Enti deka bisi jalai enti enggai sigi nadai

Malu, malu, dini alai aku ngelalai mua aku tu. Asai malu enggau sinu ngerayung selangkuh tubuh aku lebuh pengajar mulaika keretas Sains enggau keretas jaku Iban. Aku semina bulih 25 enggau 30 persin. Tu reti nya aku bulih ‘D’ ba kedua-dua matapelajar.. ayoyo ama!

Aku bingung. Dulu suba maya aku dalam pom empat mark aku nadai kala nyenyai tu. SPM enam bulan da agi. Runding aku majak teberunsai belaban enggau anak penemu. Aku amat-amat udah nesal ke ulah diri. Aku suah agi ngabiska awak aku aba padang. Enti nunda iya , pengelati aku di padang patut setipak enggau pengelati akademik aku di kelas. Aku besemaya ngagai aku empu deka nebus pemuntan tu. Enda alah puntan baka jelan jalai jelu enda alah ila aku labah baka buah merunjau ulu.

Indai endang nadai kala nagang aku aktif dalam bidang lumba enggau main, tang indai seruran ngingatka aku ngasuh aku nemu magi awak.  Kelimpah ari nya indai mega ngasuh aku enggau masuk kelas tuisyen tang aku suah meri kedalih SPM agi jauh. Diatu baru aku ngeleda , aku udah jauh bendar ditinggalka bala tawing aku.

Berengkah ari sehari nya aku deka enggau orang masuk kelas tuisyen. Kelimpah ari tuisyen nya aku berengkah ngaga latih intensif  enda kurang ari tiga jam sehari. Aku arap aku deka ulih mutarka pengelemi aku nya. Aku mega deka enggau raban sekelas aku masuk Klinik SPM  ngambika aku bulih penerang ti baru senentang teknik belajar ti semitan.

Tiga bulan udah nyau alai dalam ujian tengah semester aku nyau deka enda pechayaka mark aku udah mengkechit semak ngagai ‘A’. Nyau murus dada tudah aku. Taja pan aku agi tinggal dudi enti dibanding enggau bala tawing aku ke bukai tang aku tetap ngembuan pengarap maya ujian penguji SPM nya ila aku ulih teulihka mark maksimum.

Pemulai aku sehari nya aku teulihka semengat baru. Kering ari selama semengat aku diatu. Aku udah nadai agi bisi hari aba padang. Aku besemaya enggau diri empu aku deka ngetu dulu bemain. Lekaka dulu pengerindu aku nya. Nyangka pagila lusa aku mujur aku ulih nampung pengerindu aku nyadi pengawa tauka nyadika batu alai aku betunjik ngagai tikas ke tinggi agi. Ukai reti aku badu bemain. Ukai reti aku udah ninggalka pengawa lumba enggau main. Maya belumba enggau main nadai kala aku bemain-main. Sigi amat-amat belumba enggau bemain enggau orang bukai. Tang maya aku napi pengawa belajar sigi enda mih aku bemain, itah bemain pan aku enda bemain-main.

Siang aku besekula baka tawing aku ke bukai. Malam aku bebakih enggau kereban bup bacha. Macha enggau naka ulih. Udah siti bup siti ga dibacha aku. Ngulangka pelajar ke udah diajar raban pengajar aku. Pengawa nya udah nyadi rutin dalam pengidup aku.

Bisi sekali udah tembu belajar malam aku mulaika diri ngagai palan peninduk. Aku nguji deka ngenindukka diri. Tang malam nya untak aku majak berunding. Pala asai ke disipat Bugau. Pechah ngerundingka mayuh leman pekara. Ati rindu deka ke padang tang runding majak ngerundingka pengidup jemah ila. “Ma bol nya ulih ngajar dek nyadi pandai?” pia ku aki aku lebuh aku agi regas bemain bol. Untak aku tak ngenyit ngetu berunding. Tap! Ku munyi tichak labuh ari siling. Aku pan mejamka mata. 

Hari beganti hari, minggu beganti minggu. Bulan beganti bulan. Nyau datai aba ujian penguji SPM. Ujian alai ngujika pengulih siku-siku sebedau peresa SPM. Datai maya peresa aku sigi nitihka jaku indai sereta nyaut semua tanya enggau naka ulih. Keretas saut enda chukup –  aku minta. Aku mega nguna semua awak ke diberi dikena aku nyaut peresa. Ba hari ke pengabis aku semina ulih murus dada tanda aku udah lepas ari peresa asai ke baru pansut ari mulut jagu. Berasai nyamai, lempung sereta lantang. Aku semina beserah ngagai Petara ke semua utai ke udah digaga aku maya peresa nya. 

Udah tembu ujian penguji,  alai pemutus peresa ujian penguji pan dikeluarka, aku bulih 12A . Aku nyau ulih tuchum baka orang bukai. Pengawa aku kenyau ari lima bulan ti udah amat-amat meri pangka ti badas ngagai pelajar aku. Enti baka tu aku endang bisi pengarap aku deka bulih pemutus ti lati dalam SPM ke deka belabuh sebulan ari diatu. Munyi ku jaku sekeda orang tuai “ enti deka bisi jalai enti enggai sigi nadai.”