Bisi sungai, bisi ikan

Udah lama Baki berunding dalam ati diri. Penemu iya udah nadai agi meranggang. Baki ngasaika diri patut bendar ngamatka jaku dalam ke madah bisi sungai, bisi ikan. Semua utai jai, pengawa ke enda manah sereta perati mensia mayuh ngagai iya enda tau enda ditempalung jauh-jauh ari pengidup iya. Mentaliti mensia mayuh kemaya hari endang enda tau enda dikemetulka. Juluk ati ke tegap sereta kuat dalam rawang ati iya diatu baka ke nyadi siti tanggung pengawa ke dilempai ba bau iya sereta baka ke enda ulih enda diaturka.

Udah tembu belajar, Baki berunding deka ngentapka pendiau diri ba menua iya empu. Baki ngembuan juluk ati deka ngangkat sereta ngemansangka menua iya ngena degree ke dikemisika iya. Bala tawing Baki nyau lelekik  ketawa ke iya laban sida mimit pan nadai ngembuan pengarap Baki ulih nyapai juluk ati iya nya enggau mujur. Ba penemu sida, di nengeri din mayuh agi peluang gawa ke balat agi ulih nyamin pengidup sida jemah ila. Taja pia, nadai seleka penemu sida nya ulih matahka semengat Baki.

Baki bisi ngembuan degree ba bidang pengawa dagang. Iya ngembuan juluk ati deka maju dalam bidang nya sereta nyaup mantu sida bukai ke sama-sama bedagang mimit-mimit ba menua sida ke agi jauh bendar tinggal pemansang. Ba penemu iya, manah agi iya ngempung perabung ngempung temetung mai sida sama-sama enggau iya. Iya bisi ati deka bekunsi pengelandik enggau penau iya enggau bala sida ngambika sida ulih mansang ba pengawa sida.

Baki lalu numbuhka siti syarikat dikena iya ngempung bala sida ke bedagang mit nya. Besenutuk enggau nya, iya mega mai bala sida ke pandai ari luar menua sida dikena mantu matih sida tu. Kelimpah ari nya,  iya mega enggau naka ulih ngiga peluang ke sida ngemasukka diri ba arus pengawa bedagangka asil ba tiap-tiap produk ke diasilka sida. Baki bisi nginjau duit ari bank enggau palan duit menua dikena iya beranakka puku sereta bejalaika pengawa dagang iya nya.

Kenyau ari nya, semua pengawa sida  nyau majak maju semaju sereta nerima tempat ba pengawa dagang ba pelilih menua sida. Nya mih munyi ku orang tuai, jangka enda jauh ari pelaba.  Ari nya tentu Baki bulih untung ke bekali-lipat ari tiap-tiap puku ke udah dikeluarka iya. Bala sida semenua pan nyau majak stabil ari sukut ekonomi. Bisi nya nyau ulih nyepi pengelantang sereta idup nyamai. Asil kereja iya nyata amat bisi ngemansutka asil.

Pekara nya nyau kepengujung iya muka mata ngasuh bala pangan iya enchelak. Ngelama tu sida nadai nyangka Baki ulih mujur sereta tulihka penatai pemisi ti jauh besai ari enggi sida ke gawa ba pasar. Rambai jaku bisi sungai, bisi ikan ke ngelama tu nyadi prinsip tudah Baki endang amat-amat ulih dijapai. Anggap bala tawing iya ke madah ngiga jereki ke manah semina ba nengeri aja pan patut bendar dikemetulka. Baki udah ngayan ngagai sida  enti deka alah enda, enti enggai bisi pan tau  mih nyadi nadai.