Indu tuai enggau teknologi baru

Baka ke udah disangka, anak lelaki ke tiga benama Jimbun ngeredungkan tama ke opis luyar lalu mejal diri duduk ba sebuah kerusi puang. Semua bala menyadi iya ke bukai endang udah datai. Semina iya aja laun 45 minit ari sida ke bukai.

Menyadi tuai iya ke duduk betiban enggau luyar Jemat meri mua ke bekejemi tang Jimbun ngaga diri enda ibuh. Iya lalu nyurung jari iya ke panjai nabi siku orang ke ukai ari sida sebilik dia kelimpah ari luyar Jemat.

Iya lalu bejaku, “Tu luyar aku, iya kitu laban deka ngarika aku.”

Luyar Jemat lalu ngemunka pengawa iya enggau chara beradat. Udah tembu jaku pengelalu iya lalu macha surat wasiat ke ngasuh sida Jimbun sebilik nya begempuru pagi nya. Iya terus macha, ngerintaika utai ti udah dipesan indai sida ke ditinggal sereta dibagi enggau sida semenyadi.

Nyau ke puas ke macha, dia luyar Jemat datai ba genteran ke nyebut pasal Jimbun. Ayat iya kurang lebih munyi tu, “Jimbun, nuan mih anak aku ke pengabis pengerua ari menyadi nuan ke bukai. Nuan mimit pan nadai mih nemu ngaturka duit ti diagih ngagai nuan. Nya salah kami duai apai nuan lalu enggau nuan mega. Kami udah balat bendar ngandaika nuan ari mit nyentuk ke nuan besai.”

“Nuan lalu nadai kala ngasaika diri gawa indah sehari pan dalam pengidup nuan lalu nuan bulih nama-nama aja utai ti dipinta nuan. Aku ditu deka ninggalka nuan lanting, iya nya sepenyampau duit tang sebedau nuan ulih negu duit nya, aku indai nuan, minta nuan belajar ngulihka duit. Datai umur 50, nuan deka nerima RM1,000 sebulan ari wang turu ti udah ditumbuhka aku tu ...”

Enda mukai-mukai, empai abis luyar nya bejaku lalu semedup munyi mija dipandamka Jimbun. Tekanyat sida bukai. Jimbun lalu enggau nyawa-nyawa iya inggar bejaku, “Tu pekara mapap. Banchat. Aku minta agih aku ti bendar.” Iya lalu malik ngagai luyar ke ngarika iya empu lalu merak, “Lapa nuan enda memunyi?!”

Luyar Jemat sigi naga pekara tu deka nyadi. Iya lalu mutung jaku Jimbun. Iya madahka ngagai sida dia, ibu Matriach Berenai endang naga pekara baka tu deka nyadi. Indai sida nya bisi ngasuh luyar Jemat mandangka video ti ngerikodka jaku iya senentang wasiat enti bisi penanggul baka ke nyadi pagi nya.

Luyar Jemat lalu ngambi remote control lalu nekan masang video. Berapa sikin lalu pansut gambar ibu Berenai.  Berupai bendar mua ibu Berenai ba skrin besai nya. Iya nadai jaku besilup lalu terus nuju jaku iya ngagai anak iya ke benama Jimbun. Iya madahka diri sigi nemu Jimbun deka nyakal wasiat iya nya. Dalam video nya mega mandangka pengawa besainka surat wasiat ba mua dua iku saksi. Maya nya mega mandangka indai sida iya nyain ukai ketegal dipejal tauka diparit runding orang bukai.

Video nya bepengujung enggau jaku ari ibu Berenai. Iya madahka luyar ke ngarika Jimbun besetuju enggau iya nya nadai jalai iya ulih ngelaban pengamat wasiat nya.

Jimbun malik baru ngagai luyar iya, ke lalu nagunka pala tanda setuju enggau jaku indai iya. Jimbun nadai tepansutka jaku lalu ngereduas angkat pansut ari bilik nya.

Akta wasiat 1959 madahka wasiat mesti ditulis sereta disain ulih testator (orang ke nulis wasiat nya) ba baruh tauka pengujung dokumen ba mua dua iku saksi tauka lebih. Testator nya enda tau enda orang ke beumur 18 taun ke atas lalu gerai ari sukut mental.

Ibu Berenai sigi nemu pekara tu lalu iya mega nemu video nya enda ulih nganti surat wasiat ditulis nya ari sukut validiti, diatur maya proses nyain dokumen betulis ba mua raban saksi.  Iya milih wasiat nya disempulangka enggau video enggaika bisi nama-nama pekara ti nyadi ti nyakal pengamat surat wasiat nya.