Ai mata ba Nanga Lutak

Tabi ambai aku Lengayun Bujang Sigat. Nama berita dek diatu? Aku minta ampun suh dek laban lama enda nemuai suh dek. Gaya hari sehari tu jelan pemanah, ya? Tang angin ke bepuput dalam ati aku sehari tu ke enda tentu manah baka kabut biau balai. Uji sangka, nama kebuah?

Betul sangka dek nya.

Aku lembau sereta berat asai ati deka nemuai suh dek laban aku bisi berita ti enda tentu manah. Apai indai enda ngasuh agi. Sida ke bendar enda kala rinduka aku enti aku ngusung dek. Nyangka ngelama tu sida enda tentu ibuh laban nama mih penusah ti tau nyadi enti aku ngusung dek kia.

Tang lebuh sida nemu perambu aku, sida tekanyat. Sida enggai ngasuh aku nitih dek ambai, enggaika aku nitihka pejalai pengidup dek diatu. Sida madahka enti aku nitihka dek tentu pengidup aku jemah ila puntan baka jelan jalai jelu; labah baka buah merunjau ulu. Sida enggaika aku ila semampai ngapung pupu. Sida enggai meda aku ila baka papung batang, anyut ke ulu dialun segang, rarat ke ili dipangka pasang.

Sida udah ngelala sapa dek ambai. Mesti mih, sapa mih ke enda ngelala dek ambai? Taja pan sida nemu dek ambai endang hero aku, sida madahka dek ngembuan ulah ke enda manah ti tau marit aku ngagai dunya penyai. Iya madahka enti kitai suah ngerut sabut puting enteran lama lalun teulihka dengah; pia mega enti kitai suah belangkau ba pala kerangan, lama laun pan diampuhka bah.

“Nama dek deka nyadi baka iya, pia?” pia ku apai, muras sereta ngempaska gitar aku sampai pechah. Pechaya dek, ambai ka tusui jaku aku tu? “Giga orang bukai ke manah agi ke tau ditunda dek,” pia ku iya.

Iya ke bendar semina apai aja ke beperangai baka nya. Semina iya aja ke enggai meda aku enggau dek. Aku meratika indai diau diri aja.  Iya endang rindu suh dek ambai, tang iya enda berani ngakuka diri rindu ke dek. Iya ke bendar, seduai apai enggau indai deka ngasuh aku nyadi akauntan. Badas sigi badas. Nadai utai jai enti nyadi akauntan. Uji dek berunding enti sema aku nyadi akauntan.

Tang aku ngasaika aku nadai jalai bukai. Aku mesti mega nitihka penemu sida, nitihka pengingin ati sida baka naka kediatu mih. Aku empai chukup tuai ngiga anak belanja dikena ngidup kediri. Aku nemu dek ambai berengkah ari dek baru angkat bujang mega, tang rambau nya suba lain; enda sebaka, nyangka bisi nyamai mimit enti dibanding enggau diatu.

Aku, ambai enggai enda madah suh dek; aku ke universiti minggu dudi lalu kiraka enda ulih nemuai suh dek baka selama. Taja pia, dek ambai seruran dalam sampi aku.

Aku deka majak nulis sereta belatih kediri. Sida apai indai aku enda ulih nagang aku. Laban aku deka ngayan ngagai sida  enggau semua orang senentang pengidup ambai ke ukai daya idup sengapa. Terima kasih. Kirum tabi Pengajar Saloma. Abis nadai enda mih dek berasai puang laban iya bisi di tisi dek ambai.