Bisi Padi Bisi Beras, Bisi Budi Bisi Balas

Jari Budin lanchat ngiar uras ba laman rumah repuk nya. Daun-daun ke betemarung disapu lalu digelumu iya ba siti endur. Peluh labuh neritik ke kening iya ke bisi menchul mimit. Gaya utai ke ngelingi rumah tak sunyi sereta bisi dipeda deka pepetang mimit baka ke nadai bisi orang diau dia munyi sempama jaku tuai baka ke ba kampung baung nadai didinga kensung nyumbuh bujang, baka ke ba kampung sunyi nadai didinga kesui nyawa orang. Kelama iga, kebangai ukai udah nya, bisi siku lelaki tuai ke udah bungkuk mimit ketegal ke udah lunggar umur pansut ari rumah nya. Budin meda iya pansut lalu ngelaluka pemansut iya enggau tuchum. Budin endang nadai kaul darah getah enggau Aya Ngelambong. Taja pan baka nya, Budin lantang ati nyaup orang tuai dalam mayuh bengkah pekara. Aya Ngelambong mega udah nganggap Budin nya baka anak iya empu taja pan iya nadai ngembuan tiris nadai pantis.

Aya Ngelambong udah lama idup kediri diau nenggali ba rumah ke repuka nya. Penatai iya ba genturung menua nya lima taun ke udah bisi ngenataika tanda tanya ngagai sida ke diau ba genturung nya. Iya datai baka orang kampar. Enda mayuh utai ke ditemu sida dia pasal Aya Ngelambong. Agi mega Aya Ngelambong tu ukai orang ke pejaku lalu rindu agi diau kediri baka pengidup  pendiau bunsu bubut. Ketegal nya iya suah ditejuka sida kediri. Ketegal bisi ngembuan penyiru nya mih ke ngasuh Budin nya tegerak ati deka mantu Aya Ngelambong meda iya tak diau kediri-diri. Budin seruran ngusung Aya Ngelambong sereta nulung iya maya ke bisi pekara ti patut disaup iya. Keterubah iya datai nemuai kia, Aya Ngelambong enda tentu lantang ati meda iya kia. Iya suah agi deka muru iya pulai. Taja pia ketegal pemai-ulah Budin ke enda mudah nyida sereta ngambi ati ke ngasuh Aya Ngelambong nyau kelama-lama udah nya ulih nerima penatai Budin ke rumah iya.

Kenyau ari nya, Budin suah agi ngusung Aya Ngelambong. Budin berasai kasih meda Aya Ngelambong idup baka manuk ke ngair pantuk besehari-sehari. Budin mutus ati deka mantu Aya Ngelambong dalam mayuh leman pekara taja pan sida serumah  nadai gagauka Aya Ngelambong. Seriran enggau awak enggau jam ke beputar ninting hari dia Aya Ngelambong nyau berasai lantang meda penatai Budin ke seruran enggau iya dia belama. Aya Ngelambong ke berasai sunyi ngelama tu nyau berasai nyamai maya udah bisi Budin ke selalu ngelawa iya kia. Semua utai ke patut diguna iya besehari-sehari baka ubat enggau pemakai endang semampai disediaka Budin ninting hari. Aya Ngelambong berasai sereba salah laban ke ngasaika diri ngenusahka anak patu balu baka Budin nya. Ninting kali iya deka ngemansutka jaku madahka asai ati ke sereba salah nya dia Budin selalu nimbal iya enggau jaku, “Nadai jaku nya aya. Aku ke idup kediri-diri di dunya tu udah nganggap nuan baka aki aku empu.”

Bisi sekali lebuh iya baru pulai gawa, Budin singgah ba rumah Aya Ngelambong. Maya iya datai dia, rumah Aya Ngelambong tak bekunchi. Tu tanda ke nyelai ba ati iya. Ngelama tu Aya Ngelambong enda kala bejalai kediri enti iya nadai enggau. Budin berasai nangi enggaika bisi utai ke enda manah nyadi ba tudah tuai. Taja baka nya, iya mutus ati nganti pemulai Aya Ngelambong. Seraya ke nganti, Budin nguji ngenyelapka ati diri, nguji muai semua peragam ti jai ari runding iya. Puas ke duduk dugau-dugau ba pala tangga, tak datai sebuah teksi ngetu ba mua laman rumah Aya Ngelambong. Aya Ngelambong ke pansut ari perut kerita dipeda nadai apa nama. Budin berasai lantang ati meda Aya Ngelambong pansut ari teksi lalu bejalai belubah-lubah ke rumah iya.

“Kini nuan tadi, aya? Irau amat aku,” pia ku Budin sambil megai jari sereta ngiring Aya Ngelambong tama ke dalam rumah. “Aku ke pasar tadi, betemu enggau luyar,” pia ku timbal Aya Ngelambong. Budin enggai nanya enggau silik agi lalu ngumbai jaku Aya Ngelambong nya semina jaku tundi iya aja. Sehari nya, Aya Ngelambong peda lantang agi banding enggau hari ngelama tu. Aya Ngelambong mega mayuh meri jaku lalau ngagai Budin. Budin bisi asai alit ati meda ulah Aya Ngelambong nya.

Diatu udah sebulan pekara nya nyadi. Aya Ngelambong udah nyau danjan dibai bulan, lesi nyanggai hari pulai ke Batang Mandai. Budin ngejangka pendam Aya Ngelambong. Nyau deka ninting hari iya ngabas pendam Aya Ngelambong besampi ngagai Petara minta Aya Ngelambong lantang dalam dunya baru. Budin teingatka semaya iya enggau sebuah firma luyar sehari nya. Iya bisi nerima panggil telefon ke minta iya datai ngagai opis luyar nya. Penatai Budin kia disambut lelaki siku ke benama Salang enggau manah. Budin dibai tama ngagai bilik opis iya ke bisi air-kon nya. Seduai iya diperatika bisi bendar utai berat dikerandauka dia. Mua Budin tak lalu bebali udah ke mendingka penerang ari Tuan Salang nya.

Maya ke ngemulaika diri ke rumah, Budin agi mengkang ingatka pekara ti didinga enggau dipeda iya. Aya Ngelambong ke dikelala iya ngelama tu, orang tuai ke dipeda iya merinsa mensena bisi ngembuan reta tengkira ke nyampau bebillion ringgit lalu diatu satu paras tiga ari reta nya udah diempu Budin, lalu lebih nya diberi iya ngagai gerija ba genturung menua sida. Mayuh bendar utai ke dalam kutak runding Budin maya nya. Nyau kepuas ke berunding baru Budin teingatka jaku kepenudi Aya Ngelambong sebedau iya mutuska seput, “aya nuan tu udah mayuh berutang budi ngagai nuan, pemanah nuan anak. Udah mayuh bendar utai ke ditulung nuan ngagai aku. Ingat anak, bisi padi bisi beras, bisi budi bisi milih balas.” Diatu baru Budin mereti utai ke disebut Aya Ngelambong nya.