Pelanduk Berani Nengeri Tebilang

Raja Iskandar tu siku raja ke rindu bendarka pengawa ngasu beburu. Ketegal ke ngembuan pengerindu nya, iya bisi nupi siku uduk pengasu ke manah. Pemantu iya mega orang ke bepenemu sereta bisi negmbuan mayuh penau senentang kampung. Sida nadai kala puntan kelebih agi lebuh begigaka pelanduk. Ari ke meda bekau abi kaki jelu sida udah nemu pemesai pelanduk nya lalu endur iya belalai. Kelimpah ari nya, Raja Iskandar Syah mega nemu nyumpit. Iya mega nemu nguna sangkuh.

Bisi sekali, raja tu mansang begiga ngagai sebuah kampung puang ke enda kala didinga ensung nyumbuh bujang. Ba kampung nya bisi sebatang sungai. Nama sungai nya Sungai Bertam. Pun kayu ke bisi tumbuh ba kampung nya mega tinggi jejentam memagang. Datai iya ba kampung nya, raja nya pan lalu ngelepaska uduk iya. Pemantu iya lalu berengkah nyidi bekau kaki pelanduk enggau kijang ke bisi dipeda ayan ba atas tanah. Amat mayuh bala jelu tu ba kampung nya.

Maya ke bejalai ngasu, mayuh mih kijang enggau pelanduk ke dipeda sida bisi ayan sebelah nya. Tang nadai siku ari jelu tu ulih disumpit tauka dirujak sida ngena sangkuh. Raban bala ke enggau nyempulang raja nya mega nadai siku tulihka jelu.

Mayuh amat udah jelu pelanduk enggau kijang uji dirujakka raja ngena sangkuh tang nadai siku ke kena. Sangkuh iya semina ke ngena tanah belama-lama. Nyau kepuas ke nyidi pelanduk enggau kijang ba tanah emperan enggau sekeda bukit ke baruh-baruh dia Raja Iskandar lalu bejalai nuju ke sebuah sungai. Benung ke bejalai ngerembang babas dia iya bisi ninga uduk iya benung raung-raung nyalak jelu munyi ke tunga tebing sungai.

“Tentu uduk tu benung nyalak pelanduk,” pia ku iya ngerandau bala pemesai iya.

“Lain amat munyi salak uduk tu sekali tu tuanku,” pia ke pemantu raja ke bejalai ari belakang iya.

Munyi salak uduk nya makin lama makin nyaris, makin lama makin nyaris. Kiraka sebatang ruku dia raja enggau sekeda bala iya pan datai ba tebing sungai. Enda mukai-mukai datai sida dia,  semua mata sida tekuing ngagai siku pelanduk burak bebetau. Kelimpah ari ke burak bebetau pendiau pelanduk nya dipeda badas amat. Pelanduk nya diperatika sida benung mengkechit kin kitu baka orang ke benung muka bungai kuntau sereta bepencha.

Raja Iskandar udah besedia enggau laja sereta sumpit iya. Laja diambi ari temilah udah nya dipasukka ke dalam sumpit. Bejalai mih raja nya sambil minching sumpit.

“Pandai baka ni pan nuan bepencha dia, laja aku tu lagi mih ke deka datai terebai nembuska tubuh nuan,” pia ku raja nya bejaku kediri berandau nenggali.

Dinga munyi salak uduk raja nya makin lama makin semak-sesemak. Sigi amat maya sida udah datai semak endur nya dia sida meda pelanduk nya benung betunga mua enggau uduk raja. Pelanduk nya tetap mengkechit enggau chikar, ari kiba ke kanan, ari kanan ke kiba.

Enda berasai Raja Iskandar Syah tak lalu tebelenga lilih lebuh meda hal nya. Iya nyau enda nyadi nyumpit. Uduk raja nya nguji mansang semak-sesemak ngerapat pelanduk nya sambil nyalak enggau naka penyaris. Sigi nyata amat uduk raja nya dipeda buyan amat lebuh ke betunga enggau pelanduk ke jauh besai agi ari iya. Pelanduk nya terus mengkechit baka orang ke benung bepencha. Uduk raja nya pan enggau naka pemerani iya nguji nerekam pelanduk nya.

Terekam uduk pengasu raja nya kena nemban aba tubuh pelanduk nya. Tang pelanduk nya baka mensia nguji deka nyeliahka serang terekam uduk nya. Seraya nya lalu mengkechit tinggi pelanduk nya sereta mingkukka kaki belakang iya. Lebuh kaki mua pelanduk nya terengkah ba tanah dia pelanduk nya lalu nerajang uduk pengasu raja nya tadi.

Nya nama dih! Uduk pengasu raja nya lalu teterap tetingkap tesungkur labuh ke dalam sungai. Pelanduk nya majak mengkechit lebuh iya meda uduk nya bekerepas nyemerai lalu nguji deka nyelamatka diri. Enda lama udah nya, pelanduk nya pan lalu lesap ke dalam babas.

Raja Iskandar enggau raban iya bela alit ati meda pekara ke udah nyadi nya. Sengian enda lama sida udah nya. Bela enda tepansutka jaku. Udah nya raja pan lalu madahka diri deka ngetu belelak. Iya lalu duduk nyandih aba sebuah pun kayu. Pun nya lebat sereta bedaun alus.

“Amat berani pelanduk nya. Manah kitai ngaga endur tu nyadi sebuah nengeri baru,” pia ku perintah Raja Iskandar Syah.

“Badas amat jaku nuan nya tuanku,” pia ku saut pemesai raja nya.

“Uji padah suh aku penama pun kayu ke alai aku nyadih diatu?” tanya raja.

“Pun kayu melaka nama iya tuanku,” saut pemesai raja nya.

“Enti baka tu manah kitai nempa nama menua kitai tu Melaka,” pia ku perintah raja.

Udah bekau nya nengeri Melaka lalu diperimba sereta dibuka bala sida raja. Kenyau ari baruh perintah Raja Iskandar Syah sereta peturun iya menua Melaka lalu  nyadi sebuah nengeri ke tebilang nama jelai berita. Peranak menua iya mega idup bebaik enggau diri sama diri baka asam gulai garam.