Manduk Paku Lawang

Kira ke setaun nampun di bukit, lalu sebulan nandan di langit, udah bekau Apai Sali ke bam deka makai lelabi nengali kediri, dia iya lalu nemuai ngagai akan iya ti benama Apai Seumang Umang. Datai iya ba rumah Apai Seumang Umang, Apai Sali lalu nganggau nanyaka penyadi rumah Apai Seumang Umang tau enda kini ditiki enggaika bisi penti pemali taja pan pelepa nadai diengkahka Apai Seumang Umang ba pala tangga.

Apai Seumang Umang pan lalu nyaut, “Niki unggal, Niki akan Apai Sali,” pia ku Apai Seumang Umang ngelaluka iya enggau ati ti gaga laban seduai ti lama bendar udah nadai ngusung pangan diri. Nyadi ninga munyi nya dia Apai Sali pan nadai kakang ati lalu niki rumah Apai Seumang Umang laban seduai iya sigi teleba enggau pangan diri.

Datai ba rumah Apai Seumang Umang dia dih lalu pansut indu siku, nyadi indu nya nadai utai ngemajik-majik nya lebuh rambau nya kelia lalu mai tikai selambar sereta lalu nganchauka tikai bebuah ke naka iya pemanah ambi ke bisi alai Apai Sali duduk. Nyadi tudah Apai Sali lebuh ke meda indu nya pansut nganchau tikai ba ruai endang tak tebelenga lilih, temati kutu pengerindu iya meda pemajik gamal indu nya tadi. Apai Sali pan lalu enda berasai sambil ti tebelenga nya sempat ga iya ngijapka mata ngagai indu nya tadi.

Meda iya baka nya dia Apai Seumang Umang lalu nundi Apai Sali, “Tau nya digayap nuan dih akan,” ku iya bungah meda akan iya Apai Sali ti endang pama bungah enggau semua orang. 

Apai Sali pan lalu nyaut, “Anang ke semina deka ngayap ngagai iya aku akan, tak lalu ninduk kediri enggau iya deka mih aku,” pia ku Apai Sali sambil tak malik ke tisi. 

Indu nya tadi pan lalu tuchum sereta malik ke bukai laban malu malik ngagai Apai Sali ninga jaku iya ti munyi nya tadi lalu sekumbang ti ka tama ke bilik ke baru sempat ga indu nya tadi nyeling belalai ngagai tudah Apai Sali ti benung duduk ba tikai ti dianchau ke indu nya tadi. Indu nya pan lalu sempat ga nibar ke jaku ngagai Apai Sali sebedau iya tama ke bilik baru, “Anang pia mih nuan Apai Sali. Nuan ga udah bisi bini,” pia ku iya. 

Apai Sali pan lalu enda berasai ga nyaut indu nya, “Oh ti baka nya ukai enda tau bujang baru ga aku tu dih wai,” pia ku iya nyaut lalu ngetupka ngeli iya laban tak abis ati meda indu nya.

Udah nya indu nya pan lalu pansut baru ga ke ruai nganjung baku alai sarang insap enggau sarang pinang ambi ke bisi di tungga Apai Sali sekumbang ti berandau enggau Apai Seumang Umang lebuh ke berandau ba ruai dia. Mayuh macham mih utai ti di kerandau ke seduai lebuh maia nya. Apin lama udah seduai iya ti betungga dudok berandau dia, alai seduai iya lalu ninga orang indu tak nyau danggai danggai ngumbai mai makai ke bilik. Nyadi indu nya tadi anak dara Apai Seumang Umang.

“Makai aya, makai! Lapar nuan jangka aku laban ti pama diri ga penyauh rumah kita ari kami ditu.” Pia ku anak dara Apai Seumang Umang ngumbuk Apai Sali mai makai ke bilik sida.

“Au mih’” ku iya. 

“Eh anang ngaya ngayaka pangan endu, agi bujang aku tu. Bujang baru,” pia dih ku Apai Sali. Kira ke sepengelama diluaka iya sempa pinang dia Apai Sali nya pan lalu tama ke bilik laban pemakai sigi udah dienah ke anak Apai Seumang Umang nya tadi.

Tak baru berengkah makai Apai Sali enggau Apai Seumang Umang dia Apai Sali lalu bejaku nanya Apai Seumang Umang. 

“Nama batang enggau daun tu tak bengat ngenyamai nya dih akan,”. 

“Eh aya! Paku nyah nya, ulih aku ngiga di tembawai langkau ba belakang rumah kami tu,” pia ku anak dara Apai Seumang Umang. 

Apai Sali pan sempat ga nyaut, “ Eh, anang beaya-aya. Tak kanggauka unggal pia nyah. bujang baru dih aku tu,” pia ku iya.

Badu sida iya nya tadi makai dia Apai Sali lalu madahka diri deka pulai ngagai Apai Seumang Umang. Apai Sali pan lalu mupuk mulai kediri ngagai rumah iya empu, lalu sepemanjai jalai iya ti mulai kediri, iya endang nadai jaku bukai, iya nya beulang ulang nyebut “Paku! Paku! Paku! Nyamai amat paku. Sekayu kayu jalai iya nyentuk ke nyau deka datai ba rumah iya laban enggai kediri enda ingat ke utai ke lauk ba rumah Apai Seumang Umang tengah hari nya tadi.

Datai Apai Sali ba sungai siti tak enda mukai mukai dih tudah Apai Sali laban ti beguai-guai sereta belanda betitika jalai, lalu belanda niti batang ti udah buruk nyengkar sungai nya dia dih batang kayu nya lalu patah dua nabanka iya labuh ke ai. Sereta mih iya nyau pansut ari sungai nya dia iya lalu nadai ingatka nama utai ti ke lauk sida iya Apai Seumang Umang tengah hari nya tadi. Nyepi diri empu enda ingat ke lauk “Paku” nya tadi dia Apai Sali lalu nyelam dalam sungai ba alai batang nya ti patah tadi nyentuk ke leka mata iya nyau merah baka buah kundung, tang lalu ga iya enda ingat kediri ti belaukka “Paku” nya tadi.

Apai Sali pan lalu nikal baru ga ngagai rumah Apai Seumang Umang laban deka nanya eanama lauk sida iya tengah hari nya tadi. Lebuh iya nyau datai ba pendai sida Apai Seumang Umang, iya benasib bendar laban lalu betemu enggau anak dara Apai Seumang Umang ti benung nyaukka labu. Apai Sali lalu beguai guai nanya anak dara Apai Seumang Umang,

“Eh nama penama lauk kitai tengah hari tadi dih, endu Wai?” ku iya. “Di sebut aku belama ga tadi, tang lebuh aku ti belanda niti batang ke nyengkar ai nya tadi dia iya lalu patah nabanka aku labuh ke ai. Udah nya aku lalu enda ingat agi ke nama lauk kitai nya.” pia ku iya. 

“Kasih dih nuan. “Paku” nyah nya tadi ke lauk kitai, “Paku” keruan ga nuan enda beli,” pia ku anak dara Apai Seumang Umang madah ke Apai Sali. 

“Enda ga beli, tang tak enda ingat ke nama “Paku” nya,” ku iya nyaut.

Malu bendar tudah Apai Sali, tang enda ibuh kediri malu laban ti enda ingat ka nama “Paku”, laban nyawa tak sigi bam sereta enda tentu tak ibuh ke pemalu agi ga iya. Apai Sali pan lalu beguai guai ga belanda pulai baru ke rumah iya empu. Nyau kepuas iya ti belanda dia iya lalu ngetu ba tebing sungai laban ti kelalu lelak sereta ikak bekau ti belanda nya. Lebuh iya ti duduk ba tebing sungai nya dia iya lalu tepedaka siku ikan Semah, nadai utai ngemesai mesai nya ngulap mansut ke mulut iya ke atas ai semak iya ti duduk nya tadi. Apai Sali pan lalu bejaku kediri,”Apo! Besai bendar ga ikan Semah tu! Naka mih penyamai ikan tu enti iya udah dipanduk,” ku iya.

Lebuh ti nyebut nya tadi dia iya lalu enda ingat ke “Paku” nya baru. Naka ga pemedis iya dih ati tudah Apai Sali ketegal ti enda ingat baru ke lauk ”Paku” nya tadi. Iya pan nyau enda berasai ga lalu ngetil mulut diri empu ketegal ti barang utai rara sekumbang ti ngetu belelak ba tebing sungai nya tadi. Lebuh ke ngetil mulut diri dia iya lalu mengkakai, “Akai! Pedis amat ga,” ku iya. Mulut iya pan nyau bangur laban getil iya tak naka iya pengudu ketegal ti pedis ati nya tadi.

Apai Sali pan lalu belanda baru ga ngagai rumah sida Apai Seumang Umang mai mulut diri empu ke nyau simbing laban bangur laban ti digetil iya tadi. Datai Apai Sali ba pendai sida Apai Seumang Umang, iya mega seninjik bendar laban lebuh nya bisi tudah bini Apai Seumang Umang ga benung mandi. Iya lalu enda chamang chamang lalu nanya bini Apai Seumang Umang. “Nama lauk kitai pagi tadi Wai ?” ku iya. “Keba nuan tu tambap enda ingat ke utai. “Paku”, “Paku nyah nya tadi ke lauk kitai, Paku” ku bini Apai Seumang Umang.

Ke sekali tu Apai Sali lalu mulai kediri ngagai rumah iya empu. Nama agi dih sereta Apai Sali tu tadi datai ba rumah iya din, dia iya lalu beguai-guai ngasuh Sali ngiga tukul enggau raga deka kena iya ngiga paku. Udah mih tukul engga raga nya di sua ke Sali ngagai apai iya, dia Apai Sali nyau berumban rumban ga mupuk baru laban enggaika hari malam lalu enggai kediri ke enda bulih paku laban ti agi belala makai paku ti dipanduk anak dara Apai Seumang Umang nya tadi. Iya pan lalu mupuk ngagai tungga tembawai langkau lama sida suba. Tang mih Apai Sali lebuh ke makai nya tadi nadai nanya ke bakani bansa paku lalu sida Apai Seumang Umang pan nadai ga madah ngagai iya ni bagi bansa paku ke tau di empa, tak semina nyebut nama lauk nya “Paku” aja ke diempa sida ke dikumbai Apai Sali nya nyamai.

Meda pengawa iya ke beguai guai baka nya Enchelegit seduai Sali sigi enda bemunyi meda pengawa iya lalu enda nanya ke guna Apai Sali enggau tukul sereta raga nya laban seduai iya nyangka iya deka ngaga langkau umai. Datai Apai Sali di tembawai langkau, iya lalu enda chamang chamang mabut semua paku lawang ke bisi dipeda iya lekat ba ramu tembawai langkau nya. Nama agi dih tak nyau baka orang ke muar manyi gaya penyampat Apai Sali mabut paku dia. Enda lama peda nyau bulih seraga mit semua paku ke udah dibabut iya maya nya. Apai Sali pan nyau lelak laban ti berumban kia-kia sereta lalu berunding mulai kediri ngagai rumah sida iya empu.

Datai di rumah, Apai Sali lalu enda chamang chamang lalu nanggar ke periuk tanah sida iya, alai iya ngerebus paku ke ulih iya ba tembawai nya tadi. Lebuh maya nya Sali seduai indai iya udah nurun mandi ke ai. Lebuh iya ti manduk paku nya dia iya meda ai paku lawang ti betegar nya nyau kuning pelepung tegar laban ai anggat. Enda nyalah-nyalah baka ke bisi digulai kari enggau santan penguning ai rebus paku lawang Apai Sali nya tadi.

“Apo! Amat gemu ga lauk Paku tu. Enda ngutuk lebuh iya di empa ba rumah sida Apai Seumang Umang tengah hari tadi tak naka iya penyamai. Tu baru iya naka iya penyamai lauk Paku sereta kuah iya tu lagi,” pia ku Apai Sali bejaku kediri merening rebus paku iya nya dalam periok tanah ke ditanggarka iya.

Kira nyau bulih stengah jam Apai Sali udah manduk Paku nya ba periuk tanah, iya pan lalu beguai ga deka nyepi pemansau lauk Paku nya. Sereta mih Paku nya disepi, iya lalu nadai runding agi, lalu di kunyah iya Paku nya tadi. Sepi iya tak nadai utai bengat ngering nya asai Paku ke dikunyah iya, ngeli iya pan lalu patah sereta dilah iya pan lalu betu, mulut pan nyau bangur laban anggat Paku nya tadi. Apai Sali pan pedis bendar ati meda Paku nya kering bendar dikunyah iya sereta balat ngemediska iya. Apai Sali lalu angkat sereta lalu nyipak periuk tanah ke alai iya ngerebus paku nya tadi. Nama agi dih periuk nya pan lalu siuh sereta tebelungging manjah tapa kaki iya. Iya pan lalu rauh-rauh manjung dalam bilik ba rumah iya nya munyi orang ti begauka orang parai empa pemedis iya natka kaki iya ti betu sereta mayuh pemedis bukai ke ulih iya ketegal ti bam deka makai belauk Paku.

“Akai Indai Duat!, Angat Indai Duat !” ku iya rauh-rauh nyabak maring kediri ba sebelah bilik. Lebuh iya ke tak benung ngelingkang baka belut nya dia Sali seduai indai iya baru pulai ari pendai udah ti mandi. Sali seduai indai iya sama enda engkeretik meda Apai Sali nya ti ngeransi sereta ringat laban enggai Kediri di anu iya ngapa. Dia mih tudah Apai Sali rauh-rauh nadai orang ngaum nat ke pemedis.

“Akai Indai Duat !, Angat Indai Duat !” ku iya. 

Bini iya Enchelegit pan lalu nyaut, “Keba nuan tu tambap lap, lunggau tatau, mamau ! Sapa orang ke bisi makai belaukka paku lawang,” “Iya ga paku, ku anak dara Apai Seumang Umang madah ngagai aku tadi. Nya alai Paku ga ke dipandok aku nya tadi ka ke lauk,” ku Apai Sali nyaut Enchelegit. 

“Enggi orang ga ukai “Paku Lawang” ke lauk, “Paku Ikan” nya mih daun babas ke tau ke lauk kitai,” pia ku bini Apai Sali madahka reti nya ngagai Apai Sali. Apai Sali pan lalu bepaut dagu, sereta lalu ambi iya pua tekalong lalu pansut ke ruai bebungkur apus nat kediri gali ngicha ke mata deka tinduk laban ngetatka pemedis udah ti deka makai Paku.