Saiman

Menua Holland sigi menua ti lengkap semak tasik besai. Ari jeman dulu kelia menua nya mayuh ti kena ampuh ulih ai, utang orang ti mangkang nya mulaika iya nyadi tanah pantai baru, laban sida ngaga kuta ngena jumbuh tanah ti ngelingi menua sida awakka ai nya badu ngampuhka iya. Agi meda sida ngaga parit ti pemadu besai enggau dalam mega; ti dikumbai kanal. Iya dipeda nyau deka baka sungai, alai kapal ti datai ari tasik tau mudik ngagai nengeri enggau gugu rumah ti jauh mudik ke ulu. Nyadi parit tu jauh tinggi agi ari menua ti ngelingi nya, lalu ai pan ditaruh dalm nyin ditimbuk ngena tanah begulai enggau pasir lalu nyadi kuta ti tinggi dikumbai orang bund. Dalam menua Holland, asai ti nyelai amai bejalai niti jalai raya lalu tepedaka kapal besai belayar nampih kitai, nengah parit nya ti nyadi sungai, ti jauh tinggi ari tanah ti alai kitai bejalai.

Nyadi kereja nyaga kuta tanah tu sigi kereja berat amai, ulih kereja nya kena nagang ai tasik ngampuhka menua. Agi mega, kuta nya nanka ai ti dalam parit, lalu iya enda tau enda kena jaga berari enggaika iya tusur, kera enti bisi lubang siti ti mit nyadi dia laban ti merekah sekalika tebuk chit, lubang nya deras deka mansang besai ulih teruju ai ti balat. Udah baka nya kuta tanah pan tentu tusur magang. Menua nya deka kena ampuh ulih ai. Jelu ti ditupi deka lemas, kebuh orang pan rusak lalu dataika rumah orang tau tumbang mega. Nya alai bisi orang ti disuruh perintah nyaga kuta nya tang enti sida enda tepedaka ai ti neritik pegari ari lubang ti mit; udah nya dalam semalam nya aja kuta nya tau tusur lalu menua dilangun ai.

Bisi sekali, lemai hari lebuh nyau deka petang, nembiak lelaki siku benama Saiman, nyangka tigabelas taun umur, mansang pulai ke rumah diri udah iya nemuai ngundang pangan iya. Lebuh iya mansa kuta parit siti ti nampih gugu rumah ti alai iya diau, iya tepedaka lubang siti ti agi baru amai, ditebuk chit, lalu ai pan belabuh neritik ari nya. Iya lalu malik kia-kia deka ngiga utai dikena iya nyempal lubang nya, tang nadai tetemuka utai ti tau dikena iya. Tambah mega hari nyau petang. Iya lalu duduk lalu ngembar kuta nya lalu murukka berang iya masuk ke dalam lubang dataika ikas bau iya. Iya lalu nganti dia engka icha bisi tepedaka orang mansa. Enda lama udah nya bisi orang siku mansa. Orang nya pulai ari umai.

Saiman lalu ngangauka iya lalu ngasuh iya madahka orang begulai di segugu rumah ngambika sida tau datai lalu mai pekakas sida kena ngalitka kuta ti nyau jai.

“Aku deka nganti ditu lalu ngetanka lubang dataika sida iya udah datai ditu,” pia ku Saiman, “tang sida enda tau enda jampat datai laban lubang tu makin mansang besai sebesai.”

“Aku deka nyuruh orang datai ikas penyampat aku datai di rumah,”ku saut orang nya.

Tang udah iya datai di rumah, iya pan duduk lalu bekelakar enggau pangan iya. Nadai agi ingatka nembiak nya ti agi meruan ngalitka lubang ai enggau berang iya empu.

Udah hari siti agi tumu, apai indai Saiman nanya semua orang ti berimbai diau enggau sida enti bisi meda anak seduai laban iya nadai pulai ke rumah kenyau ari demalam. Lebuh orang nya ti dipesanka Saiman udah ninga berita nya, iya pan baru ingat. Iya lalu madahka sida alai nembiak nya nganti.

Orang pan lalu begaut nuju nya lalu tepedaka nembiak nya masih meruan nyilukka berang iya ke dalam lubang. Lebuh sida ngangau iya nadai nyaut. Iya endang udah mati tengkering-kingking laban ti pemadu chelap. Iya udah meri nyawa diri ngidupka pangan iya.