orang bukai balat agi ke bepelasar ke siti langkah rapat aja iya nya dikena ngulihka kuasa.  Politik Tuai Jimbun mega bepelasar ke pengawa ngaturka pengidup ke nuju ngagai dunya sepengudah nadai.

Enda berasai udah mayuh bala pengabang datai ngemenuhka balai raya nya. Tuai Jimbun ngambi penuduk ke ba tisi. Iya senaja dipinta asur kia taja pan bisi udah mija diagih ke iya betiban enggau panggau sereta semak mija vvip.

‘Anjung aku kia aja,’ pinta Tuai Jimbun ngagai pengari penghulu ke endang diasuh ngambat sereta ngiringka Tuai Jimbun.

‘Lapa dih tuai? Ditu udah disediaka tempat ke nuan,’ pia ku pengari penghulu.

‘Enda ngawa, awakka tuai din, nyamai ke pansut enti deka kemi lagi,’ pia ku timbal Tuai Jimbun.

Orang pan majak chapuh, ragak seragak. Temuai ti dipebasaka pan bela udah datai. Ari keduk nya Tuai Jimbun ulih nimpai tiap iku orang ke tama ari dua adap. Adap ke betiban enggau iya sereta adap ke ari baruh rusuk iya. Nya nyangka nerima tuai ti dipebasaka laban bisi didamparka enggau tikai permaidani mirah  nuju ngagai mija vvip.

‘Bala pengabang ti dipebasaka, pengerami kitai ke malam tu deka berengkah enda lama da agi nganti penatai kedua-dua temuai kitai kira-kira 15 minit ari diatu,’ pia ku bulu balang naburka jaku padah. Jaku padah nya nadai meri nama-nama empas ngagai Tuai Jimbun. Ba peragam ati iya tentu temuai dua iku nya datai enggau bini seduai ari nengeri nyin.

Semina Tuai Jimbun agi beentelahka sapa seduai dua iku nya lagi. Tuai Jimbun enda nemu sapa, agi mega iya endang enda dipadahka sapa ke datai. Backdrop ba atas panggau nya pan nadai ga madah semina rambai jaku, ‘Pengerami Makai Lemai Begulai Enggau Temuai Besai’. Tuai Jimbun enda ulih beperagam sapa temuai nya. Ba kad ngambi ngabang pan nadai ga ditulis nama temuai nya. Baka ke bisi utai ke dipelalaika.

Bisi ga ati Tuai Jimbun deka nanya orang ke duduk semija enggau iya. Tang asai ke enda kena. Terang bendar mandangka iya nya enda nemu utai ke nyadi. Agi pan Tuai Jimbun enda tentu ngelala orang ke duduk semija enggau iya taja pan umur sida nya nyau deka sebaya enggau iya. Enti ditanya pan nyangka sida nya mega enda nemu. Sida nya pan baka ke udah babu baka Tuai Jimbun. Siku ari sida nya pan enda betul kanchin baju.

Bedau lama udah nya, dinga bunyi siren motosikal penginau enggau hon kerita. Iya lalu ditangkan enggau bunyi tabuh Iban sereta dientudika enggau jaku padah ari bulu balang madahka penatai temuai ti dipebasaka lemai nya.

Bala pengabang ke bisi dia pan lalu angkat bediri lalu betempik jari. Bisi mega sekeda nya ke nyerauh, idup ...! idup!  Penuh peransang. Tuai Jimbun baka ke beli kediri. Malam majak ragak. Chapuh. Balai raya nyau penuh enggau panchar api kamera...sambung menyambung. Mua bala temuai pan nyau pereching gaga tang tudah Tuai Jimbun tak baka selama aja. Bala temuai ke dipebasaka pan lalu ngenudukka diri ba mija ke betibang enggau panggau.

Udah semuai temuai duduk, tabir ba atas panggau ba tebuka. Semua mata malik merening ngagai back drop. Tuai Jimbun enda arap ke utai ke dipeda  sereta dibacha iya. Puas iya murus mata enggau mua iya engka tak salah peda salah bacha. Urup ke bisi ba kain nya majak kabur dipeda iya. Nyau beserapun. Tuai Jimbun enda arap lalu majak enda arap.

Pekara ke ngasuh iya enda arap nya mih sama mega enggau asai ati iya ke enda arap ke diri dikangau ngagai pengawa ke rami sereta besai nya. Iya nguji nyenguk ke mija vvip deka meda mua temuai nya.

Selamat begulai sejalai ngagai tuai ke dikesayauka kami, “Tan Sri Jamit + Datuk Jabing”. Iya mih ayat ke bisi ditulis lalu dibacha Tuai Jimbun. Dada iya enda mukai-mukai nyau berasai sendat. Ai mata iya pansut belai baka beris leka ujan.

Runding Tuai Jimbun nyau tepejuh jauh rari ari balai raya nya. Iya ngelakka pengerami ba balai nya penuh enggau pengerawang ati. Penuh emosional. Bendul minda Tuai Jimbun terus dipandangka enggau utai ke dipeda mata iya. Amatka enda utai ke dipeda iya nya lalu ukai mimpi. Enda berasai utai ke bepusin-nanin ba untak Tuai Jimbun nya disempulang enggau lagu puji ba gerija ke alai iya benung sembiang meri terima kasih. Puji Tuhan!