Jerita siku pama

Bisi sekali ba sebuah kampung dalam diatur siti lumba iya nya lumpat merejuk baka engkatak. Dalam lumba nya bisi dipadahka atur baka ni chara lumba nya dipejalaika. Nitihka atur lumba nya, sapa entara pama ke ulih merejuk datai ke ringkat atas legit rumah deka dikira menang. Maya nya mayuh bendar orang datai sereta meri sukung ngagai pama ke bisi enggau belumba dia. Nyau penuh dedat tebing palan alai meda. Mensia mayuh ke datai besun-sun ari tumu pagi udah datai.

Enda lama udah dipadahka atur lumba nya dia sida pan lalu berengkah.

Maya lumba nya nyau deka berengkah, mensia mayuh ke sama bela meda lumba nya semua sida enda tentu arapka bala pama nya ulih ngenataika diri ba ringkat atas legit rumah tinggi nya laban ku sida pama tu siku jelu utai idup ke mit sereta enda kering. Maya udah berengkah bala mensia nyau tachuh munyi burung makai buah kara. Sida sama bela betempap jari sereta manjung ngading pengari diri. Mayuh bala mensia dia nyau ngeleseka bala pama.

Ku sida, ‘Kapa mih kita nya ngenusahka diri merejuk, nadai mih kita nya ulih datai di atas.’

Bala pama ke ngeringakka reti berumpak nya pan lalu berasai temati semengat. Sida nya mupuk nadai pengarapka pengulih diri. Bala ke meda nyau majak mega tachuh. ‘Kapa kitai nya ngenusahka diri  merejuk, nadai siku kita nya ulih datai di atas nyin!’

Lebuh ninga jaku kelese bala mensia mayuh dia siku-siku pama nya lalu nurun sereta nyerah diri alah. Nyau kepuas bala pama ke mayuh nurun nya semina tinggal siku aja agi nguji merejuk sereta niki datai di ringkat atas menara nya.

Pala dulu pala asur, kaki dulu kaki ga diasur. Nyau kepuas-puas nya semina siku aja pama ke mujur datai ba atas sereta menang lumba nya. Iya tu menang ketegal pemendar iya sereta iya mega nguji enggau penapat-inat lalu enda mudah putus pengarap.

Lebuh udah tembu lumba nya dia bisi siku pama ke dulu ngaku diri alah pan lalu nampil semak pama ke menang nya. Iya pan lalu nanya baka ni jalai iya tak ulih nembuka lumba nya enggau mujur bendar.

Lebuh iya mansik sereta betanya enggau raban bala pama bukai dia iya baru nemu pama ke menang lumba nya pama ke bengal! Iya nya siku aja ke nadai ninga nyawa bala anak mensia ke tachuh ngeleseka sida pama ke merejuk niki rumah tinggi nya.

Jaku ajar ari jerita tu: Anang sekali-kali ibuhka orang ke rindu nguji deka ngelabuhka kitai sereta ngasuh kitai puntan ari nyapai juluk ati enggau pemujur.