Raja Midas

Bisi kenu ku jerita kelia bisi raja siku nama iya Midas. Nyadi ku pikir raja nya, nadai bisi utai bukai ti lebih agi beguna enggau berega ngelui ari mas. Pemadu pengerindu ati iya duduk dalam bilik iya dikelingi kambut ti penuh semua laban wang mas. Semua pinggai enggau mangkuk iya, semua macham ngepan iya enggau semua keresa dalam rumah iya digaga ari mas magang.

Nyadi sekali bisi datai ngagai rumah iya siku orang tuai ti kuat ngirup lalu selalu mabuk. Iya tentu deka kena buru pansut ari rumah raja tekala nya, utang Raja Midas ngelala iya. Nyadi orang pemabuk nya sigi pangan Bakus, petara ti bisi kuasa pasal ai anggur enggau semua ai bisa. Nyadi ku runding Midas munyi tu, “Enti aku bebasaka orang tu lalu ngintu iya, lebuh Bakus ninga rita pasal nya, iya deka malas budi aku ti nelap.”

Keba nya orang tuai nya enda kena buru tang iya diau dia dataika empat lima hari makai begulai enggau Raja Midas. Nyadi Bakus rindu bendar ke Midas laban iya kasihka pangan iya baka nya. Iya lalu besemaya deka nulung iya. “Uji padah ke aku nama utai ti bangat deka guna nuan lalu aku deka meri nuan utai nya,” ku jaku iya enggau Midas.

Lalu saut raja nya, “Aku minta ari nuan kuasa sebengkah aja, iya nya barang utai ti kena tegu aku asuh nyadi mas magang.”

“Au mih,” ku Bakus, “utai nya ti dipinta nuan aku beri ngagai nuan.”

Nyadi sereta pagi hari siti, agi tumu, Midas bejalai ngagai kebun iya lalu nyapai raras sepun. Sereta iya kena pegai jari iya, utai nya lalu bebali nyadi mas. Gaga amai Midas meda diri empu udah bulih kuasa nya ti udah dipinta iya. Iya udah nya lalu melungguhka diri ngambi batu sigi. Batu nya mega bebali nyadi tekang mas udah ti kena tegu jari iya. Baka nya mega semua utai ti ditegu iya, semua bebali nyadi mas, dataika rumput, bungai kayu, ai enggau tanah.

Nyau datai jam iya deka makai, iya lalu duduk ba kerusi nunga mija makai. Mija enggau kerusi iya lalu bebali nyadi mas. Baka nya mega pinggai, asi, lauk enggau engkayu. Semua utai nya enda tau dipakai iya laban udah bebali nyadi mas. Perut iya nyau lapar. Rekung iya nyau aus laban iya sigi nadai tau makai nadai tau ngirup. Semua utai ti kena tegu iya sigi nyadi mas memagang.

Meda baka nya Midas ngangauka Bakus. “Ambi kuasa tu ti udah diberi nuan ngagai aku laban utai tu nadai tau ngidupka aku. Iya sigi munuh aku.”

Bakus lalu ngasuh iya mandi ngagai sungai. Iya ngasuh Midas nyepuhka diri dalam ai ngambika ati iya nadai agi amu, nadai agi rinduka mas.

Nya alai nyau dataika sehari tu semua keresik ti ba sungai nya alai Midas mandi kelia kuning baka mas.