Ali Baba

NYADI bisi dulu kelia dua iku orang diri menyadi, iya ke siku ti tuai nama iya Kassim lalu iya ti biak benama Ali Baba. Kassim tu bebini jadi ke indu ti kaya, nya alai iya nyadi kaya tang Ali Baba jadi enggau indu ti umang. Kassim diau dalam rumah ti besai tang Ali Baba ngani rumah iya ti mit. Rumah seduai sama betampung diau ba pasar siti. Semak alai sida diau bisi sebuah bukit lalu ba atas bukit nya bisi mayuh pun kayu. Kayu ti tumbuh dia nya diambi orang dalam nengeri nya ke kayu api dikena orang nyumai.

Nyadi sekali, Ali Baba mai keldai iya niki bukit nya laban deka ngambi kayu api. Iya niki jauh amai nyau deka datai ba punjung bukit nya, endur ti nadai kala orang datai. Punjung bukit nya pan dipeda iya pemadu tinggi baka ti deka nyentuk ke remang. Lebuh Ali Baba nyau deka datai di punjung bukit nya, iya belelak ngetu ba baruh kayu sepun. Tengan  iya duduk dia iya tepedaka sekaban orang nguingka pejalai sida ti niki bukit nya nuju adap ke pun kayu ti alai iya duduk. Lebuh iya meda sida mansang dampih ngagai iya baka nya, iya ngasaika ke orang nya sigi orang penchuri. Kepala sida nya, iya ti nguluka sida, nepan ba atas belakang kuda lalu siku-siku nembiak iya ngiring keldai siku magang. Lebuh Ali Baba meda sida, ati iya berasai takut amai. Iya mai keldai iya ngagai pun kayu ti besai lalu belindung dia. Iya empu lalu ngelalaika diri ba batu siti ti besai amai. Ari nya iya ngemataka utai ti deka digaga seraban orang nya.

Udah sida datai semak batu nya, iya meda siku-siku sida nya mai peti siti diengkah atas belakang keldai. Semua peti nya dipeda iya penuh laban duit mas sereta mayuh macham ngepan ti berega. Udah nya, kepala sida nya nunjuk adap ke tisi bukit. Lalu ku iya, ‘Buka Sesami!’ lalu bisi pintu besai siti ti adap ke tisi nelengaka diri. Iya lalu tama. Semua nembiak iya nampung nunda udi iya. Udah nya pintu nya pan lalu nambit diri.

Ali Baba lalu mansutka diri ari endur ti alai iya belalai laban deka meda tapak ti alai pintu nya. Tang iya nadai iya bisi meda utai nya-nya dia. Iya lalu pulai ngagai endur iya ti belalai lalu nganti dia baru. Udah nya, entara enda lama, pintu nya telenga baru. Semua orang nya pansut, nepan atas keldai sida. Tang lebuh sida pansut Ali Baba sempat meda semua peti sida nyau puang magang laban semua duit mas enggau macham utai ti dibai sida ambis ditinggalka sida dalam bukit nya tadi.

Nyadi ku pikir Ali Baba sigi amat mih sida tu penchuri. Tentu dia alai sida nugungka duit enggau semua macham leman utai ti ulih sida ngenchuri.

Udah sida pansut magang, kepala sida nunjukka pintu nya baru lalu nelah, ku iya, ‘Tutup Sesami!’ Pintu nya pan lalu nutupka diri.

Udah nya semua sida penchuri pan ngidarka diri lalu mupuk angkat bejalai. Maya semua sida nya udah jauh ngejangka tempat nya, Ali Baba pansut ari batu ti alai iya ngelalaika diri tadi. Iya mega lalu nunjuk adap ke batu nya lalu nguji nelah, ‘Buka Sesami!’ Pintu nya pan lalu telenga.

Nama agi dih, iya pan lalu tama ke dalam. Dipeda iya bilik besai siti nyau penuh laban pangkat peti. Semua peti nya sigi diisi penuh ulih duit mas enggau mayuh macham utai ngepan ti berega. Iya lalu mai keldai iya tama ke bilik nya. Iya lalu nanggung sekeda peti nya ti penuh enggau duit mas lalu ditugung iya ba atas belakang keldai iya, ikas-ikas ulih dima jelu nya. Udah kemas nya, iya mai keldai iya pulai ke rumah iya. Datai iya di rumah, iya lalu ngangau minta saup bini iya ngangkut peti nya ke dalam rumah seduai. Bini iya pan lalu nanya. ‘Bah! Berapa pemayuh semua duit tua tu jangka ati nuan?’

Lalu ku saut Ali Baba, ‘Entah, enda mih aku nemu nyangka pemayuh iya,’

‘Enti pia, manah aku nginjau gantang sida ika Kassim dikena tua nakar duit nya ngambika nyamai tua nemu pemayuh duit nya lagi.’ Bini iya lalu nyau bejalai nginjau gantang nya.

Bini Kassim madah ke laki iya pasal pekara nya. Kassim lalu nanya bini iya, ‘Nama utai ti deka ditakar iya ngena gantang kitai nya?’

‘Entah. Nadai mih aku nemu.’ Saut bini iya. Kassim lalu bejaku baru. ‘Enti nuan nyalika gantang nya ngagai bini Ali Baba lagi, dulu lekatka dian ba burit gantang nya, udah nya baru nuan nyua ngagai iya.’ Baka nya mih digaga bini Kassim.

Nyadi lebuh bini Ali Baba nyuaka gantang nya pulai ngagai sida baru, Kassim bisi tepedaka duit mas sesingkap lekat ba burit gantang nya.  Iya lalu bejaku dalam ati diri. ‘Enti baka tu tentu Ali Baba bisi mayuh bendar duit sampaika iya nyau nginjau gantang aku kena nakar duit nya.’

Iya lalu ngusung Ali Baba lalu nanya, ‘Aku datai kitu laban aku ninga nuan bisi mayuh duit. Tua sigi diri menyadi. Nya alai, uji padah ngagai aku endur nuan nemu duit ti pemadu mayuh baka nya. Aku mega begunaka duit mih.’

Ali Baba lalu madah ngagai menyadi iya semua macham leman utai. Kassim lalu pulai sereta madahka pekara nya ngagai bini iya. ‘Kitai anang laun ngambi duit nya enggaika Ali Baba dulu ngerebut nya ari kitai,’ pia ku bini iya. Ku saut Kassim, ‘Aku deka mai keldai aku ti lima iku kin. Enti aku nganjung sida kin lima kali tentu aku ngambiska semua leman utai ari bukit nya sebedau Ali Baba sempat ngambi iya.’

Udah nya, Kassim pan mai keldai iku nya ngagai bukit. Datai dia iya lalu bejaku nelah. ‘Buka Sesami!’ Pintu pan lalu tebuka. Iya lalu mai semua keldai iya tama. Iya nugung mayuh peti ba atas belakang keldai iya, ikas-ikas ulih ma sida. Udah nya iya mupuk deka mai sida pulai. Iya lalu nunjuk ke pintu lalu bejaku, ‘Buka Sepani!’ tang pintu nya lalu enda telenga. Nyadi ku pikir ati iya, ‘Nyangka jaku nya ukai Sepani, engka nya bisi jaku bukai ti bepun enggau S.’ Iya lalu nyebut ‘Serapi, Sesati, Setasi, Samisi,’ enggau mayuh jaku bukai ti bepun enggau urup S. Tang taja pia ari pemayuh leka nama ti udah disebut, iya nadai nelah ‘Sesami’. Nya alai pintu nya lalu enda telenga. Kassim lalu enda ulih mansutka diri ari bilik nya.

Nyau deka pagi siti sida raban penchuri nya pulai ke bukit nya baru. Udah sida tama ke dalam bukit nya, kepala sida meresa semua utai ti ditaruh dia. Iya tekenyit bendar ati. ‘Apu! Nama kebuah mas kitai tu tau tak kurang agi ari selama tu? Duit kitai tu pan nyau kurang ari iya ti dulu suba. Tentu bisi orang ti nemu tempat alai kitai ngelalaika utai kitai lalu udah ngambi sekeda duit kitai. Nya ti ngasuh duit kitai tu nyau mansang kurang baka tu.’ Enda lama udah nya siku ari sida penchuri tetemuka Kassim belalai ba peti siti. Ku jaku kepala sida, ‘Tu mih orang ti ngambi duit kitai.’ Sida lalu ngereduas angkat sereta munuh Kassim kemaya nya. Parai mih Kassim nyenggai lemai, mati nyenggai hari.

Bini Kassim duduk dugau-dugau nganti penatai Kassim ti pulai tang nadai ga iya pulai ari bukit. Mula-mula ku jaku iya dalam ati diri, ‘Kassim tu nyau laun datai. Engka iya bisi mai duit mayuh. Enda lama da iya datai lagi.’ Entara enda lama udah nya iya nyau nangi-senangi. Iya pan berengkah mutapka diri empu. ‘Nyau laun ga tu,’ ku jaku iya, ‘hari nyau lemai; nama kebuah iya lalu bedau datai?’ Iya duduk nganti-menganti. Hari nyau jauh malam lalu bedau ga Kassim datai. Nyau kepuas iya ke nganti enda berasai iya lalu lelap nindukka diri.

Sereta hari tebererak tawas bini Kassim lalu bejalai beguai-guai ngagai Ali Baba. Datai din iya lalu bejaku, ‘Kassim ti bejalai ngagai bukit nyin kemari lalu bedau pulai datai ke diatu. Aku tu minta saup nuan, adi bejalai ngiga iya.’

Ali Baba nadai nyaut seleka mukut, nadai malas seleka beras tak lalu nurun bejalai ngagai bukit nya. Datai iya dia, iya tetemuka bangkai Kassim tegaring-garing dampih pintu dalam bilik alai duit mas nya ditaruh. Iya lalu beguai-guai nabanka bangkai Kassim nya pulai ngagai rumah Kassim empu.

Kaban penchuri nya pan pulai mega ke bukit nya baru. Datai sida dia, sida nemu bisi orang bedau berapa lama udah muka pintu nya lalu udah nabanka bangkai Kassim. Meda baka nya bejaku kepala sida. ‘Tentu bisi orang bukai nemu akal muka pintu tu laban sida udah nabanka bangkai pangan sida. Dudi hari tu ila sida deka datai lalu nabanka semua mas kitai mega. Kitai anang enda ngiga semua orang tu lalu munuh sida.’ Udah iya bepikir enda lama iya bejaku baru. ‘Dalam nengeri nyin bisi tiga puluh sembilan jalai pasar. Nyadi awakka siku-siku kitai bejalai niti jalai pasar nya kediri lalu tiap-tiap rumah ti dipansa kita nya tanya ulih kita munyi tu – “Kati bisi kita nemu berita orang ti bedau lama udah mati ba bukit nyin?” ’

Udah iya tembu bejaku, sida lalu mupuk nitihka padah kepala sida. Nyadi bisi siku ti ari kaban sida nya datai ke rumah Kassim lalu nanya orang dia. ‘Kati bisi kita ditu bedau lama udah mati diau di bukit nyin?’ Lalu siku indu gaji Kassim nya nyaut. ‘Au bisi; Kassim ke bedau lama udah mati. Menyadi iya Ali Baba nemu bangkai iya di bukit kemari.’ Penchuri nya lalu kemaya nya pulai madahka rita nya ngagai kepala sida. Sida ke bukai pan lalu pulai mega tang madahka nadai tulihka berita pemati.

Udah nya, kepala sida bejaku enggau semua kaban iya. ‘Siku ari kitai udah nemu sapa ke mai bangkai orang ke dibunuh kitai nya pulai. Jalai kita lalu meli empat puluh igi tajau ti besai.’ Sida lalu bejalai meli tajau lalu dibai sida ngagai kepala sida. Kepala sida lalu ngisi tajau sigi aja penuh enggau minyak nyiur. Udah nya iya ngasuh siku-siku nembiak tama ke dalam tajau tiga puluh sembilan igi ti puang nya. Udah nya kepala nya nugungka semua tajau nya ba kerita siti. Lemai hari nya iya mai keldai narit kerita nya ngagai rumah Ali Baba.

Datai dia iya bejaku enggau Ali Baba. Ku iya, ‘Aku tu orang ti bedagang bejual minyak nyiur. Nyadi hari tu nyau deka malam. Aku enda sempat nampung pejalai aku. Aku enda tau enda diau bemalam ba pasar tu malam tu. Aku minta tulung nuan ngiga tempat ke aku dalam rumah nuan tu alai aku tau ngengkahka tajau aku empat puluh igi tu semalam aja. Pagila aku deka mupuk bejalai nyual minyak aku tu.’

Ali Baba nyaut, ku jaku iya, ‘Au mih, kapa enda tajau nuan tinggal ditu laban tentu nuan lapar. Nya alai, awakka nuan makai enggau kami ditu.’ Udah nya Ali Baba ngumbai bini iya. ‘Oh Siti, kati bisi kitai teda lauk agi tinggal? Enti bisi, sumai nya laban bisi pangan kitai siku ti deka bemalam ditu semalam tu lalu iya deka makai enggau kitai lagi.’

Kepala penchuri nya ngaduka semua tajau nya ke dalam rumah Ali Baba. Udah nya iya bejalai lalu nyenguk ngagai sigi-sigi tajau lalu bejaku enggau tiap-tiap iku nembiak ti diau dalam tajau nya. Ku iya, ‘Nganti semua utai udah kemas; lagi aku deka madah ke kita.’

Nyadi bini Ali Baba ngambi teda lauk lalu deka mupuk nyumai. Meda sarang minyak sida nyau deka ambis, ku pikir ati iya, ‘Orang ti bedagangka minyak nya bisi mai empat puluh igi tajau penuh laban minyak. Aku deka ngambi mimit minyak nya.’ Iya lalu bejalai ngagai tajau sigi nya ti di mua jalai. Nyadi penchuri siku nya ti belalai dalam tajau nya ngumbai indu nya kepala sida, nya alai iya lalu nanya, ‘Kati semua utai udah kemas magang? Tau aku pansut diatu lalu munuh Ali Baba?’ Sereta indu nya ninga tanya nya iya nemu orang bedagang nya sigi ukai orang dagang tang kepala kaban orang penchuri ti udah munuh Kassim di bukit lalu tajau ti dibai iya endang alai iya ngelalaika semua sida nembiak iya.

Iya lalu nyaut betelai begadai. ‘Bedau; anang pansut dulu ari tajau, lagi aku deka datai baru. Iya lalu bejalai begadai-gadai nuju tajau sigi ti ngimbai nya. Iya pan datai dia penchuri ti dalam nya tajau nanya iya, ‘Kati tau aku pansut diatu?’ Nyadi bini Ali Baba nyaut iya. ‘Anang guai. Lagi aku deka datai baru kitu.’ Baka nya mega iya ngagai semua tajau bukai dataika iya sampai di ujung rintai. Nyadi tajau ti ba ujung rintai nya ditemu iya penuh minyak. Minyak nya dituangka iya dalam kawah lalu dipanduk datai ke iya nyau engkurak. Udah nya iya mai minyak nya lalu dituangka iya ke dalam tajau tiga puluh sembilan igi nya, iya nya atas pala semua sida penchuri ti belalai dia. Semua sida nya ambis lukus lalu mati memagang.

Udah nya indu nya bejalai ngiga laki iya lalu madahka iya, ‘Orang nya ti deka makai enggau kitai lagi sigi ukai amai orang bedagang. Iya sigi kepala kaban orang penchuri. Iya datai kitu laban deka munuh nuan. Semua nembiak iya udah dibunuh aku dalam tajau nya ti dibai iya tadi.’ Iya lalu nusika laki iya pasal sida ti belalai dalam tajau.

‘Kepala sida nya da ti agi meruan idup. Nyau jauh malam tu lagi kepala nya pansut madah ke sida nembiak iya. Nyadi nuan enda tau enda ngipa iya lalu munuh iya,’ pia ku bini Ali Baba ngajar iya.

Nyadi udah sida tembu makai malam nya semua orang pan nyau tinduk. Ali Baba pansut lalu ngelalaika diri semak tajau nundaka ajar bini iya. Entara enda lama udah nya, kepala nya pansut mega lalu bejalai ngagai tajau. Ali Baba lalu mambuska diri ngenyit lalu munuh iya. Parai mih tudah kepala penchuri.

Hari siti Ali Baba ngambi semua mas ari bukit nya. Udah nya, iya nyau kaya bendar lalu pendiau iya pan lantang. Iya lalu meri terima kasih ke bini iya ngelui ari selama ti udah laban udah nulung iya sereta ngidupka nyawa iya ari empat puluh iku kaban orang penchuri nya.