Halaju

PEKARA TU NYADI maya taun 2009 suba. Maya nya kira-kira udah jauh tengah malam. Lebuh utai tu nyadi,  bisi siku polis trafik benung berengkah nguap, mata lelanuk enda mukai-mukai ngetan sebuah entukar ke dipasang lebih ari sekat pengelaju ba Jalai Tun Razak. Entuka nya mega mansa ba endur iya ke gawa.

Polis tu dulu suba enggau orang ngeruh ai masuk gerempung penerit adat laban maya iya agi mit suba bisi tekait ati meda sebuah siri cherita polis trafik ba TV. Tang udah iya ke masuk nyadi polis trafik nya baru iya nemu pengawa nyadi polis tu mayuh agi ke pengawa rutin; semina sekali dua aja ke betemu enggau sekeda deriba ke tau nganu sereta ke ngembuan ulah ti kurang ajar. Iya endang ngarap bendar deka meda utai ke amat nyadi ke ulih ngeruga pemerani iya! Nya mih laban ke bisi darah bujang berani!

Nama dih tak amat-amat nyadi mih malam nya. Deriba kerita ke manah sereta bansa ke mar nya berenti ngetu lalu muka cheremin chelum kerita iya ngagai setengah. Cheremin chelum? Kerita VIP tu kini? Tang iya laban ke ngasai diri polis mesti berani sereta enda beripih ngereja pengawa. Nya alai iya lalu nanya; “Selamat malam, tuai. Dek nemuka dek neriba kerita enggau tikas pengelaju ke berapa tadi?”

“Enda. Kati enti nuan empu mih madah ngagai aku au?” saut ke tepambur ari mulut deriba disempulang enggau gaya ke kurang ajar. Munyi nyawa iya nya munyi ke suah didinga, munyi ke dikelala, pia ku pikir polis nya. Kala kini seduai tu betemu? Enti kala, dini enda seduai kala betemu? Pia ku runding polis nya sambil iya nyeling ke dalam kerita, nyau kuring mata tudah tuai; tang semina tak siku-iku laki nya aja ga dalam kerita.

“Tuai, dek udah masang kerita tu kelalu laju. 20km lebih ari tikas ke dikemendarka perintah. Aku nadai jalai bukai mesti nyaman dek, tuai,” pia ku polis nya seraya ke ngambi sereta muka bup saman iya. “ulih dek nyua ngagai aku kad pengelala dek?”

Iya endang siku polis ke terit sereta gawa nitihka atur; ukai bansa sida ke deka ngiga duit kupi tauka sida ke sebaka ulah enggau nya. Mesti bisi polis ke senior ke bemua mangah tang manah ati ba cherita TV tentu rindu sereta temegah ati meda iya ke terit gawa!

Jenila cheremin kerita lalu dibuka ke baruh sampai abis. Tebelenga lilih! Ayoyo ama! Maya nya mih baru polis nya nemu sapa ke deka disaman iya dia. Nyau ngetu mih tudah tuai baka puyu mabuk ambuh, tegenung baka empelekung mabuk keruh. Dilah tesekat nadai tepansutka jaku. Gambar orang nya mih ke ngias papan-papan pemandang bantai tauka iklan 1Malaysia, sereta ngembuan mulut bibir iya ke bechura kalas sereta bekilat. Ke temu nadai orang udah bisi mulut kalas baka iya nya. Endang nadai orang bukai bisi mulut baka nya kelimpah ari iya aja. Sapa ke enda ngelala.

Lelaki nya lalu nunjuk ngagai papan tanda Jalai Tun Razak sereta bejaku, “Peneka ati aku mih, jalai apai aku nyin! Utai besai gaga mit wai.”