Lari ari Tuhan

Ku Tuhan bejaku enggau Jonah anak Amitai, “Sedia, lalu angkat nuan, bejalai ngagai nengeri ti besai bendar iya nya Nineweh. Anu orang ti diau dia laban penyai sida udah ditemu aku.”

Ninga nya Jonah angkat lalu ngelarika diri ngagai nengeri Tarsis laban deka nyeliahka diri ari Tuhan. Iya mansang ngagai menua ti dikumbai Jopa. Lebuh iya datai dia, iya tetemuka kapal sebuah baru deka belayar ke Tarsis. Iya mayar tambang lalu nepan kapal nya enggau bala sida kelasi laban udah mutus ati deka ngelarika diri ari Tuhan.

Taja pia, ulah Jonah disempamaka baka ke larika sungkup tetemuka pendam, larika ribut tetemuka ujan. Tak enda mukai-mukai kemaya nya mega Tuhan ngasuh biau balai mangkaka tasik; kabut balat bendar nyadi. Tak ngelegua ribut biau balai pansut lalu mangkaka tasik ledung lelinang nya. Pangka ribut biau balai nya mih ke ngasuh kapal sida nyau deka pechah. Semua kelasi kapal nya berasai takut memagang. Sida lalu minta sah sereta besampi ngagai petara diri empu. Sida mega mupuk bebuaika barang ti diundan kapal nya ngambika iya lempung agi. Lebuh utai tu nyadi, Jonah benung reringak gali garing-garing ba kapal lalu tinduk enggau jenak bendar.

Lebuh jeragan kapal nya tetemuka Jonah benung tinduk ba ruang kapal, dia iya lalu ngerak Jonah. “Oh Jonah, dani, dani. Nama kebuah nuan tinduk? Angkat, kangauka petara nuan, minta tulung Iya, nyangka icha Iya kasihka kitai, ngambika kitai enda parai.”

Udah nya sida kelasi kapal nya bejaku enggau diri sama diri. Ku sida, “Aram kitai bechabut undi dikena nentuka sapa ti bempuka penyalah, kebuah penusah tu nyadi ba kitai.” Lebuh sida bechabut undi, dia nama Jonah kena chabut. Sida pan lalu bejaku enggau iya. “Padah ngagai kami, ketegal sapa penusah tu tau nyadi ba kitai? Nama pejalai nuan? Ari ni penatai nuan? Dini menua nuan, lalu nama bansa nuan?”

Jonah lalu nyaut. “Aku tu bansa Hebrew lalu aku nyembah Tuhan, Allah Taala serega ti udah ngaga semua tasik enggau tanah.”

Ninga jaku nya sida lalu irau bendar ati. Sida lalu nanya iya baru. “Nama utai ti udah dikereja nuan?” Sida nemu iya udah ngelarika diri ari Tuhan laban iya empu udah kala madah ngagai sida.

Lebuh sida meda gelumbang ba tasik nyau mansang besai-sebesai dia sida lalu bejaku enggau Jonah baru. Ku sida nanya iya, “Kati ku kami enggau nuan tu awakka tasik tu tau teduh?”

“Tanggung aku lalu buai aku ke tasik ngambika tasik tu tau teduh. Laban aku nemu sigi ketegal aku mih alai biau balai ti ngemalat tu nyadi ba kitai,” pia ku saut tudah Jonah.

Udah nya, bala kelasi kapal nya naka ulih bedayung ke tebing tang sida enda tebaika kapal nya ke tebing laban gelumbang mansang besebai-sebesai. Sida lalu ngangauka Tuhan. “O Tuhan, kami minta Nuan anang nyalah kami ketegal kami ti munuh orang tu. anang ngukum kami baka Nuan ti ngukum orang ti munuh orang laban Nuan ti ngasuh kami ngereja utai baka tu.”

Udah nya sida lalu nanggung Jonah lalu muai iya ke tasik. Lalu kemaya nya mega tasik nya teduh. Sida kelasi nangi bendar ke Tuhan. Nya alai sida lalu meri piring ke Iya lalu ngaga semaya enggau Iya.

Tuhan lalu ngasuh siku ikan ti besai nelan Jonah. Jonah mengkang dalam perut ikan nya sepengelama tiga hari tiga malam.