Aku Jimas

Sepengudah nerima kangau telefon ari Jimbun, Beremas lalu terus begeguai nyikap diri laban ke deka betemu enggau Jimbun. Ati iya ke penuh dilamun pengerindu nya nyau berasai lelengau bendar deka betemu enggau buah ati perembam dalam. Beremas lalu milih baju ke dikerinduka Jimbun. Baka uduk ke labuh anak tudah Beremas nyikap diri. Beguai-guai gagit.

Udah bisi sebulan nampun di bukit pengelama iya enggau Jimbun udah enda betemu mua, beperening mata. Lebuh Beremas mai Jimbun betemu bisi aja dalih Jimbun madahka diri enda ulih betemu enggau iya. Beremas baka orang ke mawa, nyau berendam ai mata enda milih siang enggau malam laban lelengauka Jimbun. Kangau telefon ari Jimbun tadi lalu peminta Jimbun deka betemu nya endang baka siti berita besai ke ngasuh iya gaga sereta gagit. Beremas tak tuchum lelegup meda mua diri empu ba cheremin.

Enggai muai awak, tiap minit tiap sikin sigi dikira. Iya lalu terus nyapai kunchi kerita. Ati iya belagu gaga laban deka betemu enggau buah ati perembam dalam. Ketap tungkul atau iya nyau dedegup laju baka peluru leka senapang. Udah lama amat nya nganti peluang ti baka tu. Iya enda peduli. Jam sigi bedau tang iya nurun tumu ari awak ke ditetapka Jimbun. Beremas enggai laun. Nadai ngawa ga iya baka ke melit nengah ulu Kanowit semalam ba rantau jalai. Nadai ngachau mih iya baka ke muntang nengah ulu Limbang taja pan lubah tumu mih datai. Pengerindu iya ke Jimbun sigi enda ulih ditiap baka ke niap singkap kerawai midang, penyayau iya endang enda ulih diitung baka ke ngitung lempaung ngambung ba batang. Engkurak asai ati iya din empa pengerindu enggau penyayau iya ke Jimbun. Semina antu ke nemu sereta petara ke ninga sada ati iya nya.

Beremas duduk  ba mija makai ba palan ke seruran alai seduai iya singgah sangkai makai. Iya lalu mesan ai enggau pemakai ke dikerinduka Jimbun tang iya mesan penempara enda ngasuh iya nganjung pemakai enggau ai nya dulu tang nganti penatai buah ati iya, Jimbun. Seraya ke nganti, Beremas lalu ngeluarka kereban penganta sereta meda jam tangan iya. Jejampat iya ngias mua diri sebedau Jimbun datai.

“Jimbun, amatka dek sayau ke aku?” tanya Beremas.

“Lapa dek nanya tanya ti baka nya dih?” ku Jimbun.

“Sampai tua parai ila ... au semaya.” Ku Beremas.

“Ya, sampai tua parai mih ...semaya.” Tuchum Jimbun.

Tang nya mih jaku ke penudi ari Jimbun maya seduai betemu madu pengerindu. Nyau ke ujung hari Jimbun seruran bendar nyeliahka diri ari ke betemu enggau Beremas. Tusah bendar Jimbun deka malas SMS tauka nyaut telefon Beremas, nama agi deka betemu mua enggau iya. Berasai bendar Beremas ngasaika diri majak jauh-sejauh ari Jimbun. Iya empu pan enda nemu kebuah tang Beremas tetap bepegai ba semaya iya enggau Jimbun. Iya nguji enggau naka ulih bepikir chara positif awakka iya ulih releks mimit lalu nadai ngembuan peragam ati ti jai ngagai Jimbun, buah ati perembam dalam iya nya.

Enda memukai benung runding enggau pikir Beremas jauh nimpai ke seberai tak bisi siku indu bediri chegit-chegit ba mua iya.

“Beremas.” Ku indu nya nengkau iya.

Indu nya lalu terus duduk ba mua iya. Gari ke dikena indu nya bisi dipeda seksi mimit.

“Ya. Dek sapa? Kati dek nemu nama aku?” pia ku Beremas alit ati.

“Aku tu Jimas. Jimbun enda nyadi datai.” Ku jaku padah indu nya enggau sada nyawa ti alus.

“Dek tu sapa? Ni Jimbun dih?” Ati Beremas enda berasai nyamai, tak berasai kesal di jungkal kandang kamai.

“Aku tu Jimas. Jimbun enda ulih datai lalu enda ibuh agi dek nganti iya. Nadai dek ulih betemu enggau iya udah tu.” Pia ku Jimas seraya ke murus buk iya empu.

“Dek tu sapa? Dek bisi nama-nama enggau Jimbunka? Udah lama dek enggau Jimbun pia? Patut mih Jimbun enggai betemu enggau aku. Uji dek madah, dini endur Jimbun diatu?” nyau betampung burit tanya ari Beremas.

Jimas semina ngilingka pala. Iya baka ke enggai nyaut semua tanya Beremas nya. Makin lama makin pedis ati Beremas. Nyau begirau. Mayuh macham peragam nyumbuk dalam runding Beremas. Ngelama tu Jimbun sigi nadai kala nusi iya bisi bekelala enggau orang bukai ke benama Jimas. Endang nadai dalam sukut runding iya Jimbun bisi indu bukai.

Beremas merening mua Jimas. Iya agi nganti saut ari semua tanya iya nya tadi. Tang Jimas semina diau sengian. Agi ulih tat ga asai ati Beremas, enti enda sigi udah dichekak iya indu nya laban ke baka orang ke agu, orang ke bisu. Udah mega dipeda iya baka sulu Jimbun.

“Dek tu sapa?” tanya Beremas baru.

“Aku Jimaslah.” Ku saut indu nya enggau sada nyawa ke alus.

“Nemu aku dek nya Jimas tang dek nya sapa?” Beremas nyau mupuk begedi ngagai Jimas.

“Aku Jimas.” Ku saut Jimas enggau terang.

“Ess! Dek enggau Jimbun nya sapa? Baka ni dek enggau Jimbun? Nama kebuah iya ngasuh dek kitu, tauka dek udah nangkap sereta ngurungka Jimbun udah nya datai kitu madahka Jimbun ke ngasuh dek kitu lalu madahka iya sigi enda datai. Dek tu sapa?”  Penatai Jimas enggau jaku Jimas sigi ngasuh Beremas nya muras, ringat enda tentu pasal.

“Aku ... “ Jimas jenuh enda lama lebuh Beremas nampungka jaku iya.

“Jimas ... dek Jimas, aku nemu dek nya Jimas. Dek sapa enggau Jimbun?” pia ku tanya Beremas baru.

“Oii! Aku deka madah suh dek sapa aku tu ke bendar. Aku tu mih Jimbun!” ku saut Jimas.

“Dek Jimbun? Beremas nyau tekala nya ketawa engkakah-kakah. “Hai wai!!!”

“Mas, aku mih tu. Aku udah puas nyadi lelaki. Aku udah lelak nyadi lelaki. Aku deka nyadi baka dek. Sigi amat aku admire dek suba tang aku admire laban deka nyadi indu baka dek. Aku tu Jimbun mih tu, aku udah nyadi Jimas nya kebuah aku madah Jimbun sigi enda datai laban aku udah nyadi Jimas. Suba sigi aku Jimbun, diatu aku Jimas.” Pia ku terang Jimbun ngena sada nyawa iya ke garau, iya ke original.

“Hah, pia!” Tekanyat Beremas.