Aum Manang Gagak Enggau Sida Jelu

Bisi sekali anak mensia baum enggau semua jelu, sida Rusa, Jani, Kijang, Enturun, Beruang, Ingkat, Bengkang, Munsang, Bejit, Nyumbuh, Empeliau, Kera, Rasung, Engkuli, Sinang, Tupai, Mayau enggau Pelanduk.

        Jelu pan seribu udah datai, anak mensia pan lalu bejaku, “Aku tu pia,” ku jaku anak mensia, “mai kita bumai. Kita salah, puas makai padi kami, semua kita jelu.”

          Lalu ku Jani, “Aku ka!”  Jani  bejuluk Serambi Langkau Uan.

          “Aku ka!” pia ku Rusa bejuluk Gangga Guntur Demaram.

          “Aku ka!” Nya jaku Kijang bejuluk Simbang Jerungkang Tanam.

          “Aku pia!” ku Pelanduk bejuluk Kayu Alah Sengapa Alai Nepan.

          “Aku ka!” ku jaku Engkuli bejuluk Pua Kumbu Tenun Endu Puyu Berujan.

          “Aku ka,” nya jaku Beruang bejuluk Beliung Kabang Pemungga Batang Ban.

          “Aku ka,” nya jaku Munsang bejuluk Rambut Ubung Gadung Kena Lulong Ngelapung Baja Anyam.

          “Aku ka,” pia ku Bejit bejaku beirit-irit munyi terumpit baris meriam.

          “Aku ka,” nya jaku Nyumbuh, bekaban mayuh bunyi antu bala teguran.

          “Utang kati baka pengawa ngereja umai?” pia ku jaku semua jelu.

          Lalu manang Gagak bejaku madahka pengawa ngereja umai.

          Ku manang gagak, “Dulu kita ngiga tanah, udah bulih tanah nya baru kita beburung; udah nya baru kita manggul; udah manggul, nebas; udah nya nebang, nunu, nugal, mantun, ngetau, ngindik, nyembui, ngisar, nutuk, nampi, nyumai, baru tau dipakai.”

          “Oh! Enda ulih kereja,” pia ku Jani, “nyamai agi aku mai kaban diri empu nyengkuran.”

          “Aku pia,” jaku Rusa, “nyamai agi mai kaban ayah ngiga ulam.”

          “Aku pia,” jaku Kijang, “pama agi ti aku mensiang batang perugan lengkan.”

          “Aku enggai mih bumai,” nya jaku Beruang, “beguna agi enti aku beridupka labang madu renyuan.”

          “Aku pia,” nya jaku Pelanduk, “nyamai agi enti aku nganti pengelabuh buah buan.”

          “Aku enda mih bumai,” nya jaku Engkuli, “nyamai agi aku idup ari pangan.”

          “Aku enda mega bumai,” pia jaku Munsang, “nyamai enti aku ngiga sarang burung sengayan.”

          “Aku enda mih bumai,” nya jaku Kera, “aku tau idup ari upa senggang senganan.”

          “Kaban aku enda mih bumai,” pia ku jaku Bejit,  mupuk ngelesit buah berangan.

          ‘Aku enda mega bumai,”  pia jaku Tupai, ngadang diri idup ari tangkai pinang rutan.

          “Enti munyi tu, nadai bumai mih semua kita jelu,’ ku Manang Gagak.

          “Utang enti kita Jani puni padi kami, kita busung pangka peti ngelingi sepan;

enti kita Rusa makai padi kami kita busung pangka amba jarin rutan; enti kita Pelanduk makai abuk, kita busung sintak panjuk beumpan buah buan; enti kita Kijang makai jabang, kita busung tama pencharan.” Tu  jaku manang Gagak enggau sida jelu mayuh. Nadai engkeretik bala jelu ninga jaku tangkang manang Gagak. Tak ngetu mih sida baka puyu mabuk ambuh, tak ngenung mih sida baka empelekung mabuk keruh.

            Nyau kepuas ke enda memunyi dia Pelanduk lalu angkat bejaku. “Aku tu kiraka ngarika bala kami sebilik. Nyadi nadai ku enggau mih enti munyi nya jaku manang. Barang ku nuan mih ke udah ngeletakka jaku ngagai kami. Deka pan enda dititih kami mih atur nuan.” Jelu bukai pan bela chapuh bejaku madahka besetuju enggau penemu Pelanduk nya.