Martin, Tukang Kasut

Tu jerita ari menua Russia. Dalam kampung gugu rumah orang bisi rumah sebuah ti mit di tisi jalai, ti alai Martin, orang tukang kasut diau enggau anak tunggal iya lelaki. Anak lelaki iya nya agi mit. Bini Martin udah mati lebuh anak iya baru beumur tiga taun. Sepemanjai umur iya idup Martin udah diau di rumah nya ngaga kasut enggau nampal kasut orang ti nyau jai. Apai iya pan endang beridup ulih kereja nya, lalu jangka iya anak iya deka nitihka pengawa nya dudi hari.

Martin sigi orang siku ti badas ati. Iya enda kala ngelaungka sembiang di gerija; iya nelap enggau semua orang lalu iya selalu nulung orang ti sakit enggau sida ti seranta. Iya nguji ngaga pendiau diri neladan pendiau Tuhan Isa Almesih.

Nyadi udah umur anak iya duabelas taun iya pan kena sakit lalu mati. Tusah bendar ati Martin laban iya nyau tinggal kediri. Pendiau iya pan nyau jauh amai berubah. Iya ngelengka sembiang lalu mut-mut ke Allah Taala laban iya udah ngasuh anak iya mati. Iya nadai agi nelap enggau orang. Iya mega lalu belabuh belajar ngirup arak. Nya mih, orang ti endang dipebasaka semua orang ari dulu menya diatu nadai agi dipebasaka ulih siku mensia.

Nyadi sekali paderi siku bisi datai ba menua iya  lalu diau dia dua tiga hari. Martin lalu madahka pasal semua penusah iya empu. Ku paderi nya bejaku enggau iya, “Kitai iban enda tetimbangka atur Allah Taala. Kitai patut selalu nundukka peneka iya. Nyadi pasal nuan ti enda lantang, utai nya datai ari nuan empu ti beridup nundaka pengelantang diri aja.”

“Kati baka ni agi tau ngatur pendiau diri?” ku saut Martin.

“Nuan patut ngatur pendiau diri nundaka peneka Allah Taala,” ku paderi nya.

“Kati ku aku tau ngatur pendiau diri nundaka peneka Allah Taala?” ku Martin nanya iya.

Paderi lalu madah ngagai iya, “Bacha surat injil ulih nuan lalu nuan deka nemu; kera semua utai ti patut digaga nuan sigi bisi ditulis dalam injil.”

Udah paderi nya pulai, Martin bepikir lama ke leka jaku nya, lalu nyau deka bangai iya, iya meli surat injil siti. Iya belabuh macha lalu nguji diau badas baka ti dulu menya. Iya lalu ngaga semua utai ti dipesan dalam surat injil nya. Iya macha surat nya ninting hari lalu dalam iya berundingka utai ti dibacha iya ati iya nyau berasai lantang agi. Iya badu agi ngirup, iya pulai niti jalai sembiang baru lalu iya nyadi nelap baru enggau orang.

Nyadi sekali lemai hari udah kereja iya nyau tembu, iya duduk macha inil nya ditulis Santo Lukas, munyi tu, “Lapa utang kita ngumbai aku Tuhan lalu enda ngereja utai ti dipesan aku?” Iya macha jaku tu mega ari injil Santo Mattius, “Orang ti ninga jaku aku lalu enda ngereja iya sigi baka orang ti lap siku ti ngentakka rumah iya ba atas keresik. Nyadi ujan datai lalu ai bah, biau balai nyadi lalu neruju rumah nya lalu iya tumbang.” Udah nya Martin macha pasal orang Parisi siku ti benama Simon ti ngasuh Tuhan Isa makai ba rumah iya. Utang lebuh Tuhan datai iya enda bebasaka iya lalu enda nyambut iya baka ti patut. Iya enda meri ai kena masu kaki, enda nabi iya enggau ati manah, enda meri minyak kena ngunsut buk iya nundaka adat orang bansa nya. Nyadi Martin bisi runding dalam ati diri. Ku iya, “Kati aku tu baka orang Parisi nya? Enti sema Tuhan Isa ngusung aku, patutka aku nerima iya baka nya?” Nyadi dalam iya agi berundingka utai nya iya pan lalu tinduk. Dalam iya tinduk asai dipikir iya, iya bisi nyawa bejaku enggau iya, “Martin, Martin, ngadang nuan ke penatai aku pagila.” Udah nya Martin pan tedani lalu makai salau dulu sebedau iya tinduk.

Taja pan Martin enda tentu arapka jaku ti dijangka iya bisi udah didinga iya, iya angkat dani tinduk tumu amai pagi nya lalu nyapu rumah iya. Dalam ati iya sigi ngadangka penatai nya. Udah iya makai iya duduk nampih jenila lalu belabuh ngereja pengawa iya ti nampal kasut. Dalam iya bekereja iya enda badu-badu malik mega nunga ke jalai. Hari nya pan pemadu chelap. Salju pan udah bisi labuh malam nya lalu semua utai enggau tanah pan nyau kena bap salju. Dataika sejam iya ti bekereja dia sambil bejaga tang nadai bisi orang datai semina siku orang tuai siku ti umang. Iya nya orang ti digaji ulih orang ti diau dia, bekereja nyapu salju ari jalai raya. Gari orang nya nyau jai lalu bulu iya chelap amai. Tengan iya nyapu senentang rumah Martin, iya ngangauka iya.

“Tamaka dalam rumah bekindu.” Orang tuai nya pan tama ke dalam lalu duduk bekindu. Martin lalu ngenjuk kupi ngambika bisi diirup iya. Nyadi lebuh tuai nya mupuk pulai nguai ke pengawa iya, Martin merika iya baju selambar kena nganti gari iya ti nyau jai.

Udah nya Martin lalu duduk baru dampih jenila sereta agi malik nunga ke jalai. Enda lama udah nya iya tepedaka indu temuai siku mansang niti jalai nya. Indu nya nyandang anak mit siku. Salju pan agi labuh. Indu nya pan kena basah. Iya chelapai, agi mega iya lelak enggau lapar. Baju iya empu ti dikena iya ngerayung anak iya. Nyadi sereta Martin meda seduai nya, iya lalu muka pintu rumah lalu ngangauka seduai, ngasuh seduai tama lalu berenti dia. Seduai lalu duduk bekindu. Martin lalu nyalai gari seduai. Iya mega meri seduai makai. Iya nanyaka pasal pejalai seduai. Indu nya lalu madahka iya seduai iya udah datai ari nengeri ti jauh. Laki iya apin lama udah mati. Seduai nadai duit agi lalu nadai bisi pangan mega. Nya alai iya deka pulai ngagai menua diri nyangka tau betemu enggau orang dia ti agi ingatka iya lalu deka nyaup iya. Enda lama udah nya, indu nya angkat deka mupuk bejalai. Martin meri iya duit seringgit enggau baju ujan niang bisi iya.

Martin pulai baru ngagai pengawa iya lalu duduk bejaga. Ku iya dalam ati diri, “Kati, Tuhan tu enda datai sehari tu?”  Bedau lama udah nya iya tepedaka indu tuai siku mansang niti jalai nya ngema takin besai ti penuh ulih buah. Bisi mega bala sida nembiak ti bekeremit nitih iya. Enda mukai-mukai, indu nya tak tegelinchir lalu teterap. Buah iya mabis tepambar sebelah jalai. Sida nembiak nya andal ketawa lalu belabuh ngumpul buah nya lalu dipakai sida. Indu nya ringat bendar lalu deka malu sida enggau tungkat iya tang sida lari lalu enda gagai iya agi. Martin pan begaut nurun ari rumah nangkap sida nembiak nya. Udah sida ulih iya, iya mai sida ngagai indu tuai nya. Ku iya nganu sida, “Kita udah salah ngambi utai ti ukai enggi kita; agi mega kita udah salah laban kita enda bebasaka indu tuai tu.” Sida nembiak pan nyau maluka ulah sida ti tadi lalu belabuh begumpulka buah. Indu tuai nya pan ngampun sida lalu merika sida buah sigi siku ambika dipakai sida.

Udah nya, agi mega Martin pulai ngagai jenila lalu bejaga dataika hari nyau petang. Ati iya nyau tusah laban Tuhan lalu nadai datai ngusung iya. Iya lalu masang lampu lalu makai. Udah badu makai iya duduk macha injil. Nyadi macha ti alai Tuhan Isa bejaku enggau orang munyi tu, “Aku lapar, kita udah meri aku makai; aku aus kita udah meri aku ngirup; aku telanjai kitai udah meri gari ke aku; aku orang temuai, kitai udah nyambut aku; aku sakit kita udah ngabas aku; aku kena tutup, kita udah ngusung aku. Nyadi sida orang ti lurus nyaut iya. Ku sida, “Tuhan, kemaya kami meda nuan lapar lalu meri nuan makai? Kemaya kami meda nuan orang temuai lalu nyambut nuan? Kemaya nuan telanjai lalu kami meri nuan gari?” Nyadi benung Martin macha nya iya pan lalu lelap tinduk ba kerusi iya laban nyau lelak amai.

Nyadi dalam tinduk iya tedingaka munyi nyawa ti bejaku enggau iya. “Martin, aku udah datai ngusung nuan, tang nuan enda ngelala aku.” Martin malik deka meda sapa orang nya ti bejaku, lalu ba teluk bilik iya tepedaka orang tuai siku nya ti nyapu salju. Nyadi iya ngena baju ti udah diberi Martin ngagai iya. Lebuh Martin malik ngagai iya, orang tuai nya lalu tuchum. Udah iya nyau, palan iya diganti ulih indu ti beranak mit. Seduai nya mega merening Martin enggau andal. Seduai iya pan udah nyau. Indu tuai nya ti ngema buah pegari dia. Iya lalu malik ngagai Martin, tuchum lalu nyau. Martin pan dani: surat injil masih telengka dipangku iya. Iya lalu macha baru leka jaku Tuhan Isa ti munyi tu, “Laban kita udah ngereja nya ke sida ti menyadi aku, kita udah ngereja iya ke aku mega.” Udah nya baru Martin nyau mereti.