Jerita Singa enggau Tikus Belanda

Bisi sekali siku jelu singa diau ba sebuah kampung jerung nadai didinga ensung nyumbuh bujang. Iya tu mangah amai. Ninting hari bisi aja jelu dibunuh iya.

Ketegal nya raban bala jelu bukai lalu baum. Sida deka bejurai pasal pekara nya. Lama amai udah pengidup sida diruga jelu singa tu. Nintig hari ati sida semampai enda nyamai, asai ke diau ba baruh punggu belama.

Lebuh semua jelu udah datai magang sida pan lalu berengkah baum. Munsang ke dikira pandai agi lalu berengkah bejaku. ‘ Aram kitai meri singa tu jelu tiap-tiap hari. Aram kitai besampi mega ngarapka iya enda minta lebih.’

Sida jelu bukai laban ke enda mayuh runding lalu besetuju enggau penemu munsang nya. Bala jelu pan lalu bejalai ngusung singa nya. Datai sida din. Sida lalu bejaku, ‘Oh raja kampung, kami datai sehari tu mai pemeri suh nuan. Enti nuan munuh mayuh jelu sehari dia jelu deka pupus.  Kami besedia nganjung siku jelu ngagai palan nuan ninting hari. Kami minta nuan makai siku jelu sehari.’

Lama mega singa berunding. Tegunung dulu iya baka empelekung mabuk ambuh, ngetu dulu iya baka puyu mabuk keruh. Nyau kepuas ke bepikir dia iya lalu bejaku, ‘Enti pia enda ibuh mih aku pegi keluar ngiga pemakai. Manah amai tuduh penemu kita.’

Udah nya iya pan lalu bejaku ngagai bala jelu nya. ‘Au pia mih, aku besetuju enggau penemu kita nya.’ Raban jelu nya pan mulaika diri enggau ati ti lantang.

Kenyau ari sehari nya siku jelu deka nurun ngagai palan singa nya. Bisi sekali nya gintir siku chit tuai. Sepemanjai iya bejalai iya ati berunding ke chara nyeliahka diri ari diempa jelu singa nya. Bukit turun bukit tiki nengah menasan jalai jelu. Sambil bejalai sambil berunding. ‘Sebedau aku parai aku mesti ngiga akal.’

Bejalai lubah mih tudah tuai baka pejalai tudah tekura. Nyau kepuas ke bejalai iya pan datai ba palan singa nya. Singa nya pan lalu negung, ‘Lapa dek laun amat datai?’

‘Aku minta ampun, tuan. Bisi siku da agi singa bisi datai ke kampung kitai tu. Iya ngetan aku ba rantau jalai tadi. Iya madahka deka munuh nuan, tuan.’

Singa nya pan lalu nyaut enggau ati ti ransi, ‘Chis berani iya deka munuh aku. Bai aku ngagai iya. Aku deka munuh iya terus.’

‘Enti pia titih mih aku, ‘ ku saut chit nya.

Chit nya pan lalu bejalai ngulu singa nya nuju sebuah telaga ti dalam.  Datai iya dia iya lalu madah ngagai singa nya ngasuh iya empu meda munsuh iya dalam telaga nya.

Singa nya pan beguai-guai meda ke dalam telaga nya lalu tepedaka mua diri empu dalam ai ke chiru nya. Seraya ke meda nya iya lalu negung enggau nyaris amai. Bunyi negung iya nya lalu matul pulai ngagai iya. Ba penemu iya tentu nya munyi saut munsuh iya. Amai bisi mih siku singa dalam telaga nya, pia ku runding iya. Enda mukai-mukai iya lalu merejuk ke dalam telaga nya. Nama dih iya pan lalu lemas ngujungka iya parai.

Chit nya pan lalu mulaika diri ngagai bala pangan jelu iya ke bukai lalu madah ngagai sida utai ke nyadi. Semua jelu ba kampung nya gaga amat lalu ngangkat iya nyadi bujang berani kampung sida.