Niuh

Aku boring! Boring! Boring! Tang aku nadai daya laban aku besekula semina naka Primari Tiga. Peneleba aku semina ba genturung pendiau aku aja baka engkatak ditangkup tachu. Enti bisi pan naka penyauh nya pasar Sebangan. Nya pan laban deka nyual niuh, nyiur, inyak, piasau ku jaku orang Iban Limbang. Taja pan maya dulu suba gagit ga aku dibai nurun ke pasar Sebangan tang empa penyuah nyau leju ga. Enti baka utai pakai nyau bansu. Enda lama meda pasar nya, enda lama meda orang ke sama. China, apek bala laut sama magang. Orang nya belama. Nadai mua bukai. Ke kedekaka aku nya pemerindang tang mih nadai utai ke bisi dia. Pukul lima lemai udah sunyi pasar asai ke ba kampung dalam nadai didinga ensung nyumbuh bujang.

Ukai main agi juluk ati sigi deka merindang diri, injui tang maya datai ba pangkalan, niuh pan diangkat, ditanggung bala kuli lalu dibai ke atas ngagai tauke. Udah bebelika barang pemakai nyau ga mupuk pulai bai apai berumban-rumban baka ke ngerumban pasang belama.  Nama bansa pemakai ti dibeli? Ikan aja aja, nya ke bisi. Nya pan ikan empirang ke mayuh tulang, ikan lelumek ke rega 50 sen sekati. Nadai apak-apak amai. Ngasuh ringat bisi tang kati ku enggau dih ga nadai daya, ukai kitai bos. Kuli aja. Kuli batak ku orang.

Ukai nadai bala bakih mai aku belelang ke menua orang tang aku tetap taluk ke prinsip. Prinsip ke disimpan teguh. Aku sinu meda apai aku nyau nadai kala rangkai baju ba tubuh. Tubuh nyau semampai bepeluhka tuli begigaka jereki dikena ngidup kami menyadi. Taja pan bendar baka nya, pengidup kami agi baka nya mega, baka selama baka manuk kair pantuk, kair pagi makai pagi, kair lemai makai lemai.

Aku mimit pan enda alit ati. Apai baka orang bukai mega ba menua kami sigi bisi kebun niuh iya empu. Tumu pagi tak teberingkas tawas sema jaku agi belam-lam udah nurun, pulai nyau udah terengkah malam. Ninting hari nurun. Nadai hari diau. Nadai kemisi. Nebas babas ba kebun niuh. Ngarang niuh. Ngangkut niuh ngagai parit besai, ngundur buah niuh nganti ai surut mai angkut ngagai rumah asap. Nyalai niuh, nyimpan dalam guni. Nya rutin pengidup apai mih nya. Deka pan enda bisi siti team mai bol mulut nganti rangap-rangap deka makai ninting hari. Perut deka diisi, mulut deka disapi. Kami semenyadi nadai mih bisi hari deka bemain bol, nadai bisi tanchut manah tauka nama-nama utai pemisi. Buah bol enda ibuh sebut, sigi nadai. Enti deka mai bol kami sebuat lalu ngisi sebungkus empelus enggau keretas gaga segala engkabih baka bol. Laman bemain sigi besai. Tang nya mih. Nitihka jaku apai, duit mesti disimpan ba bank. Anang melanja. Anang muai sengapa. Simpan ku iya. Sedia baka ke nyendiaka payung sebedau hari ujan.

Taja pia, kami nadai siku deka pedulika hal nya. Enggai ngemediska pala, lagi asai ke disipat Bugau enti bangat ngira utai baka nya. Kapa enda. Ba penemu apai aku nya iya semina begigaka jereki, chukup makai enggau chukup gari dikena ya mih nya. Taja pan baka nya, sekali dua bisi ga runding jai tepambur ari untak aku bejaku kediri berandau nenggali. Bemonolog. Ujung-ujung aku nyau tebalan enggau runding baka nya.

Nya alai, geragayak ati endang seruran deka ngelaban, deka mogok mantaika pengeringat, nama agi lebuh bakih ke rapat enggau aku udah pegi ke pasar Kuching bekereja bekuli enggau tauke Sarang Burung Lelayang. Sapa agi enti ukai Empidau. Suah ga Empidau nguji marit aku ngemai aku ninggalka menua kami ke benama Arus, menua ke nadai meri aku peluang megai duit diri empu. Taja pan gaji enda bangat besai ku Empidau tang barang maya ulih mindah kin kitu nadai orang ngetan, peneka bebuaika duit, peneka ngaga utai.

Ninting malam aku kasak-kasak berundingka duit ke diulihka kami semenyadi dikena apai nyekulaka kami ke pas peresa jemah ila. Sebedau tu aku endang nemu nya mih munyi jaku apai. Sapa ke sekula sereta pas peresa deka disekulaka enggau menyana lalu rugi mih orang ke enggai besekula. Lebuh runding jai datai ayan ba untak dia dih reti jaku Empidau udah mujur marit runding aku ke ngelama tu ti enda peduli enggau niat ati apai aku nya. Kiraka runding aku nyau udah tepejuh jauh diparit bakih aku Empidau. Tepawah ngagai lebak pemansang ba nengeri.

“Enggai nyadi enti baka tu belama. Aku enggai mih rugi!” pia ku serebana dalam ati aku. Nyau majak ansak jaku jai Empidau bepintal ba ruang untak aku. Nyau beba runding jamah jaku iya nya. Charut baka Chemegi charut laki. Nyau kelalu mayuh runding ti baka nya meraruh dalam untak aku, nyau nadai garis entara. Enda chukup enggau nya, aku nyau ngerundingka penyamai Empidau ba pasar Kuching.

Hari siti aku senaja enggai dani baka jam selama nyau baka orang ke ngandau. Senaja aku baka orang ke bengal beruang lebuh indai aku ngetukka pintu bilik peninduk aku. Kapa aku nya. Kedua-dua aka aku, Jarit enggau Gerinang udah lama pansut makai pagi enggau sida apai, indai sereta adi aku Bedali enggau Jali. Lima iku menyadi aku ke bukai agi tinduk laban agi nganti maya  deka nyikap diri nurun ke sekula.

“Bah, ni Jimbun?” pia ku tanya apai, ulih didinga jaku tanya iya tama ngagai lubang pending aku ke nyau penuh enggau tai semengat. Aku nyau ngeredungkan ngereman namaka diri dalam pua lalu mungkur abis tubuh aku enggau pua.

“Ai pasang pagi tu, kitai enda ulih laun. Deka undur nyual buah niuh nya. Tang agi ga bisi orang bebungkur apus. Asuh besekula enggai,” pia ku putap tudah apai tetumu pagi nya. Nyau muchau munyi Melanau nimbau bangkung.

Ninga putap apai, indai pan ngereduas angkat nguji ngerak aku.

“Lembau amai, tulang tu aa,” pia ku aku sambil ke ngeliat.

Melut mata indai meda aku. Aku nemu indai bisi ati takut laban apai mantaika pengeringat iya tang aku udah mutus ati; sehari tu aku enggai nurun enggau apai undur bejualka niuh. Lakka buah nya agi ba rumah asap ngantika disan ngagai perau. Lakka aja. Kapa nya, ukai nya bisi asil ba aku. Ngemediska tubuh aja. Ngasuh isi madai bisi nya dia.

“Imbun, lapa nuan lalu bedau besikap?” Tinggi munyi nyawa apai seraya ke nimpai aku ari mua pintu.

Aku ari tadi ke bisi agi deka ngelaban nyau mit asai telu ba selepak pah, takut ninga jaku apai. Nyau begeguai aku angkat taja pan aku agi kaju kakang.

“Aku pedis pala, pai.  Asai ke enda ulih nurun aku pagi tu. Lagi aku enggau indai kereja di rumah ga. Enda ga ibuh ngupah orang nulung iya pagi tu.” Ku saut aku nyau disempulang enggau danji.

“Kelalah!  Kelalah! Orang kelalah sigi mayuh kebuah. Nadai ngawa ga enti nuan enggai nurun, ingat semaya nuan nya. Lagi udah ngelumu empurung lalu tunu sampai nyadi arang. Dah nya enggau indai nuan ngarang kupi. Nya semua kereja orang indu enggai enda madah ngagai nuan,” pia ku apai baka pengelicha tetumu pagi.

Aka aku Jarit enggau Gerinang lalu nurun bejalai nitih apai enggau lalu ngema gat sereta nangkun moto sepit. Adi aku, Bedali enggau Jali entudi sida tiga bebaika bekal ke disimpan indai ba dalam raga. Semua sida bisi utai dima. Tak berat peda aku ari jauh, nyau bentur bau ngema. Enti aku enggau endang baka biasa pengawa aku diasuh ngelempung utai ke dibai Jarit enggau Gerinang. Nadai apak-apak amai.

Aku nengkila apai enggau bala menyadi aku bejalai nuju pendai ke sepenikau ari rumah kami. Bisi sebatang sungai ba genturung pendiau kami dikumbai kami Sungai Arus. Maya ai pasang, semua kami semenua  undur ke pasar Sebangan ngena jalai ai nya tang maya ai surut kami semenua bedarat kira-kira 45 minit bejalai kaki ke pasar Sebangan. Nengah sungai jampat agi. Nya mih ke nyelai pasal menua kami. Nitihka umur aku nyau 40 taun baru bisi jalai. Nya pan bepun enggau jalai pasir, udah nya baru dianchau enggau batu besai, nangkanka nya baru batu alus. Ujung-ujung baru dibelangkin. Aruh orang Iban selalu ngumbai jalai alun, jalai tanah. Kemaya kini kitai bisi jalai raya bai sida ke gawa ba radio.

Nyau kebangai aku ke berandau kediri bejaku nenggali dalam ati sereta nimpai pejalai sida baru bala sida bekejang. Udah sida bekejang, aku lalu duduk meugau-ugau ba mua pintu baka orang mawa putus pengerindu. Baka orang ke udah labuh pengerindu betuchik laman.

Makin lama makin jauh mega munyi derut injin moto sepit sida, nya ney makin beserapun ga untak aku. Aku enda tentu nemu sekalika pengawa ke deka dikereja aku pagi nya betul tauka enda laban aku agi diikat entara rawang ati ke deka ngelaban enggau asai ati ke sinu sereta kasih.

Agi mega endang udah ditemu enti aku enggau pan kadang-kadang baka ke enda chukup tulang ngarang sereta bebaika buah niuh. Seruran ninga jaku putap apai laban jaku asuh iya selalau enda dititihka aku. Kadang-kadang aku empu suah agi ke tesungkur, teterap tetingkap laban ke nadai tentu bedaya baka sida bukai. Suah amai ninga apai aku merak madahka enda ngasuh aku bangat baka orang indu.

“Enti nuan tak pedis pala, manah nuan gali dulu,” pia ku indai bejaku ari belakang. Nama dih baka orang ngantuk disuaka panggal, tak berasai lempung asai pala lalu diturut aku mih jaku indai aku nya.

“Tang enti nuan nadai pedis pala, manah ga nuan nulung aku ngangkut empurung ngambika ulih disalai nyadi arang lagi. Enda patut nuan deka meda indai nuan ngaga kereja nya kediri-diri.”

Tak perening aku mata indai aku nya. Nadai aku nyangka iya tak bejaku munyi nya. Ati aku nyau asai ke digerami enggau garam. Ensiban asai ke disirap enggau dikin. Nyau bepedi asai ati aku dalam din. Jaku indai aku nya baka ke ngegap aku. Baka ke  mejal aku ngereja pengawa.

Geragayak ati aku maya nya agi dikungkung asai ati ke enda puas taja pan bisi mega asai ati ke sinu ninga peminta indai aku nya. Bisi ga asai ati pengasih aku ngagai indai aku nya. Ukai nama, ngelama tu aku alit ati ga meda chara indai aku ngereja semua pengawa besehari-sehari ari nurun ke kebun nyentuk ngagai pengawa bebelaka pemakai ari pagi nyentukka lemai, ari siang nyentukka malam. Ninting hari baka nya. Nadai mudah leju nadai mudah bansu. Lauk ke disumai pan sebaka mih belama. Upa niuh, ikan lelumek bekuah, ikan epirang guring. Ahh ... semua sama.

Bendar amai mega aku nguji deka ngenggaika diri ari ke enggau indai aku tang nya mih aku mega nadai daya, aku enda berani beterus terang enggau indai. Buyan enda dibagi enggau orang.  Ukai nama, enda sanggup meda pemedis indai napi semua pengidup iya. Naka ulih dibantai aku semina mantaika mua masam baka chuka aja.

Nyadi aku ke gawa sehari nya semina ketegal dipejal, diansak indai. Ati aku sigi enda begilik, udah mutus ati enggau penemu aku empu. Aku udah enda sanggup meda indai gawa baka nya. Hari siti baka nya. Hari siti baka nya. Hari siti baka nya mega.  Ba runding aku, kereja ke digaga kami besehari-sehari nya sigi nadai mai penguntung, endang nadai asil, nadai mansang, nadai nyegang. Semina tak kair pantuk aja. Kair pagi pantuk pagi, kair lemai pantuk lemai. Hari siti baka nya. Aku sigi amat-amat udah boring!

Sepengudah pengawa berangkutka empurung nya tembu, aku pan duduk changuk-changuk ba langkau asap nyalai empurung. Diperatika aku utai ke ngelingi aku dia. Dipeda aku nyau udah ngam amai enggau pengidup aku baka sempama isi enggau kukut. Ari mit aku udah ngerapitka kaul aku enggau rampa menua dia tang diatu aku tak enda mukai-mukai berasai leju berasai bansu engka udah diparit penemu Empidau. Ya amai, aku udah leju ngereja pengawa baka tu besehari-sehari. Deka ngumbai aku nya kuli ukai ga nadai diberi gaji. Deka ngumbai diri ulun enda ga patut. Ukai orang bukai ke enggau gawa tak apai indai aku empu.

“Arus! Arus! Arus! Nadai apak-apak aku tak agi diau ditu!” pia ku aku nyerauh kediri bejaku nenggali.

Enda lama udah nya peda tak datai indai mai ai kupi ke disimpan iya ba dalam jebul ai mineral. Aku meda bisi dua changkir bechurak chelum ngelintum laban ke seruran dikesuh asap. Indai mega mai sepinggai bandung rebus disempulang enggau sepirin gula apung. Ah, aku pan nyau leju makai utai tu! Enda patut-patut.

“Lapa nuan tak nyerauh tadi?” Nyau nyebut menua kitai tu. Mentang nuan nya baka orang ke ngigau?” Kapa aku nyaut tanya nya. Adai ku kisah. Lembau aku ibuhka nya laban aku udah mutus enggau resia aku.

“Enti bisi utai nanggul nuan padah mih ngagai indai. Anang nyalam utai. Enti deka bebini padah deka bebini. Naka ke nanya indu ba Batang Sebangan tu ulih diatur kami duai apai nuan. Adai si pedis nya. Suba aka nuan Nyanau enggau Jilan pan ngena duit simpan sama ke dikeluarka aba nuan kena belanja melah pinang. Udah beruang bilik baru nemu ngidupka diri.”

Tak berasai panjai amai munyi jaku indai didinga aku maya nya. Tang aku tetap enggai bejaku. Nadai nyaut seleka mukut, enggai malas seleka beras. Nadai rindu. Nya ukai juluk ati aku. Kapa aku nya.

Juluk ati aku deka ke pasar Kuching. Bekereja kediri empu ari ke ngarang niuh sereta nyalai empurung besehari-sehari. Aku deka baka burung terebai nadai orang nagang baka bakih aku Empidau. Enti aku baka burung aku ulih terebai jauh, aku enda ibuh ngikat diri enggau indu ba Batang Sebangan aja. Enggai dikumbai orang bepantuk diri sekurungan. Tuchum lelegup aku lebuh ke ngenang juluk ati aku nya.

“Nama mimpi nuan?”  Tuchum aku tak putus baka tali gudi lebuh aku nemu diri diperatika indai ari tadi.

“Indai, Imbun deka bekereja di Kuching. Imbun udah mutus ati. Minggu nyin ila Empidau bisi pulai ke menua lalu Imbun deka nitih iya mansang ke Kuching.”

Tak naka penyamai-nyamai aku mantaika penemu diri ngagai tudah indai aku. Aku ke bendar ukai deka minta pemendar tang minta penyanggup ari iya. Diperatika aku indai baka ke udah dikungkung penyinu tang aku udah entap ati enggai ngubah anggur penemu aku nya. Berasai bendar bisi pengidup baru aku din.

Aku udah mutus ati, maya ke udah dianti ngelama tu udah datai, aku enggai mandangka diri sinu agi, enggai mantaika pengasih diri agi. Enti deka mujur mesti ngembuan ati ti tegap, semengat ti kering, runding ti entap; nya mih nyadika pengering semengat aku kiraka pengaruh gembar tubuh. Asai ke aku aja mih anak apai ke berani baka bujang berani laban udah mujur nyakal arung pejalai pengidup ke diaturka apai.

Kenyau ari ke udah madah pengasai ati aku ngagai indai, aku nguji ngereja pengawa aku besehari-sehari enggau naka pemanah. Ngarang niuh enggau bala menyadi. Nyungkit sereta nyalai niuh enggau sida. Sehari enggai aku betawing enggau asap tang aku mimit pan nadai serebana. Mimit pan nadai. Aku arapka indai udah nabur berita juluk ati aku ngagai apai, nuju bala sida menyadi aku.

Apai baka selama, sigi enda mayuh jaku. Baka nya mega bala aka enggau adi aku mimit nadai mih sida nanya. Semina maya aku mupuk mai beg aku ke penuh dedat enggau baju ke dikira aku manah baru apai aku tepansutka jaku.

“Apai ngemendar nuan pegi anak tang kami sigi nganti pemulai nuan laban lagi tesat ba menua orang; iya ke ngiring ngembing nya enda rurus baka ni pan, tang kami ditu enda baka nya. Lain. Gaya enggau utai ke nyadi nadai kami ngira.”

Aku enda nyaut seleka mukut, enda nibas seleka beras, enggai meri komen tang semina nabi jari apai. Udah nya aku lalu merap indai ke benung sesedan nyabak. Aku merap semua menyadi aku tang entah nama enda utai ke benung bepulas ba dalam runding untak sida nadai mih aku nemu.

Enda datai tiga jam, aku pan udah ngenataika diri ba pasar Kuching nepan van sapu nuju stesen teksi. Datai din lalu pansut kami duai. Peda aku singkang Empidau nyau laju baka peluru leka bangkang napatka teksi. Udah nya kami pan datai ba rumah sewa Empidau.  Taja pan rumah Empidau ba ringkat dua ba atas rumah kedai tang bilik Empidau nyau betemarung baka rumah kami di menua. Asai ke nadai bida enggau rumah di menua tang aku enggai memunyi. Udah nya aku dibai Empidau betemu enggau Unggal Chang.

“Ulih kereja diatu. Lagi nuan mantu iya Dau, ngajar chara kereja lalu gaji kurang RM200 ari nuan, nya pan enti kereja manah.” Semina nya aja jaku padah Unggal Chin. Aku lalu terus bekereja sama enggau Empidau.

Empidau sigi orang ke dikarap Unggal Chin. Hari beganti hari. Minggu beganti minggu. Tiap-tiap malam Empidau mai aku pansut merindang ati tang aku ngasaika diri lelak, agi mega aku tebalan tinduk tumu di rumah din. Mata aku sigi enda ulih betemu enggau malam, baka kedijait. Nama malam datai mata sigi sedia ngantuk. Dani sigi pagi siti. Dini hari.

Dikena aku mandangka pemujur diri ba menua orang, aku ngirum duit ngena duit pos ngagai indai, RM100.00.  Sigi amai aku ulih nyapai juluk ati aku. Diatu aku ulih kini-kini, aku ulih sepeneka bebuaika duit, tang naka kediatu gaji aku semina RM600.00, pengingin ati aku agi disekat enggau pengulih aku. Macham-macham utai ke dekaka aku. Ujung-ujung aku lalu ngurangka penyampau duit ke dikirum aku ke menua ari RM100.00 nyadi RM50.00 laban mata aku udah berengkah gatal deka meda utai ke dibeli Empidau.

Prinsip aku berengkah begilik baka perau kena empas gumbang. Puas ke begilik lalu ngujungka iya karam! Ninting hari aku tepuruk kediri ba dalam bilik asai ke diau ba rumah pasung betawing utai ke temera, barang gari ubut Empidau. Lebuh agi baru begulai, aku basu lalu ngemas kain baju Empidau tang nyau kelama-lama aku pan nadai tan. Adai pan tan. Dia baru aku nemu aku nya ukai indu. Aku ukai bini iya ke nganti pemulai Empidau bebaika pemakai tungkus, pemakai tapau enggau nama-nama ke dibeli iya mih.

Taja pan Empidau nadai ibuhka aku tang gaya alai aku diau ke sunyi balat ngansak aku ngiga utai ke patut aku belajar ari Empidau ke seruran dipeda aku lantang belama. Ya, setengah taun udah aku begulai sejalai enggau Empidau ... pengelantang sigi bisi dikembuan iya. Tembu aja gawa Empidau lalu lesap, lebang enda temu tunga. Nyau jauh malam baru iya pulai. Tang aku baka orang ke diau ba rumah pasung, kediri-diri baka pendiau bunsu bubut. Malam siti baka nya. Rutin pengidup di nengeri. Nama aja diau di nengeri.

“Suba nuan madah nuan deka ngiga duit, diatu udah bisi. Enda pia?” Aku nganggutka pala belubah-lubah.

“Nuan madah nuan udah leju bekereja di menua. Diatu nuan bekereja ba kilang sarang burung layang ke diempu Unggal Chang. Ukai orang bumai agi. Amai?” Aku nganggutka pala baru tanda setuju enggau penemu Empidau.

“Nuan madah nuan enggai tepagang diau ba menua agi. Enggai baka tungku ke enda kala pansut ari keduk dapur. Enggai nitihka prinsip aba nuan agi. Enggai agi meda indu menua kitai empu. Amai?” Aku semina tak mandangka mua ke luchi-luchi aja ngagai Empidau. Nadai daya deka nimbal jaku iya. Semua nya amai memagang.

“Nuan deka idup nadai sekat baka burung tang utai ke dipeda aku diatu nya nuan empu agi mentin diri empu. Nama pulai kereja lalu diau ba bilik.  Nama pulai kereja lalu diau ba bilik. Imun enda beiga-iga.  Nyau berasai enda nyamai asai aku meda ulah nuan. Nuan nganti aku ngerandau nuan tang pangan nuan mayuh nganti nuan di luar din. Sida selalu amai bejaku pasal nuan baka indu dara bagau ku sida,” pia ku Empidau sambil ketawa ngeleseka aku. Aku nyintak seput ninga empas jaku sindir iya nya. Tajam begerenyam baka mata duku.

“Semua nya bepanggai ba nuan.”

“Kini nuan? Nama gaga?” Anak mata kami besatup. Nya mih keterubah iya aku nanyaka penunga pejalai Empidau. Sebedau tu aku ukai enda tang lalu nadai sempat nanya laban aku agi nitih rutin di menua din ke lalu enda ulih meda hari malam. Sigi terus nindukka diri.  Tambah mega, Empidau baka kechai suah lebang nadai temu tunga nama terengkah maya malam hari.

“Aku deka injui! Aku deka ngelepaska diri baka burung! Happy sampai pagi! Pia ku jaku Empidau sigi munyi orang ke gaga belama. Aku merening mua manchal Empidau.

“Nemu nuan ... enti nuan nitih aku, tentu nuan berasai nesal  diau teperap ba menua din. Tentu nuan deka ngubah maya bujang nuan ari ke ngabiska jam ngarang niuh.”

Aku nelan ai liur ninga jaku Empidau ke sangkai ba pending aku.

“Nuan enda pechaya?” tanya Empidau seraya ke mantaika mulut tuchum lelegup iya ngagai aku. Aku baka orang ke terenchat akal, tebelengga lilih ninga iya ke bejaku.

Laban ke arapka Empidau mih aku lalu nitihka singkang pejalai iya malam nya. Tu kereja iya nama malam, bayau-bayau ba lelangun. Bedau sempat kami duduk, udah bisi seraban bala indu narit bau Empidau. Baka ke berebutka buah kara sida enggau Empidau; aku ke berasai enda nyamai meda ulah sida nya. Jegit. Kendin.

Tang aku tetap enda baka Empidau. Aku ukai Empidau. Aku Jimbun. Jimbun anak Medan. Nyau kepuas ke meda ulah bala indu nya nyau majak bepegai bejapaika bau Empidau, aku pan dikungkung geragayak ati ke enda nyamai. Enda berasai tak ayan mua indai. Kati enti aku tak megai indai aku baka nya ... nyau nya ke tebantai dalam runding aku maya nya.

Tang aku agi baka batu, duduk enda engkebut.  Tak diau matuk mungguk.  Nyangka laban ke nadai timbal ari aku nya bala indu lalu ninggalka aku lalu begigaka lelaki bukai.

“Bah, kati gaya?”

Tanya Empidau pungkal enda aku saut. Nadai mega Empidau tatuk; endang Empidau tu lelaki ke chukup begaya ba mata aku. Beprinsip! Betoleransi! Baka ni kati pan enda mudah muras. Semina Empidau diperatika aku baka orang ke udah enda ingatka diri agi baka kachang kelupa kulit. Katika iya enda ingatka diri bisi menyadi indu tujuh iku di menua din?

“Bah ... nuan udah bebas ditu. Nadai agi orang ngungkung nuan. Nuan gaga tauka enda aku enda beduli. Ba aku nuan udah bebas, nadai orang nyekat,” pia ku Empidau lalu angkat ari palan alai iya duduk. Aku nyintak seput panjai udah ke ditinggalka iya kediri dia. Ukai aku enda rindu tang ruang pengingat aku suah terebai melayang-layang pulai ngagai indai aku. Bunyi gut-gut jaku lalau iya nya ke ngasuh nyadi kubu penyelamat ngagai aku.

Hari siti aku nurun tumu ke palan alai kereja. Maya ke bejalai kia aku bepansa enggau Empidau ke bejalai sama-sama enggau Unggal Chang. Entah kini enda iya demalam lalu enda mulai kediri ke bilik. Peragam ati aku tentu iya tinduk ba rumah Unggal Chang.

“Ha, Jimbun. Lagi nuan nyaup Empidau. Nuan nitih iya ke hotel,” enda mukai-mukai tepansut jaku suruh Unggal Chang.

Aku nagunka pala aja ngelaika aku nya setuju taja pan aku enda nemu pun ujung jaku suruh iya nya. Enda lama udah nya, Unggal Chang pan ninggalka tempat nya nguna kerita Toyota Hilux iya.

“Kapa ke hotel?” Aku merening mua Empidau. Mayuh utai bepeling naning dalam untak aku maya nya.

“Kita beperindang ba hotel malam pagila,” ku Empidau tuchum mandangka ngeli iya ke kuning nya.

“Is... nuan tu.  Aku rawan tu. Muzik malam nya pan ngasuh pending aku sup.”

“Iga ga baka nya .. nuan tu semina ngasuh ati aku bangur  aja! Ngemaluka orang menua Arus aja! Ukai tu injui nama-nama. Unggal Chang deka mai kitai makai besai ba hotel,” pia ku Empidau nerangka ngagai aku. Aku tak tegenung baka empelekung sekejap laban nadai nyangka semua utai nya.

Enda lama udah nya Empidau pan nadai temu penunga.  Aku nemu sekali tu Empidau bisi berasai enda nyamai ati enggau ulah aku. Nyangka Empidau enggai mai aku baka ke diasuh Unggal Chang. Nyangka Empidau maluka aku tu baka orang utan nadai nemu ngubah chara idup taja pan nya juluk ati aku ngelama tu.

Enggai enda enggai pan kaki aku tetap dipajak nyingkang bejalai ke kilang. Bala pangan benung kiruh gawa maya aku datai dia. Mimit nadai mih sida irauka penatai aku nya.

“Kini dek, Jimbun?” tak tanya ngenyit Salang.

“Enggau Empidau ke hotel ...” Bedau sempat aku nimbal jaku iya Salang udah ngelampat jaku aku.

“Apu untung mih kitai malam pagila makai besai. Unggal Chang endang selalu ingatka kuli iya. Tiap bisi pengerami iya endang ngangau kitai enggau iya makai besai ba hotel. Sekali tu makai besai beserimbai enggau Hari Gawai,” pia ku Salang. Aku semuti tak ngerising aja. Agi begeremai asai ati ngerundingka jaku ransi Empidau tadi.

Sepemanjai hari nya aku nadai meda batang tubuh Empidau. Ati aku tak berasai mabung asai ke udah pulai ke menua. Aku empu pan alit ati nama kebuah semina ketegal hal mit nyau nyadi baka tu. aku diatu baka orang udah nadai kuing pejalai baka anak itik ditinggalka indai.

Malam siti Empidau lalu nadai pulai ke rumah. Aku baka ke dirantai asai besalah dalam kandang ati.  Maya aku ke temegahka Empidau udah tenggelam laban baru berapa hari iya ke madah iya nadai kiruhka aku gaga tauka enda, tang diatu nama penyadi? Lapa ringat amai kini Empidau ke aku ketegal aku enda rindu nitih aktiviti iya kini? Tauka amaika enda Empidau nya ringat?  Enti amai, nama ngelama tu enda dih? Tauka Empidau ringat laban udah nemu pengawa iya? Aku nyau majak beba runding mikirka hipotesis aku nya.

Nyau kepuas-puas ke bepikir nyau datai malam ke dianti-anti bala pangan sebuat. Kami diasuh ngena gari ke manah, pekayan smart. Nya mih keterubah iya aku nyingkangka kaki aku ngagai hotel 4 bintang; ati aku kesal iya ga ditambah enggau munyi muzik. Taja pan inggar didinga aku tak bisi asai teperindang ga.

Tapak kaki aku nyau kekebut ngentakka geladak nitihka munyi rentak muzik.  Bisi mih ati deka belagu dalam ati tang kati ku enggau semua lagu ke ditebah sida nya lagu orang putih memagang. Enti lagu semina duduk berimbai engka ulih mega aku ngensungka iya.

Enda lama udah nya datai raban penempara ngena baju beribin ba kolar nyadung ai ke dalam gelas puang ke diengkah ba mua kami. Aku lalu terus nyingkau lalu nyeradak ai oren laban ke berasai aus, agi mega perut nyau begeriuk raya lapar. Aku enda nemu nama ke patut digaga laban iya ke dipadah nya kami dibai berami makai besai dia.

Enda lama udah nya, aku lalu nyirut ai baru seraya mata aku nyau tajam nimpai seraban agi penempara bebaika talam besai ke betudung. Perut aku berasai lapar udu. Nyau bisi didinga munyi lagu kerunchung. Nama agi dih aku melabaka utai ke ba dalam talam nya manuk panggang ke seruran dipeda aku ba televisyen.

“Lapar amat dek peda aku?” pia ku telai Nyalong ba pending aku.

Aku semuti tak ngangkat bulu bansu aja dikena aku ngeyaka pengawa aku seraya ke megai sudu sambil diperatika Nyalong.

“Nadai aku nemu ngena jerepang tu enggau orang aa. Lagi ambis tepelanting lauk. Empidau nya ga malu lagi,” ku aku bejaku dalam ati diri  seraya ke merening ngagai mua Empidau ti duduk ba mua bebandung enggau Unggal Chang.    

Enda lama udah nya tudung talam pan dibuka. Apu! Nyau tekanyat aku meda laban utai ke disangka aku nya salah. Ngelidas nadai mih. Jauh amai salah ari peragam ati aku tadi. Perut ke berasai lapar tadi nyau berubah kenyang. Tang ati aku tak berasai sinu. Ayas mua sida apai, indai enggau bala menyadi dipeda aku ayan ba mua. Nadai disangka-sangka sekali-kali disempulang enggau munyi muzik ai mata dalam ati aku tak bekeberai labuh neritik naya sepengudah ke meda menu keterubah disadung ba hotel empat bintang di pasar Kuching nya upa niuh enggau ikan lumek ke disumai enggau mayuh chara.

Entah enda nemu ai mata aku ke labuh nya ai mata asa laban enda diidangka orang manuk tauka iya ke bendar nya aku malu laban udah ngenggaika pemakai ke suah diempa aku di menua din. Ati aku balat agi sinu lebuh aku dipadahka sida semua pemakai ke diorder nya nya ari pinta Unggal Chang empu.

Singkang pulai malam nya baka singkang orang ke megah ninggalka hotel empat bintang nya. Aku udah mutus ati, pagila aku deka pulai ke menua. Aku deka neruska pengawa kami sebilik iya nya bekebun niuh, iya ke batang pengawa kami semenua. Udah tu aku deka chakah agi gawa ngarang niuh lalu nyual nya terus ke pasar Kuching. Aku nyau udah tepedaka jalai pemujur. Mayuh agi utai ke ulih digaga aku di menua din.

Aku deka berengkah nanam koko. Aku deka bumai. Aku deka nupi babi manuk lalu bejualka semua utai tupi enggau utai tumbuh tu. aku deka nyadi tukang kebun ke mujur ba Batang Sebangan. Aku enggai agi tinggal ari orang bukai enggai agi ngembuan prinsip kair pantuk.

Datai aku ba bilik sewa malam nya aku terus ngerebahka diri ba atas katil. Pengingat aku lalu ngerayap datai ba sida apai, indai enggau semua kami sebilik. Neritik ai mata aku ngenangka pekara ti nyadi laban neglama tu aku semina nurutka pengingin ati aku aja. Enti amai aku deka mujur dalam pengidup, apai sigi lama udah muka jalai tang aku tetap baka orang ke buta.

Besekula aku enggai. Kereja pan aku enggai. Kelalah nya ga ke beraja ba pengidup aku. Nyadi tukang kebun aku enda mujur laban ba penemu aku kereja nya nadai mai asil. Nadai ngemai penguntung. Nadai ngasuh kaya raja. Bah kati aku ke gawa nyadi kuli diatu bisi ngasuh aku senang lantang? Nyau abis ai setelaga arang ke dibasu enda ga burak. Agi ga aku idup kair pantuk, kair pagi empa pagi, kair lemai empa lemai.

Nya mih laban ke enggai agi muai awak, pagi siti nyau enda beanggur-anggur aku lalu nyingkang mulai kediri ke menua. Aku pulai. Nguji ngemansangka kebun ba tanah diri empu. Anang ngasuh tanah kitai nya diambi lalu dikereja orang bukai. Tanah kitai kebun kitai. Nya mih jaku telai ke bepeling naning dalam pikir untak aku maya nya.