Pemarai Jesus

Lebuh Jesus udah badu besampi, Iya enggau sida murid Iya lalu meraka Lebak Kidron, ngagai siti endur ti bisi sebidang kebun. Jesus enggau murid Iya lalu tama ngagai kebun nya. Nyadi Judas, ke udah nyual Iya, mega nemu endur nya, laban Jesus udah suah begempuru dia enggau sida murid Iya. Nya alai Judas mai seraban soldadu, enggau bala polis ari sida tuai imam enggau orang Parisi, lalu sida datai dia bebaika lampu, sempun enggau senyata. “Sapa orang ke digiga kita?” tanya Jesus. “Jesus orang Nasaret,” ku bala mayuh. Jesus nyaut, “Aku mih tu.” Judas, ke nyual Iya, bisi bediri dia enggau sida. Lebuh Jesus nyebut ngagai sida, “Aku mih tu,” sida nyurutka diri lalu rebah ke tanah. Iya lalu nanya sida baru, “Sapa orang ke digiga kita?” Bala mayuh nyaut, “Jesus orang Nasaret.” “Aku udah madahka Diri ngagai kita.  Nya alai, enti kita ngiga Aku, lepaska sida tu.” Tu ngamatka jaku ti udah disebut Iya, “Nadai siku sida ke udah diberi Nuan ngagai Aku, lenyau.” Simon Peter, ke bisi mai pedang, lalu nyintak pedang iya, lalu mantap ulun imam besai, mutuska pending kanan iya. Nama ulun nya Malkus. Bala soldadu enggau kepala sida, enggau bala polis orang Judah nangkap Jesus, lalu nanchang Iya. Terubah, sida mai Iya ngagai Anas, mentua lelaki Kaiapas ke nyadi imam besai ke taun nya. Kaiapas nya mih orang ke udah meri jaku lalau ngagai orang Judah, madahka manah agi enti siku orang mati ngarika semua orang mayuh. Simon Peter enggau siku murid ti bukai nitihka Jesus. Laban murid ke siku nya dikelala imam besai, iya tama enggau Jesus ngagai tengah laman rumah imam besai, tang Peter bediri di luar, ba mua pintu. Nya alai murid ke siku nya, ke dikelala imam besai, pansut lalu bejaku enggau indu ke nyaga mua pintu, lalu mai Peter tama. Indu ke nyaga mua pintu nya lalu bejaku ngagai Peter. “Nuan tu siku ari murid orang nya, ukai enda?” Peter nyuat, “Ukai.” Nyadi bala orang gaji enggau orang polis udah nungkun api, laban hari chelap, lalu sida bediri bekindu ngelingi api nya. Peter mega bediri bekindu enggau sida. Imam besai lalu nanya Jesus pasal sida murid Iya, enggau pasal ajar Iya. “Aku udah bejaku enggau terang di mua semua orang. Aku udah seruran ngajar dalam balai gempuru enggau dalam Rumah Sembiang, alai orang Judah ke begempuru. Aku nadai kala belalai bejaku. Nama kebuah nuan nanya Aku? Tanya orang ke udah ninga Aku pasal jaku ti disebut Aku ngagai sida. Sida nemu utai ti udah disebut Aku,” pia ku Jesus. Lebuh Jesus udah nyebut nya, siku polis lalu nampar mua Iya, ku polis nya bejaku, “Kati nya jalai Nuan nyaut imam besai?” Jesus nyaut, “Enti Aku udah salah jaku, padahka penyalah nya ngagai Aku. Tang enti Aku nadai udah salah jaku, nama kebuah nuan nampar Aku? Anas lalu ngasuh orang mai Jesus, ke mengkang ditanchang, ngagai Imam Besai Kaiapas. Nyadi Peter benung bediri bekindu. Sida lalu nanya iya. “Nuan tu siku ari murid orang nya, ukai enda?” ku tanya bala mayuh. “Ukai,” ku saut Peter. Siku ulun imam besai, kaban belayan orang ke udah putus pending dipantap Peter, lalu nanya, “Ukai enda nuan tu ke dipeda aku dalam kebun nya tadi? “Ukai,” ku Peter. Peter lalu besangkal baru. Lebuh maya nya manuk lalu mengkukuk. Sida lalu mai Jesus ari rumah  Kaiapas, ngagai istana gabenor. Hari lebuh maya nya agi tumu pagi. Sida enda tama ngagai istana, enggaika sida enda tuchi lalu enda ulih makai pemakai Gawai Paska. Nya alai Pilate pansut ke luar ngagai sida, lalu nanya, “Nama dawa kena kita ngelaban orang tu?” “Enti orang tu nadai udah ngereja penyalah, kami tentu enda nyerahka Iya kitu ngagai nuan,” ku sida nyaut iya. Pilate lalu nyaut sida, “Bai Iya ari tu ulih kita, lalu akim Iya nitihka adat kita empu.” Sida orang Judah lalu nyaut, “Kami enda tau munuh orang.” Tu ngamatka jaku Jesus Empu, lebuh Iya madahka gaya pemati ti deka ditatka Iya. Pilate lalu pulai baru ke dalam istana, ngangauka Jesus, lalu nanya Iya, “Kati Nuan Raja orang Judah?” “Kati nuan nyebut nya ari ati nuan empu, tauka orang bukai bisi udah madah ngagai nuan pasal Aku?” ku terang Jesus. Pilate nimbal Iya baru, “Kati aku tu orang Judah? Bansa Nuan Empu enggau sida tuai imam udah nyerahka Nuan ngagai aku. Nama utai ti udah dikereja Nuan?” “Perintah Aku ukai ari dunya tu. Enti perintah Aku ari dunya tu, bala orang ke nitihka Aku tentu deka ngelaban ngambika Aku enda diserahka ngagai orang Judah. Tang perintah Aku ukai ari dunya tu,” pia ku terang Jesus. Pilate nanya Jesus baru, “Reti nya Nuan tu Raja?” “Nuan ngumbai Aku Raja. Nya mih kebuah Aku ada, lalu ketegal nya mih Aku udah datai ngagai dunya, ngambika Aku besaksika pasal pemendar. Semua nembiak pemendar mendingka nyawa Aku.” Pilate lalu nanya Iya, “Nama utai ti dikumbai pemendar?” Lebuh Pilate udah nyebut nya, iya pansut baru ke luar ngagai orang Judah, lalu madah ngagai sida, “Aku nadai nemu penyalah Iya. Tang kita bisi siti adat asal ti ngasuh aku ngelepaska siku orang tutup ke kita lebuh Gawai Paska. Kati kita dekaka Aku ngelepaska Raja orang Judah tu ke kita?” Sida lalu manjung nyaut iya, “Ukai Iya, tang Barabas!” Nyadi Barabas nya siku perumpak. Udah nya Pilate mai Jesus lalu ngasuh Iya disipat. Sida soldadu lalu ngaga siti makota duri, lalu ngengkahka makota nya ba pala Iya, lalu ngerasukka baju panjai ti ungu ba Iya. Udah nya sida majak mansang ngagai Iya, ku sida, “Tabi, Raja orang Judah!” lalu nampar mua Iya. Pilate pansut baru, lalu bejaku ngagai sida, “Peda kita, aku mai Iya pansut ngagai kita, ngambika kita nemu aku nadai nemu penyalah Iya.” Nya alai Jesus pansut, ngena makota duri, enggau baju panjai ti ungu. Pilate lalu bejaku ngagai sida, “Tu Iya!” Lebuh sida tuai imam enggau bala polis meda Iya, sida manjung, “Regang Iya! Regang Iya!” Pilate lalu bejaku ngagai sida, “Bai Iya enggau kita, lalu regang Iya. Aku nadai nemu penyalah Iya.” Orang Judah lalu nyaut iya, “Kami bisi adat, lalu nitihka adat nya, Iya enda tau enda mati, laban Iya udah ngumbai Diri Anak Allah Taala.” Lebuh Pilate ninga nya, iya lalu balat agi takut. Iya tama baru ke dalam istana,lalu nanya Jesus, “Ari ni penatai Nuan?”  Tang Jesus enda nyaut. Nya alai ku Pilate bejaku ngagai Iya, “Kati Nuan enggai bejaku enggau aku? Kati Nuan enda nemu aku bisi kuasa ngelepaska Nuan, enggau kuasa ngeregang Nuan?” Jesus lalu nyaut iya, “Nuan nadai kuasa atas Aku enti kuasa nya enda diberi ari atas. Nya alai orang ke nyerahka Aku ngagai nuan besai agi dosa ari nuan.” Berengkah ari nya Pilate lalu nguji ngiga jalai ngelepaska Iya. Tang ku orang Judah manjung, “Enti nuan ngelepaska orang tu, nuan ukai pangan Raja Besai! Barang sapa ngumbai diri raja, sigi ngelaban Raja Besai!” Lebuh Pilate ninga nya, iya lalu mai Jesus pansut, lalu duduk ba penuduk akim, ba endur ti dikumbai “Geladak Batu” (reti nya “Gabata” dalam Hebrew). Hari nya Hari Alai Nyendiaka Gawai Paska. Hari lebuh maya nya nyau kira ba urung tengah hari. Pilate lalu bejaku ngagai orang Judah, “Tu Raja kita!” Sida lalu manjung, “Bunuh Iya! Bunuh Iya! Regang Iya!” Pilate lalu nanya sida, “Kati kita ngasuh Aku ngeregang Raja kita?” Sida tuai imam lalu nyaut,“Kami nadai raja bukai, kelimpah ari Raja Besai!” Pilate lalu nyerahka Jesus ngagai sida, ngambika Iya diregang. Sida lalu mai Jesus. Jesus lalu bejalai, ngesan regang Iya Empu, ngagai siti endur ti dikumbai “Endur Keruntuk,” ti dikumbai Golgota dalam Hebrew. Dia sida lalu ngeregang Iya, enggau dua iku orang bukai, siku ari sepiak-sepiak Iya, lalu Jesus ba entara seduai iya. Pilate mega nulis siti pelekat, lalu ngelekatka pelekat nya ba regang nya. Tu jaku ti ditulis ba pelekat nya: “Jesus orang Nasaret, Raja orang Judah.” Mayuh orang Judah macha pelekat nya, laban endur alai Jesus ke diregang nya semak nengeri, lalu pelekat nya ditulis dalam jaku Hebrew, Latin enggau Gerika. Sida tuai imam lalu bejaku ngagai Pilate, “Anang nulis ‘Raja orang Judah,’ tang tulis aja, ‘Orang tu ngumbai Diri Raja orang Judah.’“ Disaut Pilate, “Utai ti udah ditulis aku, mengkang ditulis.” Lebuh bala soldadu udah ngeregang Jesus, sida ngambi gari Iya, lalu bedua gari nya ngagai empat iti bagi, sebagi ke siku-siku soldadu. Sida mega ngambi baju panjai iya, ti ditenun selajur enda dijait kenyau ari atas nyentuk ke baruh. Nya alai ku sida bejaku enggau pangan diri, “Anang nyarikka tu, tang awakka kitai bechabut undi ke baju tu.” Tu ngamatka Bup Kudus: “Sida bedua gari Aku entara bala sida lalu bechabut undi ke baju panjai Aku.” Lalu nya utai ti dikereja sida soldadu. Lebuh semua utai nya benung nyadi, indai Jesus, menyadi indai Iya, iya nya Maria bini Klopas, enggau Maria Magdalin bediri semak regang Jesus. Lebuh Jesus meda indai Iya, enggau murid ke dikerinduka Iya bediri ngimbai iya, Iya lalu bejaku ngagai indai Iya, “Indu, tu anak nuan.” Iya lalu bejaku ngagai murid nya, “Tu indai nuan.” Berengkah ari nya murid nya lalu mai indai Jesus ngagai rumah iya empu. Udah bekau nya, lebuh Jesus nemu semua utai udah tembu magang, Iya lalu bejaku, “Aku aus.” Tu ngamatka Bup Kudus. Ba endur nya bisi sigi kebuk ti penuh laban wain ti masam. Nya alai sida ngengkahka siti bungai karang ti penuh laban wain ti masam nya ba pating isop, lalu nuatka utai nya ngagai mulut Iya. Lebuh Jesus udah nerima wain nya, Iya lalu bejaku, “Udah tembu!” Iya lalu ngendukka pala, lalu ngapuska seput. Laban hari nya Hari Alai Nyendiaka Gawai, orang Judah enggai nejuka bangkai Jesus mengkang ba kayu regang lebuh hari Sabat (kelebih agi laban hari Sabat nya amat kudus). Nya alai sida lalu minta Pilate ngasuh orang matahka kaki orang ke diregang, ngambika bangkai sida tau diambi ari regang nya. Sida soldadu mansang lalu matahka kaki orang ke terubah, enggau kaki siku ti bukai ke diregang sama enggau Jesus. Tang lebuh sida datai ngagai Jesus, lalu meda Iya endang udah mati, sida enda matahka kaki Iya. Tang siku soldadu ngerejang rusuk Jesus ngena sangkuh. Tekala nya darah enggau ai lalu ensambur pansut. Siku orang ke meda nya, udah besaksika pasal utai nya, ngambika kita mega arap. Jaku saksi iya endang amat, lalu iya nemu diri endang madahka utai ti bendar. Utai tu nyadi ngambika Bup Kudus dikamatka, “Nadai siti tulang Iya dipatahka.” Siti agi genteran dalam Bup Kudus bisi mega nyebut, “Orang deka merening ngagai Iya ti udah direjang sida.” Udah nya, Josep ke datai ari nengeri Arimatea, ke udah nyadi murid Jesus ngena chara belalai laban iya takutka orang Judah, minta Pilate ngemendarka iya ngambi bangkai Jesus. Pilate lalu ngemendarka nya. Nya alai Josep mansang lalu ngambi bangkai Jesus.  Nyadi Nikodimus, ke dulu ari nya udah datai ngagai Jesus lebuh malam hari, mega datai mai kira 35 kilogram mur bechampur enggau garu.Seduai iya ngambi bangkai Jesus, lalu mungkus Iya ngena kain linin, sama enggau rempah nya, nitihka adat asal orang Judah kena nyendiaka bangkai sebedau iya dikubur. Nyadi ba endur alai Jesus ke diregang bisi sebidang kebun, lalu ba kebun nya bisi siti kubur ti baru udah tembu digaga, ti nadai udah kala dikena alai nguburka orang. Nya alai laban hari nya Hari Alai Nyendiaka Gawai, lalu kubur nya semak dia, seduai iya lalu ngalika Jesus dia.