Ribut bepuput pun kayu beguyang

Baka belayan padi lebat bebuah, tiap utai ke nyadi tentu bisi tuju enggau kebuah. Nya mih prinsip ke dipegai Endu Beringan Tinchin Mas dalam pengidup iya ngelama tu. Tiap-tiap pekara ke nyadi ba penemu iya endang semampai bisi tuju enggau kebuah.  Pen ke dipegai iya rat maya nya dilechutka ari pegai iya. Endu Beringan Tinchin Mas nyau rugang penemu pasal utai ke deka dikarang iya malam nya. Pengerindu iya dilakka iya tepagang sekejap. Runding enggau pikir nyau enda likun. Jaku sebut Ambau lemai tadi agi terang amat didinga ba lubang pending iya.

Untak iya nyau jampat bepeling-naning belematika tiap-tiap leka jaku ke tepambur ari mulut Ambau. Ati iya bisi berasai rajai ninga tusun jaku Ambau. Asai ke angus enda berapi, karam enda berai. Iya ngasaika diri dipenyati sereta dikelanyaika orang ngelama tu. Iya udah dipetenahka orang. Iya enda nemu sapa ke ngepun bejaku jai pasal iya taja pan dalam ati iya endang udah bisi orang ke diperagam iya ngereja pengawa nya. Taja pan baka nya, iya enggai kelalu tumu ngaga simpul runding enti nadai sebarang kelai ke entap dipeda mata.

“Ringat amat Tuan Tutong ngagai nuan. Manah agi nuan bejaga-jaga, Endu,” ku Ambau bejaku ngagai Endu Beringin Tinchin Mas. Endu Beringin mesai bulu mata pan enda mih ulih nerima jaku nya. Iya dituduh ngambi duit kompeni enggau chara ti enda betul ke guna diri iya empu. Ati iya asai ke runtuh, retung angus ditunu api ke benung manjut. Iya ngasaika diri patut ngetanka diri laban ngasaika diri nadai bisi salah.

Niat iya ke ngambi peremisi sepengelama seminggu dikena iya ngelantangka runding udah ke napi sekeda penanggul kereja sereta pengawa diri empu ke sempat digaga. Baru dua hari pulai gawa baru, iya nyau tegepang tekenyit ati ninga diri empu kena tuduh pelesu baka nya. Iya patut ngetanka diri ari majak disalahka atas pekara ke enda digaga iya. Tunjuk jari Endu Beringin Tinchin Mas nyau regas betekanka papan kunchi komputer dikena iya ngulihka kelai ti engkeman lalu ulih mantu iya ngelepaska diri ari tuduh nya.

Naka ke ulih dikingatka iya, iya endang udah nembuka penyata akaun kompeni sebedau iya ngambi peremisi minggu nyin kemari. Penyata nya mega udah diserahka iya ngagai Chemamai, tawing rapat iya ke gawa nyadi pemantu iya ba opis. Endu Beringin Tinchin Mas tekenyit meda penyata ke udah tembu digaga iya nya berubah bendar ari selama.  Tiap-tiap penyampau untung kompeni ke udah digaga iya mega berubah jauh bendar.

Mujur mega Endu Beringin Tinchin Mas bisi nyimpan penyata akaun asal dalam komputer iya empu. Diatu, iya udah bisi penemu sapa orang ke nyadi batu api sereta nyadi pun diri iya dipetenahka baka nya. Kebuah pia, kelimpah ari iya empu, semina Chemamai aja ulih ngubah penyata akaun nya laban seduai aja ke dichiri nyaga akaun kompeni ninting bulan.

Endu Beringin Tinchin Mas lalu bejalai gupai-gupai enggau penuh pengarap ngagai bilik opis Tuan Tutong, tauke ke ngaji iya sereta ke dipebasaka iya ngelama tu. Ati dalam kandang kamai iya agi nguji ngiga kebuah iya ke disalahka sereta dipetenah sida. Iya enda nemu kebuah Chemamai ke ngelama tu dikarapka iya sanggup ngaga iya baka nya. Taja pia, iya berasai gaga laban mujur nyidi pengawa Chemamai nyentukka iya dituduh ngaga pengawa ti jai baka nya. Jauh ba sukut ati iya din iya ngembuan juluk ati deka betungkapka pekara tu sereta mansik motif orang ngereja pengawa nya ngagai iya laban iya arapka rambai jaku ke madah enti bisi ribut bepuput pun kayu tetap beguyang. Tentu bisi utai ke ngasuh Chemamai enda puas ati datai ngagai iya berani ngaga bepetenah baka nya.