Pindah

Lebuh lemai hari aku duduk tegenung seilu-ilu ba pugu tanju tak berasai boring munyi ku jaku orang kemaya hari tu. Aku lalu tama ke bilik. Datai di bilik, okay pasangka aku tv – tv biasa aja nadai Astro. Buka TV1 ninga sida mejah PR, buka TV2 mejah PR. Buka TV3 puh nya ga balat agi mejah PR. Deka masuk Astro pia, masuk 27hb (masuk nadai bebayar).

Udah masuk Astro, siti-siti cherita  nyau 188 kali betandu, ulang tayang kenu. Sampai 28hb ke baru tv pan nyau petang, nadai gambar. Tu mesti kes kena putung, pia ku bejaku kediri berandau nengali. Angkat aku telefon lalu manggil Astro. “Encik, lapa tv aku nyau petang nadai gambar?”

Saut orang Astro, “Encik mesti mayar bil dulu baru pansut gambar.”

Saut aku, “Lapa enda ulih nganti chukup bulan ke baru, baru mutung? 27hb udah masuk gaji.”

Saut orang Astro baru, “Encik masuk 27hb, mesti bayar 27hb.” Balat amai sida Astro tu nisa orang ku ati aku din.

Okay nadai ku enggau mega, tv lalu nadai pansut gambar sampai 30hb. Lebuh gaji masuk aku pan nurun mayar bil Astro. Enda mukai-mukai lebuh deka mayar sida Astro madahka aku kena tinggang ukum RM20 kena nyambung baru servis lalu disempulang enggau chukai 6%.

Maya nya baru aku teingatka jaku menteri subaaa..., “Enti enda rindu meda Astro, peda tv biasa aja.” Okay aku lalu ngemaduka Astro lalu meda tv selama ke ninting hari bejaika PR nya. Maya nya baru aku teingat bil karan deka niki. Okay aku tutup terus tv lalu keluar ngiga bala pangan enggau berandau. Puas ke berandau, rekung berasai rangkai, asai ke deka ngirup. Deka meli gula enggau kupi peda rega gula mar. Maya nya aku teingatka jaku menteri ke siku agi. Ku iya, “Gula mar laban deka ngurangka diabetes, penyakit kemi manis.”  Lalu enda aku nyadi meli gula. Ngirup kupi o kusung aja ga.

Udah ngirup kupi, pangan mai aku ke rumah iya laban bisi beserumpu makai. Baru deka masang injin entuka nya aku teingatka jaku menteri, “Anang nengah jalai ti bisi tol enti ngasai nya mar, tengah jalai lama.” Tang dalam runding aku, enti aku nengah jalai lama, jauh mega lagi, udah nya minyak pan mar pia ku aku bejaku dalam ati diri. Enda nyadi ngena entuka lalu ngena ensikal.

Sejam 45 minit baru aku datai ba rumah pangan.  Datai ba rumah pangan aku dia, iya lalu ngenah aku enggau ai amai, asi belaukka sayur. Aku pan lalu nanya pangan aku nya kebuah iya ngenah aku enggau lauk sayur aja.

Ku saut pangan aku nya, “Ukai pia, nama menteri kala madaeh ngagai kitai, enti manuk mal empa dagin, enti dagin mal empa ikan. Diatu semua utai mal, wai. Empa sayur aja mih ke bisi murah mimit.”

Tembu makai aku berandau sekejap udah nya baru mulaika diri. Benung ba rantau jalai aku ngenangka nama penyadi enggau menua kitai tu.  Nya baru aku teingatka jaku siku da menteri. Ku iya, “Enti enda rinduka menua tu, manah pindah keluar ari menua tu.” Datai aku di rumah aku lalu enda muai awak lalu bekemas barang-barang aku laban aku udah mutus ati deka pindah ke planet PLUTO.