Bawing, siku deriba

TENGAH hari kemari maya panas terit, aku bisi betemu ukai sengaja enggau Bawing ba sebuah kedai tambi di MJC, Batu Kawah. Enti lelaki ke berumur 45 taun nya benda, aku sigi nganggap iya nya benda ti tau ajih bepenuduk kelapan aba dunya.

Tang ketegal Bawing nya orang, mensia baka kitai mega, dia iya enda ulih dikumbai  tau ajih laban mayuh agi orang bukai ke tau ajih enti dibanding enggau Bawing. Indah  bisi orang ke tau ajih nya balat agi power bebanding enggau Bawing ketegal pengulih iya bulih pemeri mata duit ti mayuh ari orang bukai.

Taja pan pia, ba aku Bawing nya endang tetap siku orang ke tau ajih.

Sepemanjai idup iya, Bawing ke besekula naka pom lima enggau pemutus peresa SPM ke enda mujur ba Bahasa Inggeris enggau Matematik tu kala bekereja nyadi pemantu kantin, pengumpul uras, penebas rumput, kuli ngaga rumah enggau pemantu van. Kereja ti pengabis lama dikerejaka iya sebedau tu iya nyadi deriba ke siku pengarah kompeni.

Nya mih pun penatai jereki iya ngujungka iya bebini sereta beranak-betelesak.

Maya ujung bulan Jun 2008 udah tembu orang ngiling bidai, Bawing badu gawa nyadi deriba sepengudah ti bekereja sepengelama 10 taun enggau gaji kepenudi iya nya RM1,516. Maya iya ngetu gawa, duit dalam akaun bank iya semina RM55. 

Tang maya aku betemu enggau iya kemari, Bawing nusi pasal pengidup iya kemaya hari tu. Nya pan semina sepengudah kira-kira tujuh taun iya badu kereja. Kenu ku iya, diatu iya bisi meli beberapa bidang reta-tanah ti ngembuan ukur mata duit kesemua nya datai ke bejuta-juta ringgit.

Enda. Endang enda kala. Bawing endang enda kala nerima pemeri ari sapa sapa. Maya iya pil bahasa Inggeris SPM, Bawing nadai kala betawing enggau sapa-sapa bilioner ari Timur Tengah dikena iya bulih pemeri mata duit ke ngemayuh nya.

Nya mih ke deka ditusi aku ngagai kita. Iya ke amat nya, kenyau ke badu gawa, dia Bawing sigi telentang tungkup, mati idup betunggang lupung bejalaika pengawa dagang ari rumah iya ngujungka bisnes iya niki-seniki. Komitmen, kreativiti enggau pemandai iya mai ubah ngagai tikas pengulih Bawing enggau naka penyampat, laju baka peluru leka bangkang.

Iya mutus ati ketegal dua peneleba ti ngubah pengidup iya nyadi baka iya kediatu. Kali keterubah dalam taun 2003, iya ditinggalka sulu ati perembam dalam semina ketegal gaji iya mit sereta nadai duit disimpan. Besenutuk enggau nya mega bala apai indai indu nya sebilik mega endang enda rinduka iya ketegal ke begaji mit sereta semina kuli orang.

Kali kedua, ba pengujung karier iya nyadi deriba, Bawing bedagang sambil – bebelika telefon rusak, biki lalu dijual baru. Maya nya mih iya bekelala enggau Uncle Kong, tukang miki telefon ke landik.

Keterubah ke rumah Uncle Kong maya malam hari nya, Bawing tebelengga lilih, tak tegepang tekenyit ati, tekanyat meda alai lelaki nya diau, chukup manah memelan baka rumah orang kaya. Badas amat rumah Uncle Kong ku ati iya din, cherira mandang mata. Tang iya ti diperatika iya ngelama tu nya Uncle Kong ke dikelala iya nya semampai betanchut pandak sereta ngena baju sampang apek aja. Mesai bulu mata pan nadai mih ngayanka penteba baka orang ke kaya raja.

Malam nya, Uncle Kong -  ke mega orang timpang pendiau semina ngecaj Bawing RM400 kena miki telefon ti dibai Bawing dalam timpuh maya lima minit aja. Insiden nya balat ngajar Bawing. Enti deka kaya, kitai mesti ngiga dalih ngambika orang mayar kitai. Nama-nama chara mih.

Maya kitai mujur nempa dalih kena orang bukai bisi kebuah mayar kitai maya nya mih jalai nuju pengaya udah dirintiska kitai. Mayuh agi dalih manah agi. Manah agi ukur dalih ti ditempa, tinggi agi ga bayar ti diterima. Iya mih ke nyadika  diri kitai beukur manah memelan enggau pemandai ke bisi ba kitai alai kitai bulih mayuh agi duit.

Kenyau ari nya, Bawing endang agi malik ke belakang. Iya regas sereta ransing agi gawa kena ngulihka juluk ati tulihka tikas orang kaya ti dikembuanka iya diatu.

“Dulu, aku selalu berunding… enggau setipikit SPM ke enda berapa, ukur nasit idup aku ti pengabis manah nya semina nyadi deriba sampai mati lalu bisi begaji tetap. Lepas 10 taun aku kereja, pugu gaji aku semina RM1,516. Nya gaji mati, maksimum nemu dek.  

“Enti kitai ngumbai pemujur nya enda ulih dijapai endang iya amat-amat nyadi enda ulih. Tang aku, siku deriba udah tetemuka jalai kena berubah ari kuli nyadi tauke, ari orang ke seruran enda chukup duit nyadi jutawan.

Ke bendar dalam idup, nadai utai enda ulih enti kitai amat-amat deka. Enti deka sigi alah enda enti enggai bisi tau mih nadai,” ku iya sambil nyuaka bup perangsang idup ke baru ditulis iya ari pemayuh bup ke udah ditulis iya ngelama tu.

Utai ti nyelai pasal dagang Bawing tu, iya nya nadai ngembuan opis. Nadai meruan opis baka orang bukai. Iya semina dikelala ba raban pemeli enggau bala tawing iya Bawing tu ‘Pakar Bisnes Ari Rumah’. Bawing bejalaika dagang iya nengah chara betelefon enggau ba media sosial.

Ari nya, nama deka betemu enggau pemeli tak diatur dini-dini endur aja, kafe, kelab tauka ba tisi jalai. Diatu iya benung aktif nurunka ilmu dagang iya nengah licha enggau kereban tulis. Bawing ngembuan juluk ati ke deka meda tiap iku orang ti kala ngumbai diri puntan ba menasan jalai idup baka iya munya berubah 360 degree awakka ulih nyadi kaya.

Nadai naga lemai kemari, Bawing terebai enggau bini iya ke menua tasik bebulan madu entah ke berapa kali!